LEVÍTICO 26 - Quichua Chimborazo Bible

Cazushpaca allicunata japinami(Dt 7.12-24; 28.1-4)

1“Cancunaca dios nishcacunatapish, tacashpa rurashca dios nishcacunatapish ama ruranguichijchu. Rumi diostapish mana shayachinachu canguichij. Cancunapaj llajtapica pintashca rumicunata ñataj churanguichijman. Chaicunapaj ñaupajpi ñataj cunguringuichijman. Ñucami Mandaj Dios cancunapaj Taita Dios cani.

2Ñucapaj samana punllacunataca huaquichinguichij. Ñucapajlla ch'icanchishca ucutaca ama yanganchinguichij. Ñucami Mandaj Dios cani.

3Ñuca ima shina causachun nishca shina causaichij. Ñuca mandashcacunata huaquichishpa chaitataj rurana yuyailla tucushpa ruraichij.

4Chashna cajpica tamyana punllapitajmi tamyachisha. Chaipica cancunapaj allpacunapish, cancunapaj allpapi caj yuracunapish alli granocunatami p'ucunga.

5Cancunapaj trigota manaraj tucui trillajpimi, uvata tandanapish ña chayamunga. Uvata manaraj tucui tandajpimi, tarpuipish chayamunga. Cancunaca quiquin micunatami mana nijta micunguichij. Quiquin llajtapimi imata mana manchashpa causanguichij.

6Llajtapica sumaj causaitami cusha. Cancunaca pi mana manchachishcami dorminguichij. Cancunapaj llajtamantaca millai animalcunatapish anchuchishami. Cancunapaj llajtapica macanacuipish mana tiyangachu.

7Cancunata p'iñajcunatapish catirashpami llaquichinguichij. Paicunaca cancunapaj espadacunapimi urmangacuna.

8Cancunata p'iñajcuna patsaj cajpipish, pichcalla cashpapish callpachinguichijllami. Cancunata p'iñajcuna 10.000 cajpipish, cancunaca patsajlla cashpapish callpachinguichijllami. Cancunata p'iñajcunaca cancunapaj espadacunapimi huañungacuna.

9Ñucaca cancunataca tigralla ricushami. Achca huahuacunayujtami rurasha. Cancunataca achcata mirachishpami, cancunahuan ari ninacushcataca pajtachisha.

10Ñaupa huatacunaman huaquichishca trigocunatami micunguichij. Mushuj trigota huaquichingapajpish, ñaupa huataman huaquichishca trigotami llujshichishpa shitanguichij.

11Ñuca causanataca cancunapaj chaupipimi churasha. Ñucapish cancunata mana millanachishachu.

12Ñucaca cancunapaj chaupipimi purisha. Cancunapaj Taita Diosmi casha. Cancunapish ñucapajcunami canguichij.

13Ñucaca Mandaj Diosmi cani, cancunapaj Diosmi cani. Egiptopi ama huatashca shina ruraj cachunmi llujshichimurcani. Yugopi huatashca angucunataca ñucami p'itircani. C'ari c'ari purichunmi churarcani.

Mana cazushpaca llaquita apanami(Dt 28.15-68)

14Ñucata mana uyashpa, tucui cai mandashcacunatapish mana pajtachijpi,

15ñuca ima shina causachun nishcacunatapish yanganchishpa, cancunapaj yuyaipica ñuca chaitataj pajtachichun nishcatapish mana ricunachishpa, ñucahuan ari ninacushca mandashcacunata chaita rurana yuyailla tucushpa ruranatapish mana rurajpica,

16ñucapish cancunahuanca cashnami rurasha: Cancunapajmanca jatun manchaita, purij ungüita, fiebre ungüita cachajpimi cancunapaj ñahuicunata tucuchinga aicha irquiyana ungüitapishmi cachasha. Tarpunatapish yangallami tarpunguichij. Cancunata p'iñajcunallami micungacuna.

17Ñucapish cancunataca p'iña ñahuihuanmi ricusha. Cancunata p'iñajcunapaj ñaupajpimi chugrichishcacuna canguichij. Cancunata p'iñajcunami cancunataca mandanga. Pi mana caticujpipish miticushpami callpanguichij.

18Chashna llaquichijpipish mana uyajpica, ñucaca canchis cutinhuanmi cancunapaj juchamantaca llaquichisha.

19Rumi shungu jatun tucushcataca chingachishami. Cancunapaj cielotapish fierro shinatami rurasha. Cancunapaj allpatapish bronce shinatami rurasha.

20Cancunapaj fuerzapish yangallami tucuringa. Cancunapaj allpapica ima mana p'ucungachu. Yuracunapish imata mana p'ucungachu.

21Chashna llaquichijpipish ashtahuan yallitaj mana allita rurashpa catijpica, ima shina ashtahuan millaita rurashca shinallatajmi shujtaj canchis cutinhuan llaquichisha.

22Millai sacha animalcunatapishmi cancunapaj huahuacunata apachun cancunapajman cachasha. Cancunapaj animalcunatapish chingachingami. Chaimanta cancunapaj ñancunapi purijcunaca ashacunallami tucunga.

23Chaipipish, mana alli tucushpa ashtahuan ñucata p'iñashpa catijpica,

24ñucapish cancunahuan ashtahuan p'iñarishpami, cancunapaj juchamantaca shujtaj canchis cutihuan llaquichisha.

