NEHEMÍAS 2 - Quichua Chimborazo Bible

Jerusalenman Nehemías richun Artajerjes saquishcami

1Jatun mandaj Artajerjes ishqui chunga huatata ña mandacujpi Nisán quillapimi cashna tucurca: Jatun mandajpaj ñaupajpi vino ña cajpi, chai vinota japishpami jatun mandajman cucurcani. Ñucaca ñaupamanca jatun mandajpaj ñaupajpica mana llaquilla caj cashca cajpimi,

2jatun mandajca ñucataca:

–¿Ima nishpataj llaquilla ñahui cangui? Mana ungushcachu yuyachingui. Ashtahuanpish shungu p'aquirishca llaquillami yuyachingui– nijpimi, mana jahuallata mancharishpa,

3jatun mandajtaca:

–Jatun mandajlla, huiñaita causangui. Ñaupa ñuca yayacunata maipimi pambarca chai pueblomari shitashca pamba saquirishca. Chai pueblopaj pungucunatapish rupachishpa chingachishcamari. Chashna cajpica ¿maitataj mana llaquilla ñahui cashari?– nircanimi.

4Shina nijpi jatun mandajca: ¿Imatataj rurachun ningui?– nijpi, ñucaca jahua pacha Diosta mañashpami,

5jatun mandajtaca cashna nircani:

–Can jatun mandajpi alli cajpi, cambajta ruraj ñuca cambaj ñaupajpi alli ricurishca cajpica, ñuca ñaupa yayacunata pambashca pueblo Judá llajtaman rishpa chai pueblota cutin shayachingapaj ñucata cachahuai– nircanimi.

6Shina nijpi jatun mandajca:

–¿Mashna punllapitaj chayangui? ¿Ima horacamataj tigramungui?– nijpi, ñuca ima punlla tigramuna cashcata huillajpimi, jatun mandajca ñucata cachana tucurca. Paipaj huarmipish paipaj c'uchupimi tiyacurca.

7Jatun mandajtaca cashnapish nircanimi:

–Can jatun mandajpi alli cajpica, Judá llajtaman ñuca chayangacama ama jarcachun jatun yacu ch'imba ladoman caj llajtacunata mandajcunaman cungapaj quillcacunata cachahuai.

8Mandaj Diospaj huasi c'uchullapi caj pungucunapaj jatun caspicunatapish, pueblo muyundij pungucunapaj caspicunatapish, ñuca causana huasipaj caspicunatapish cuchun jatun mandajpaj yuracunata cuidaj Asafpajpish shuj quillcatami mañarcani. Imatapish cujlla Diospaj maqui ñuca jahuapi cashcamantaca jatun mandajca ñuca tucui imalla mañashcata curca.

9Ña rishpaca jatun yacu ch'imba ladoman caj mandajcunamanca jatun mandaj cachashca quillcacunatami curcani. Jatun mandajca soldadocunata mandajcunatapish, caballocunapi tiyarishca gentecunatapishmi ñucahuan cacharca.

10Israelcunata maijancuna ayudanaman shamucun nijta horonita nishca Sanbalat, amonitacunapajta ruraj Tobiaspish uyashpaca yallitajmi p'iñarircacuna.

Jerusalén muyundij pircata allichina yuyaita Nehemías cushcami

11Jerusalenman chayashpa quimsa punllata chaipi cashca q'uipami,

12ñucapish, ñucahuan caj runacunapish tuta jatarishpa rircanchij. Jerusalenpi ñuca imata rurachun Taita Dios yuyachishcataca maijan paicunaman mana huillarcanichu. Ñucahuan cajcuna tiyarishpa rinapajca animalcunataca mana charircanichu. Ñuca tiyarishpa rinapajllami charircani.

13Chai tutallataj pugru Pamba ladoman caj punguta llujshishpami, Dragón nishca pugyu yacu ladota, Mapacunata llujshichishpa shitana ladoman caj pungu lado rishpa, Jerusalén muyundij pirca urmashcata, chai pungucunapish rupachishpa chingachishca cashcata ricurcani.

14Chaimantaca Pugyu c'uchupi tiyaj jatun mandajpaj yacu tanque ladoman caj pungu c'uchutami rircani. Ashtahuanpish ñuca tiyarishca animalhuanca maita mana pasaipajmi cashca carca.

15Chaimantaca yacu ricun huaicuta tuta huichi rishpami, Jerusalén muyundij pircata muyushpa alli ricushpaca, pugru Pamba ladoman caj pungullatataj yaicushpa tigrashpa chayarcani.

16Ashtahuanpish mandajcunaca ñuca maiman rishcata, imata rurashcatapish mana yacharcacunachu. Chaicamaca judiocunamanpish, curacunamanpish, alli nishcacunamanpish, mandajcunamanpish, muyundij pircacunata allichinapaj cajcunamanpish imata manaraj huillarcanichu.

17Chaimi cashna nircani:

–Jerusalén muyundij patacunata urmachishcata chai pungucunata rupachishpa chingachishcata ñucanchijpurapi ima shina mana allichipaj cashcataca cancunallataj allimi ricunguichij. Shujtajcuna yanganchishpa asicunalla ama cangapajca, shamuichij ñucahuan tandanacushpa Jerusalén pircata allichishunchij– nircanimi.

18Ñuca Diospaj maqui ñuca jahuapi cashpa ñucapaj allita rurashcatapish, jatun mandaj ñucata imallata nishcatapish tucuita parlajpimi paicunaca:

–C'amachij jatarishpa chai pircata pircashunchij– ninacushpami, tucuicuna fuerzarishpa rurai callarircacuna.

19Chaita uyashpami, horonita Sanbalatpish amonitacunapajta ruraj Tobiaspish, arabiamanta caj Gesempish ñucanchijta chanzata rurashpa yallitaj yanganchishpa cashna nircacuna:

–¿Imatataj ruracunguichijchu imamí? ¿Jatun mandajtachu c'ariyagringuichij imamí?– nircacuna.

20Ashtahuanpish ñucaca:

–Jahua pacha Diosmi ñucanchijtaca ayudanga. Paipajta ruraj ñucanchijca tucuicuna jatarishpa, cai pircacunataca cutin pircashunllami. Cancunaca cai Jerusalenpica, imata ninata, imata ruranata, Jerusalenpi imata yuyarinataca mana charinguichijchu– nircanimi.