1 SAMUEL 21 - Quichua Chimborazo Bible

Davidca Saulta miticushpa rishcami

1Davidca Ahimelec cura causan Nob puebloman rijpimi, chai curaca mancharishpa tupanaman llujshishpaca:

–¿Ima nishpataj canlla shamungui, manachu pi canhuan shamun?– nishpa tapurca.

2Shina nijpi Davidca, Ahimelec curataca:

–Jatun mandajmi, ñucamanca shuj ruranata rurachun cachashpa cashna nirca: “Pai imata rurachun nishpa cachashcatapish, imata mingashpa cachashcatapish pi ama yachachun” nircami. Chaimi ñucahuan purij runacunahuanpish maipi tupana cashcata ña huillarcani.

3Cunanca ¿imata ña micunallata charinguichu? Pichca tandata, mana cashpaca ima tiyashcallatapish cuhuai– nircami.

4Shina nijpi Ahimelec curaca Davidtaca:

–Maijan maijanpish micuna tandataca mana charinichu. Diospajlla ch'icanchishca tandallatami charini. Chashna cajpipish cambajta rurajcuna huarmicunahuan mana chayarinacushca cajpica cushallami– nircami.

5Chaimi Davidca curataca:

–Mana llullanichu. Cainapish, cainapaj cainapish huarmicunaca ñucanchijmanta carupimi carca. Ñucahuan cajcunaca ñuca llujshimunapajca ñami chuya carca. Caimanca Diospajta rurangapaj mana shamushca cashpapish cunancamacarin ¿maitataj mana ashtahuan chuya cangari?– nircami.

6Chaipica shujtaj tanda mana tiyashcamantami chai curaca Diospajlla ch'icanchishca tandata curca. Chai tandaca Diospaj ñaupajpi caj tandata anchuchina punlla pajtajpi ña anchuchishca tandami carca. Cunanlla cusashca tandata churangapajmi anchuchishca carca.

7Chai punllaca Saulpajta rurajcunamanta shujmi, Mandaj Diospajta rurashpa mana ri tucushca carca. Paica Saulpaj ovejacunata michijcunata mandaj, Edommanta caj Doeg shutimi carca.

8Davidca Ahimelectaca:

–¿Manachu shuj lanzata, mana cashpaca shuj espadata caipi charingui? Jatun mandaj utca ri nijpimari ñuca espadatapish, macanacunacunatapish mana apamui tucurcani– nircami.

9Shina nijpi chai curaca:

–Ela pugru pambapi Goliat filisteota can mishashpa quichushca espadallami caipica, efod huashapi linsohuan pilluchishca tiyacun. Can chaita apasha nishpaca apailla. Caipica ima shujtajca mana tiyanchu chaillami tiyan– nijpimi, Davidca:

–Chaita yalli shujtaj espadaca mana tiyanchu. Chaita cuhuailla– nirca.

10Davidca chaimanta chai punllallataj jatarishpa Saulta miticushpa rishpaca, Gat llajtata jatun mandaj Aquispajmanmi rirca.

11Chaipimi Aquispajta rurajcunaca:

–¿Manachu paica Israelta jatun mandaj David? ¿Manachu paimantaca:

Saulca, 1.000 gentecunatami huañuchishca, Davidca, 10.000 gentecunatami huañuchishca nishpa tushushpa cantarcacuna?– nircacunami.

12Chai yuyailla tucushpami Davidca, Gat pueblota jatun mandaj Aquistaca achcata mancharca.

13Chaimantami Davidca paicunapaj ñaupajpica, yuyai illaj shina tucushpa, paicunapaj chaupipi loco shina tucuj tucushpa, pungucunatapish maipish cachun aspishpa, barbas uritapish ch'uca shutucuj tucurca.

14Chaita ricushpami Aquisca paipajta rurajcunataca:

–Riquichij, cai runaca yuyai illajmari ¿ima nishpataj ñuca ñaupajman pushamunguichij?

15¿Caillapitaj lococunaca illajpichu cai runataca ñuca ñaupajpi loco tucuchun apamunguichij? Cai runaca ñuca huasimanca mana yaicunachu carca– nirca.