2 SAMUEL 15 - Quichua Chimborazo Bible

Absalonca paipaj yaya Davidta quichushpa jatun mandaj tucusha yuyashcami

1Chai q'uipaca cashnami tucurca: Absalonca carrocunayuj, caballocunayujmi tucurca. Paita ñaupashpa purij 50 runacunatapishmi charirca.

2Absalonca utca jatarishpami, puebloman yaicuna pungu c'uchupi shayarishpa, cashna ruraj carca. Maijancuna p'iñanacushcamanta jatun mandaj allichichun paipajman shamujcunataca cayashpami: “¿Maijan pueblomantataj cangui?” nishpa tapuj chai shamujca: “Cambajta ruraj ñucaca Israelpaj aillucunamanta shuj aillumantami cani” nijmi carca.

3Chaimi Absalonca: “Canca cashcata rurachun allitatajmari mañanaman shamucungui. Ashtahuanpish jatun mandajpajman chayajpimari chaita allichijca pi mana tiyan” nijmi carca.

4Absalonca: “Cai llajtapi juez cachun ñucata churajpirajchari p'iñanacuicunata llaquicunata allichichun nishpa ñucapajman tucui shamujtaca, ima shina cashcatataj rurashpa allichiman” nijpishmi carca.

5Maijanpish allillachu cangui nishpa paipajman c'uchuyashpa paipaj ñaupajpi cumurijpica, maquita chutashpa jatarichishpami muchaj carca.

6Llaquicunata allichichun nishpa jatun mandajman shamujcunataca, tucui israelcunatami chashna ruraj carca. Chashnami Absalonca tucui israelcunapaj shunguta shuhuaj carca.

7Ña chuscu huata tucujpimi, Absalonca jatun mandajtaca:

–Ñucami Mandaj Diosman cuna tucushcata cusha nini. Chaitaca Hebronpi cugringapaj cachachunmi rogani.

8Cambajta ruraj ñucaca Siria llajtapi caj Gesur pueblopi cashpami: Mandaj Dios ñucata Jerusalenman tigrachijpica, Mandaj Dios cambajtami rurasha nircani– nircami.

9Chaimi jatun mandajca:

–Shinashpaca, sumajta rilla– nijpi, Absalonca jatarishcahuan Hebronman rirca.

10Absalonca tucui Israel aillucunamanmi: “Trompetapi tocashcata uyashpaca, Hebrontaca Absalonmi mandagrishca nishpa yuyanguichij” nichunmi huillajcunata ñaupachishpa cachashca carca.

11Jerusalenmantaca 200 runacunami Absalón cayashca rircacuna. Paicunaca imapaj cashcata mana yachashpa alli shunguhuanmi rircacuna.

12Absalonca Diosman sacrificiota cungapajca, Gilomanta gilonita Ahitofel runatami cayaj cacharca. Paica Davidman yuyaita cuj runami carca. Paihuan tucushpacarin Absalonca ashtahuanmi jatun mandajta c'ariyanata allichirca. Chaimi Absalonta catijcunapish ashtahuan ashtahuan mirarirca.

Davidca Jerusalenmanta miticushpa rishcami

13Huillashpa purij shuj runa Davidpajman shamushpami: Tucui israelcunamari Absalonpi shunguta churashpa paita caticuncuna– nishpa huillarca.

14Chaimi, Davidca Jerusalenpi paihuan caj paipajta rurajcunataca:

–¡Absalonpaj maquimantaca mana llushpiri tucushunchu! Jacuchij jatarishpa miticugrishunchij. Ñataj utca shamushpa japinman. Utca miticushpa rishunchij. Ñataj tucui ñucanchijta llaquichishpa espadahuan tucuicunata huañuchinman– nirca.

15Jatun mandajpajta rurajcunaca:

–Cambajta ruraj ñucanchijca ñucanchij amo jatun mandaj imata ruranata yuyarishcata rurangapaj caipimi canchij– nircacunami.

16Chashna nijpica jatun mandajca tucui paipaj familiata catichishcami llujshishpa rirca. Jatun mandajca chunga paipaj caishuj huarmicunallatami huasita cuidachun saquishpa rirca.

17Ña llujshishpa rishpaca, jatun mandajca tucui paihuan cajcunandijmi chai pueblomanta carupi ashacama shayarircacuna.

18Tucui paipajta rurajcunami paipaj c'uchupi rircacuna. Cereteocunapish peleteocunapish tucui geteocunapish, Gatmantapacha chaquillahuan shamuj 600 runacunapish jatun mandajta ñaupashcami rirca.

