2 CRÓNICAS 34 - Quichua Chimborazo Bible

Judá llajtata Josías mandashcami(2 R 22.1-2)

1Josiasca, Judá llajtata mandai callarinapajca pusaj huatatami charirca. Paica quimsa chunga shuj huatatami Jerusalenpi mandarca.

2Josiasca paipaj ñaupa yaya David purishca shinallataj purishpami Mandaj Diospaj ñaupajpica, ima pandata mana rurarca. Alli ladomanpish, lluqui ladomanpish mana anchurircachu.

Rurashcalla dioscunata Josías chingachishcami(2 R 23.4-20)

3Josiasca, ña pusaj huatata mandacushpapish, chairaj huambrarajmi carca. Chashna huambraraj cashpami, ña chai huatapica paipaj ñaupa yaya Davidpaj Diosta mashcai callarirca. Pai ña chunga ishqui huatata mandacushpami Judapi, Jerusalenpi causajcuna Diospajlla tucuchunca, lomacunapi tiyaj altarcunatapish, Asera huarmi diosman rijchajcunatapish, shujtaj dioscunatapish, fierrota yacuyachishpa rurashca dioscunatapish tucui anchuchi callarirca.

4Pai quiquintaj ñaupajpi shayashpami, Baal dioscunapaj altarcunatapish tucui p'aquichirca. Chaicunapaj jahuapica, intiman rijchajcunata rurashcami tiyarca. Chaicunatapishmi tucui ñutuchirca. Shinallataj Josiasca, Asera diosman rijchajcunatapish, shujtaj dioscunatapish, fierrota yacuyachishpa rurashca tucui dioscunatapishmi p'aquichirca. Tucui chaicunata ñutuchishca q'uipaca paicunaman animalcunata cushpa rupachijcunata pambashca jahuatami shitachirca.

5Shinallataj chai dioscunapaj altarcuna jahuapica, chai dioscunapajta ruraj huañushca curacunapaj tullucunatami rupachirca. Chashnami Josiasca Judá llajtatapish, Jerusalentapish Diospajlla cachun, tucui mapata anchuchirca.

6Manasés, Efraín, Simeón, Neftalí shuti llajtacunapi caj pueblocunapipishmi chashnallataj rurarca. Chai tucui pueblocuna muyundijcunapi shitashca saquirishca llajtacunapipishmi chashnallataj rurachirca.

7Altarcunatapish, Asera huarmi diosman rijchajcunatapish, shujtaj dioscunatapish, tucui Israel llajtapi chashna tucui ñutuchishca q'uipami Jerusalenman tigrarca.

Dios mandashca quillcashca librota tarishcami(2 R 22.3–23.3)

8Josiasca, Judá llajtata chunga pusaj huatata ña mandacushpami, Azaliapaj churi Safantapish, pueblota mandaj Maasiastapish, Joacazpaj churi paipaj randi rimaj Joatapish, paita Mandaj Diospaj huasita allichichun mandarca. Chaica, Judá llajtatapish, Diospaj huasitapish, Diospajlla cachun tucui mana allita anchuchishca q'uipami carca.

9Josías cachashca runacunami curacunata mandaj Hilcías curapajman shamushpaca, Mandaj Diospaj huasiman apamushca cullquita curcacuna. Chai cullquitaca Diospaj huasi pungupi cuidaj levitacunami Manasespaj, Efrainpaj aillucunapura cajcunapish, mana prezu apashca shujtaj israelcunapish, tucui Judá llajtapi, Benjamín llajtapi, Jerusalenpi causajcunapish cujpi huaquichishcacuna carca.

10Hilciasman cushca q'uipami, chai cullquitaca Mandaj Diospaj huasita allichichun mingashcacunaman curcacuna. Paicunami Diospaj huasita allichicujcunaman pagajcuna carca.

11Shinallataj carpinterocunamanpish, rumita labrajcunamanpishmi pagarcacuna. Labrashca rumicunata randichunpish, urmashca huasita allichina caspicunata randichunpishmi cullquita curcacuna. Judá llajtata jatun mandajcunami, chai huasicunataca urmachishcacuna carca.

12Chai runacunaca, tucuitami alli rurajcuna carca. Paicunata ricujcunaca, Meraripaj huahua huahuapura Jahat, Abdías shuti levitacunapish, Coatpaj huahua huahuapura Zacarías, Mesulam shuti levitacunapishmi carcacuna. Tocanacunapi tocanata yachaj levitacunapurapish chaipimi carcacuna.

13Levitacunallatajmi ashtajcunatapish, chaipi tucui imalla rurana cashcata ruracujcunata ricujcunatapish ricuj carca. Levitacunaca shujcunaca quillcajcuna, shujcunaca mandajcuna, shujcunaca Diospaj huasita cuidajcunami carcacuna.

14Mandaj Diosman cushca cullquitaca, Diospaj huasipimi huaquichishpa charijcuna carca. Chaimanta chai cullquita llujshichicushpami, Hilcías curaca Mandaj Diosllataj Moiseshuan quillcachishpa israelcunaman cushca mandashcacunata japishca carca.

15Chai quillcata japishcahuanmi Hilcías curaca, Safán shuti quillcaj runamanca: “Riqui, ñucaca Mandaj Diospaj huasipimari Dios mandashcacunata quillcashca librota japini” nishpa huillashpami, chai librotaca Safanman curca.

16Paimi jatun mandajpajman chai quillcata apashpaca, cashna huillarca:

–Can jatun mandajpajta rurajcunaca, paicunaman mingashcataca tucuitami alli ruracuncuna.

17Diospaj huasipi tiyaj cullquitaca tandachishpami, chai huasita allichichun mingashcacunamanpish, allichicujcunamanpish cushcacuna– nishpami huillarca.

