PROVERBIOS 21 - Quichua Chimborazo Bible

1Jatun mandajpaj shungutaca,

Mandaj Diosmi paipaj maquipi charicun.

Uchilla larcacunapi yacuta chaupij

shina, pai munashcatami rurachin.

2Tucuicunallatajmi imata rurashpapish,

allitami ruranchij yuyancuna.

Shina cajpipish, Mandaj Diosmi

shungucunataca ricucun.

3Mandaj Diosca cashcata rurashpa

alli yuyaihuan causajpimi, paiman

cushpa rupachishcatapish yalli cushicun.

4Shujtajcunata p'iña ñahuihuan ricunapish,

shungupi jatun tucunapish, Diosta mana

manchana yuyaipish juchami.

5Imatapish alli yuyarishpa chai yuyai

trabajaj runaca causaipaj charintajmi.

Ashtahuanpish yuyarishcahuan ucui jahua

imatapish rurajcunaca, ashtahuan

huajchayashpami catincuna.

6Umashpalla jahuanpi jahuanpi charijyajcunaca,

huañuitami mashcancuna.

Chai charinacunapish samai shina

chingarinllami.

7Mana manchajcunaca cashcata ruranataca,

mana munancunachu.

Paicuna shuhuashpa charishcallatajmi

tucuchinga.

8Millai runapaj causaica, llaqui

japinalla huishtu ñan shinami.

Ashtahuanpish chuya shungu runacuna

rurashcaca allimari.

9Jatun huasipi cashpapish, rimarishpa

p'iñachicujlla huarmihuan causanaca

jatun llaquimi.

Chaipaj randica huasi jahuapi quiquinlla

causanarajmi alli.

10Diosta mana manchaj runaca,

pitapish llaquichinallatami munan.

Pita llaquinataca mana yuyancunachu.

11Mana cazushpa asijcunata macajta

ricushpaca, yachai illaj runapish

yachaisapami tucun.

Yachaisapa runacarin cunajllapitaj,

ashtahuanmi yachashpa catin.

12Diosta mana manchaj runataca,

paipaj juchallatajmi jatun llaquipi

churashpa chingachin.

Chaitaca cashcata ruraj runaca, quiquin

ñahuihuantajmi ricun.

13Huajcha runa caparishpa mañajpi

mana uyajtaca, q'uipata pai

caparijpipish, pi mana uyangachu.

14Imata pacalla camarishcaca yallitaj

p'iñarishcatapish allichinllami.

Chashna imallatapish ugllachishcaca,

mana ricunachicujpipish allipi churanllami.

15Cashcata ruraj runaca allita

rurashcahuanmi cushicun.

Ashtahuanpish chai allica millaita

rurajcunapajca, tucuchij llaquimi

ricurin.

16Alli yuyaihuan causanapaj alli

yachaita saquijca, huañushcacunahuanmi

tandanacugringa.

17Ima shinapish aichapi cushicuj

runaca, imapish illajmi causanga.

Vinotapish, mishquijllata ashnaj

jambicunatapish munajca, manataj

charijyangachu.

18Cashcata ruraj runapaj randica,

Diosta mana manchaj runatami llaqui

japinga.

Allicunapaj randica, mana cazuj

runatami llaqui japinga.

19Manchanayajta p'iñarishpa c'amij

huarmihuan causanapaj randica,

shitashca pambapi quiquinlla causanarajchari

alli canman.

20Yachaisapa runapaj huasipica, sumaj

charinacunapish aceitepishmi tiyan.

Ashtahuanpish ch'ahuan runaca,

yanga tucuchinllami.

21Cashcata ruraj canatapish, llaquij

canatapish mana saquijca, cushi

causaitapish ima allicunatapish

charingami, alli nishcapishmi canga.

22Yachaisapa runaca, c'ari c'aricunatapish

pueblota quichurcallami.

Paicuna shunguta churashca jatun pircatapish

jahualla urmachircallami.

23Maijanpish c'alluta jarcarijca, quiquin

causaitami llaquipi yaicunamanta huaquichin.

24Imata ruranapipish yallitaj jatun

tucushpa c'ari tucujtaca, mana

cazushpa asirij upa runa nincunami.

25Q'uilla runaca imatapish charina

yuyaihuan huañucunllami.

Shina cashpapish maquita mapayachinataca,

mana munanchu.

26Shujcunaca imatapish tucui punlla

munashpallami cainan.

Ashtahuanpish cashcata ruraj runaca,

maquita cacharishpa cungapajpishmi charin.

27Taita Diosca paita mana manchajcuna,

imata cushcataca manataj ricunachinchu.

¡Millai yuyaihuan cushcatacarin

maitataj chasquingari!

28Manapish ricushcata llullashpalla

huillaj runaca huañungatajmi.

Ashtahuanpish uyashcatataj huillajca,

mana llullapi japi tucungachu.

29Diosta mana manchaj runaca ñahuipica,

imata mana rurashcatami ricuchisha nin.

Ashtahuanpish alli runaca imapish

mana llaquipi churanatami ruran.

30Ima alli yachaipish, alli yuyaipish,

alli cunashcapish Mandaj Diospaj munaitaca

mana shujtajyachi tucunchu.

31Macanacui punllaca caballocunatapish

allichirishpami llujshirincuna.

Ashtahuanpish mishanataca, Mandaj Dios

mishachijllapimi mishancuna.