25Ñucahuan ari ninacushcata p'aquishcamanta cancunata llaquichij cachunca, cancunata p'iñajcunatami macanacushpa huañuchichun pushamusha. Paicuna mishajpi cancunapaj pueblocunapi miticujpipish, cancunaman llaquichij ungüita cushpami cancunata p'iñajcunapaj maquipi churasha.

26Cancunapaj micunacunata ñuca chingachijpica, chunga huarmicunami shuj hornollapi tandata cusashpa, chaita chaupinacushpa micushpapish yaricai pararijtaca mana micunguichijchu.

27Chaipipish, ashtahuan yallitaj mana allita rurashpa catijpica,

28ñucapish cancunahuan yallitaj p'iñarishpami, cancunapaj juchamantaca canchis cutinhuan llaquichisha.

29Chaipica cancunapaj churicunapaj, cancunapaj ushushicunapaj aichallatatajmi micunguichij.

30Lomacunapi tiyaj cancunapaj altarcunatapish chingachishami. Cancunapaj imamanpish rijchaj dioscunatapish urmachishami. Huañushca cancunapaj aichacunatapish, chai urmachishca manapish causaiyuj dioscunapaj jahuapimi paltajni shitasha. Chashnami ñucaca cancunataca millanachisha.

31Cancunapaj pueblocunatapish shitashcatami saquisha. Diospaj huasitapish shitashcatami saquisha. Cancuna ñucaman cushca mishquijllata ashnacujtapish ña mana ashnachishachu.

32Llajtatapish chushajllatami saquisha. Chaita ricushpami cancunata p'iñajcuna chai llajtapi causangapaj shamushcacunapish mancharinacungacuna.

33Cancunataca shujtaj llajtacunamanmi urajta janajta cachasha. Espadata llujshichishpa catirashpa llaquichishpami chashna rurasha. Cancunapaj llajtapish chushajllami saquiringa. Cancunapaj pueblocunapish shitashca pambacunami saquiringa.

34Cancuna cancunata p'iñajcunapaj llajtapi causacui punllacunapimi, allpaca samarina cashca punllacunapi mana samarishcamantaca cushicushpa samaringa. Allpacunata samachina punllacunapi mana samachishcamantaca, chashna shitashcata saquishca punllacunapimi allpaca cushicushpa samaringa.

35Cancunallataj cancunapaj llajtapi causacushpa, samachina huatacunapi mana samachishcamantaca, shitashca saquirishca tucui huatacunapimi chaipaj randi samaringa.

36Mana huañushpa saquirijcunataca manchana yuyaita paicunapaj shungupi ñuca churajpimi, paicunaca paicunata p'iñajcunapaj llajtapica yura p'anga cuyurijllapipish, espadahuan huañuchingapaj caticujpi shina jatunta mancharishpa miticugringacuna. Pipish manapish caticujpi miticugricushpami urmangacuna.

37Pipish mana caticujpimi, jatun macanacuimanta miticushpa ricuj shina rishpa caishuj chaishuj huajtarinacunguichij. Chashna cashcamantaca cancunata p'iñajcunahuancarin manataj macanacui tucunguichijchu.

38Cancunaca shujtaj llajtacunapimi chingaringuichij. Cancunata p'iñajcunapaj llajtami cancunataca tucuchinga.

39Cancunapura mana huañushpa saquirijcunaca, p'iñajcunapaj llajtapimi ñaupa yayacunapaj juchamantapish, paicunapaj juchallamantatajpish huañungacuna.

40Chaipimi paicuna millaita rurashcatapish, paicunapaj ñaupa yayacuna millaita rurashcatapish, ima shinalla rurashpa ñucata c'ariyashcatapish, imamanta ñucata mana cazushcatapish ñucaman huillangacuna.

41Chashna huillajpipish ñucaca paicunahuan p'iñarishcamantaca paicunata p'iñajcunapaj llajtamanmi cachasha. Chaipimi paicunaca shungupi mana circuncisionta rurashcacuna shinallatajmari millaita ruracushcanchij ningacuna.

42Chaipimi ñucaca Jacobhuan ari ninacushcata, Isaac-huan ari ninacushcata, Abrahamhuan ñuca ari ninacushcata yuyarisha. Llajtatapish yuyarishami.

43Paicuna shitashpa rijpimi, allpaca shitashca saquirishpa samarina punllacunapi mana samarishcamantaca chai punllacunapi samarishpa cushicunga. Ñuca mandashcacunata yanganchishcamanta, ñuca chaitataj pajtachichun nishcacunata p'iñashpa millaita rurashcamantami llaquita apana cashcapi paicunaca llaquita apacungacuna.

44Paicunata p'iñajcunapaj llajtapi paicuna chashna llaquita apacujpica shuj cutintajca mana shitashachu. Tucui chingaringacamatajca mana millanachicushallachu. Paicunahuan ari ninacushcataca manataj yanganchishachu. Ñucaca Mandaj paicunapaj Taita Diosmi cani.

45Paicunapaj ñaupa yayacunata paicunapaj Dios cangapaj shujtaj llajtacuna ricucujpi, Egiptomanta llujshichimucushpa paicunahuan ari ninacushcatami yuyarisha. Ñucami Mandaj Dios cani” nircami.

46Tucui cai mandashcacuna, ima shina causachun nishcacunaca Diospish imallata rurana cashcata, israelcunapish imallata pajtachina cashcata Mandaj Dios callarichishpa Moisesman Sinaí urcupi cushcami.