18Chai q'uipami quillcaj Safán runaca:

–Hilcías curami ñucamanca, cai librota cun– nishpami, jatun mandajpaj ñaupajpi rezarca.

19Jatun mandajca mandashca libropi quillcashcata rezashcata uyashpaca, paipaj churanata lliquirishpami,

20Hilcías curatapish, Safanpaj churi Ahicamtapish, Micaiaspaj churi Abdontapish, quillcaj Safán runatapish, jatun mandajpajta ruraj Asaiastapish cashna nishpa mandarca:

21–Ñucatapish, Israel llajtapi causaihuan saquirishca israelcunatapish, cai Judá llajtapi causaihuan saquirishcacunatapish Diospaj huasipi japishca cai libropi tiyacuj shimicunamanta Mandaj Dios imata nijta tapugrichij. Ñucanchij ñaupa yayacunaca, Mandaj Dios cushca cai shimicuna imallata nicushcatamari manataj uyashpa manataj cazushcacuna. Chaimantamari Mandaj Diosca, ñucanchijhuanca nina sindirij shina yallitaj p'iñarishca– nircami.

22Chashna nijpimi Hilciaspish, jatun mandaj mandashca caishujcunapish, profeta Hulda huarmipajman rircacuna. Chai huarmica, Harhaspaj nieto Ticvapaj churi Salumpaj huarmimi carca. Salumca jatun mandajpaj churanacunata cuidajmi carca. Chai huarmica q'uipata rurashca Jerusalenpimi causarca. Chaiman rishpami paicunaca paihuan parlanacurcacuna.

23Chai huarmica cashnami nirca:

–Israelcunata Mandaj Taita Diosca cashnami nin: Ñucata tapunaman cachaj runamanca cashna nigrichij, Mandaj Diosca cashnami nin:

24Judá llajtata jatun mandaj chai libropi rezajpi llaquicuna tiyanata ricushca shinallatajmi cai llajtamanpish, chaipi tucui causajcunapajpish jatun llaquita apamugrini.

25Paicunallataj ñucata saquishpa, shujtajcunapaj dioscunaman sacrificiota cushpa, paicunapaj maquihuan tucui imatapish rurashpa ñucata yallitaj p'iñachishcamantaca cai llajtapi causajcunahuanca yallitajmi p'iñarircani. Cancunahuanca manataj alli tucushachu ninmi.

26Shina cajpipish Mandaj Diosta tapuchun ñucapajman cancunata cachaj Judá llajtata jatun mandajtaca cashna nigrichij: Israelcunata Mandaj Diosca cashnami nishca: Canca cai libropi tucui imalla nicushcata uyashpaca quillapi imallata nishcataca tucui yuyaihuanmi uyangui.

27Cai llajtatapish, cai llajtapi causajcunatapish, ñuca llaquichina cashcata chai quillcapi huillacushcata uyashpaca, shungu p'aquirishpami ñuca ñaupajpi llaquirircangui. Chashna llaquirishpami tucui shunguhuan chaipi cambaj yuyaita churashpami ñuca ñaupajpica cumurircangui. Chashna llaquirishpami ñucallata cazuna yuyai tucurcangui. Shinallataj can churarishcata lliquirishpami ñuca ñaupajpi cumurishcata ricuchingui. Can chashna llaquirishcataca uyanimi ninmi Mandaj Diosca.

28Chaimanta cai llajtapi causajcunapajman ñuca apamushpa tucui llaquicunataca cambaj ñahuicunaca mana ricungachu. Cantaca cambaj ñaupa yayacunahuan tandachingapajca ñuca munashca punllapimi pushasha. Cantaca sumajtami, pambangacuna ninmi Mandaj Diosca ninguichij– nircami.

Chashna nishcataca paicunaca tucuitami jatun mandajmanca huillagrircacuna.

29Shina nijpica jatun mandajca Judapi caj, Jerusalenpi caj cunaj yuyajcunataca tucuicunata cayaj cachashpami tandachirca.

30Chai q'uipami jatun mandajca, Judapi tucui causajcunandij, Jerusalenpi tucui causajcunandij, Mandaj Diospaj huasiman huichiyarca. Chaicunaca curacuna, levitacuna, uchillacunamanta callarishpaca jatuncunacamami tucuicuna huichiyarcacuna. Dioshuan ari ninacushca librota Mandaj Diospaj huasipi japishcatami tucuicunapaj ñaupajpi tucuicuna uyajta rezarca.

31Ña rezashca q'uipaca jatun mandajca pai shayanallapitaj shayarishpami, Mandaj Diosllata catinata paihuan ari ninacushpaca, can mandashcacunataca huaquichishunmi, can ima shina cashcata ricuchishpa causachun nishcatapish pajtachishunmi, can chaitataj pajtachichun nishcatapish tucui shunguhuan tucui almahuanmi pajtachishun. Cai libropi quillcashpa pajtachingapaj ari ninacushcatapish pajtachishunmi nirca.

32Shinallataj Benjamín llajtamanta shamushcacunatapish, Jerusalenllamantataj chaipi cajcunatapishmi chai mandashcacunata cazuchun ari nichirca. Chashna ari nichijpica, Jerusalenpi causajcunaca paicunapaj ñaupa yayacunata Mandaj Dios mandashca shinatajmi pajtachircacuna.

33Josiasca, israelcunapaj tucui llajtamantami Diosta p'iñachij millananacunataca anchuchirca. Chashna rurashpaca, Israel llajtapi cajcunataca, tucuicunatami paicunata Mandaj Diospajta rurachun mandarca. Pai causashcacamaca, paicunapaj ñaupa yayacunata Mandaj Diosmantaca mana anchurircacunachu.