1 CRÓNICAS 5 - Quichua Chimborazo Bible

Rubenpaj huahua huahuacunami

1Rubenca yaya Israelpaj punta churimi carca. Ashtahuanpish paica paipaj yayapaj camapi millaita rurashcamantami punta churi cashcamanta japina cashcataca mana japirca. Punta churi cashpa pai japina cashcataca yaya Israelpaj churi Josepaj churicunami japircacuna. Rubenca ña mana punta churi shina saquirircachu.

2Ashtahuanpish Judami, tucui huauquicunapaj punta huauqui tucushpa catishpa tucui paicunata mandaj tucurca. Shina cashpapish, punta churi japina cashcataca, Josemanmi curca.

3Israelpaj punta churi Rubenpaj churicunaca: Hanoc, Falú, Hezrón, Carmi shuticunami carca.

4Joelpaj huahua huahuacunaca: Joelpaj churica Semaiasmi, Semaiaspaj churica Gogmi, Gogpaj churica Simeimi,

5Simeipaj churica Micaiami, Micaiapaj churica Reaiami, Reaiapaj churica Baalmi,

6Baalpaj churica Beerami carca. Beera runaca rubenitacunata mandajmi carca. Paitami, Asiria llajtata jatun mandaj Tiglat-pileserca prezu aparca.

7Beerapaj huahua huahuacunapish, cada familiami paicunapaj shuticunataca quillcachishcata charircacuna. Paicunata mandajcunaca: Jeiel, Zacarías,

8Bela shutimi carcacuna. Belaca, Azazpaj churimi, Azazca Semapaj churimi, Semaca Joelpaj churimi carca. Belaca, Aroer pueblopimi causaj carca. Paipaj huahuacunaca Nebo pueblocama, Baal-meón pueblocamapishmi causarcacuna.

9Galaad llajtapi paicunapaj animalcuna ashtahuan mirarijpimi, inti llujshin ladomanca, Éufrates jatun yacu caininijpi tiyaj shitashca pambahuan tupanacuncama causagrircacuna.

10Jatun mandaj Saúl mandacui punllacunapi Rubenpaj aillu agarenocunahuan macanacugrijpimi, agarenocuna paicunapaj maquipi urmajpi mishashpa Galaad llajtamanta inti llujshin ladoman paicunapaj quiquin carpa huasicunata churashpa causai callarircacuna.

Gadpaj huahua huahuacunami

11Gadpaj huahua huahuacunaca, Rubenpaj huahua huahuacuna causacun llajta ch'imbapurapi caj Basán llajtapimi, Salca pueblocama causarcacuna.

12Basanpi cajcunapaj punta mandajca, Joelmi carca. Q'uipa mandajca, Safanmi carca. Chaipaj q'uipa mandajca, Jaanaimi carca. Chaipaj q'uipa mandajca, Safatmi carca.

13Paicunapaj ñaupa yayacunamanta mirarimushca quiquinpuracunaca: Micael, Mesulam, Seba, Jorai, Jacán, Zía, Heber shuti canchis runacunami carca.

14Tucui caicunami Abihail runapaj churicuna carca. Abihailca Huripaj churimi, Hurica Jaroapaj churimi, Jaroaca Galaadpaj churimi, Galaadca Micaelpaj churimi, Micaelca Jesisaipaj churimi, Jesisaica Jahdopaj churimi, Jahdoca Buzpaj churimi carca.

15Abdielpaj churi Ahimi tucui chaicunapaj familiacunata mandaj carca. Abdielca, Gunipaj churimi carca.

16Tucui chaicunami Galaad, Basán shuti llajtacunapi, chai muyundij llajtacunapipish causarcacuna. Sarón shuti michina pambacunapipishmi, chai tucui pambacunapi causarcacuna.

17Cada quiquin familiacunapurata yupanaca, jatun mandaj Jotam Judá llajtata, jatun mandaj Jeroboamca Israel llajtata mandacui punllacunapimi carca.

Rubenpaj, Gadpaj aillucunamantapish, Manasespaj chaupi aillumantapish

18Rubenpaj, Gadpaj aillucunapish, Manasespaj chaupi aillupish macanacunata alli yachaj, c'ari c'aricunami carca. Escudocunata, espadata, arcota apashpami macanacuiman llujshijcuna carca. Tucui paicunaca, 44.760 soldadocunami carca.

19Paicunami agarenocunahuanpish, Jeturpaj huahua huahuacunahuanpish, Nafispaj huahua huahuacunahuanpish, Nodabpaj huahua huahuacunahuanpish macanacurcacuna.

20Paicunaca chaupi macanacuipi cashpa Taita Diosta caparishpa mañashpa paipi shunguta churajpimi, Taita Diosca ayudarca. Chaimi agarenocunaca paicunahuan tucushpa macanacungapaj shamujcunandij paicunapaj maquipi urmarca.

21Chaipica paicunapaj animalcunataca 50.000 camellocunata, 250.000 ovejacunata, 2.000 burrocunata apashpa, gentecunatapish 100.000tami prezu aparcacuna.

22Chai macanacuipica Taita Dios macanacujpimi, achcacuna huañurcacuna. Paicunaca paicunata shujtaj llajtaman prezu apangacamami chai runacuna causacushca llajtacunapi causarcacuna.

23Manasespaj chaupi ailluca, yallitaj mirarishpami paicunaca Basán urcumanta Baal-hermón pueblocama causarcacuna. Senir pueblota muyushpa, Hermón urcucamami causarcacuna.

24Paicunapaj ñaupa yayacunapaj huahua huahuacunata mandajcunaca: Efer, Isi, Eliel, Azriel, Jeremías, Hodavías, Jahdiel shuticunami carca. Tucui paicunami tucuicuna rijsishca, c'ari c'ari alli soldadocuna carca. Quiquinpurallata mandajcunapishmi carca.

25Ashtahuanpish paicunaca paicunapaj ñaupa yayacunapaj Taita Diosta c'ariyashpami paicunapaj ñaupajmanta Mandaj Dios anchuchishca runacunapaj rurashcalla dioscunata catishpa chai dioscunahuan huainayashpa causarcacuna.

26Chaimantami israelcunapaj Diosca, asiriocunata jatun mandaj Pul nishca Tiglat-pileserta israelcunahuan macanacuna yuyaita curca. Pul nishca Tiglat-pilesermi Rubenpaj, Gadpaj aillucunata, Manasespaj chaupi aillutapish prezu apashpa Halah, Habor shuti llajtacunapi, Hara, Gozán shuti jatun yacu c'uchupi caj llajtacunapipish causachun churarca. Chaipimi cunan punllacama causacuncuna.