19Chaipimi jatun mandajca, geteocunapura Itai runataca:

–Canca ¿ima nishpataj ñucanchijhuan shamungui? Jatun mandajhuan saquirilla. Canca cambaj llajtamantapish llujshichishpa cachashca, caru llajtamanta shamushcallamari cangui.

20Canca cainallamari shamurcangui. ¿Maitataj ñucanchijhuan rinatajmi cangui nishari? Ñucapish ri tucushca camallami rigrini. Canpish tigrailla. Cambaj huauquicunatapish tigrachishpa rilla. Mandaj Diosca c'uyaj, pajtachij canata cambaj tucui causaipi ricuchichun– nirca.

21Itai runaca jatun mandajtaca:

–¡Taita Diosca causacunmi, jatun mandaj ñuca amopish causacunguimi! Cambajta ruraj ñucaca huañungapajpish, causangapajpish jatun mandaj ñuca amo maipimi can, ñucapish chaipimi casha– nircami.

22Shina nijpi Davidca Itai runataca:

–Shinashpaca ringapaj pasai– nijpimi, geteo Itai runaca tucui paihuan cajcunandij, tucui paipaj familiandij pasarca.

23Tucui chai llajtapi causajcunami caparishpa huacarcacuna. Davidhuan rijcunaca tucuicunami Cedrón yacuta ch'imbarcacuna. Jatun mandajpish ch'imbarcami. Tucuicunami shitashca pambaman rina ñanman ch'imbarcacuna.

24Sadocpish Dioshuan ari ninacushcata huaquichina arcata apaj tucui levitacunandijmi ch'imbarca. Dioshuan ari ninacushca quillcata huaquichina arcataca Abiatarpaj c'uchupi tiyachishpami ch'imbarcacuna. Tucuicuna chai pueblomanta llujshishca q'uipami Abiatarpish chai arca c'uchumanta huichiyarca.

25Jatun mandajca Sadoctaca:

–Taita Diospaj arcataca puebloman tigrachilla. Mandaj Diospaj ñaupajpi ñuca alli ricurishca cajpica, paica ñucata ayudashpa arcatapish, paipaj carpa huasitapish cutin ricuchun tigrachimungami.

26Ashtahuanpish: “Paipi ñuca mana alli ricurishca cajpica, paipi ima shinami alli, chaita rurailla caipimi cani”– nircami.

27Jatun mandajca Sadoc curataca cashnapishmi nirca:

–¿Manachu canca Dios huillachishcata huillaj cangui? Ahimaaspish, Abiatarpaj churi Jonatanpish imata ama manchashpa cancunahuan puebloman tigrachunlla.

28Imalla tucucushcata cancuna ñucaman huillaj cachangacama shitashca pambacunallapimi cagrini– nircami.

29Chaimi Sadocpish, Abiatarpish Diospaj arcataca Jerusalenman tigrachishpa chaipi saquirircacuna.

30Davidca Olivocuna tiyaj huichitami uma ch'ungurishca, lluchu chaquilla huacaihuan huichiyarca. Tucui paihuan cajcunapish tucuicuna uma ch'ungurishcami huacaihuan llujshircacuna.

31Chaipimi Davidmanca: “Ahitofelpish Absalonhuan cajcunahuan tucushpami, canta c'ariyanata allichicuncuna” nishpa Davidman huillarcacuna. Chaimi Davidca: “Mandaj Dioslla Ahitofel allichishcataca chingachihuai” nishpa mañarca.

32Taita Diosta adorangapaj urcu puntaman David chayajpica, arquita, Husai runami paipaj churarishcatapish lliquirishca, umapipish allpata shitarishca tupanaman llujshijpi,

33Davidca:

–Can ñucahuan cajpica, ñucapajca ashtahuan llaquimi canga.

34Canca Jerusalenllamantaj tigrashpa Absalontaca: Jatun mandajlla, ñucaca cambajta rurajmi casha nini. Ima shinami cunancama cambaj yayapajta rurarcani. Chashnallatajmi cunanca cambajta ruraj casha nini nigri. Chashna rurashpami, Ahitofel yuyaita cushcata ruracujtaca chingachingui.

35Sadoc curapish, Abiatar curapish chaipimi canga. Canpish paicunahuan chaipi canguilla. Can chaipi cashpaca jatun mandajpaj huasipi imallata ruracujta uyashpaca, Sadoc curaman, Abiatar curaman huillangui.

36Sadocpaj churi Ahimaaspish, Abiatarpaj churi Jonatanpish chaipimi paicunapaj yayacunahuan canga. Imallata rurasha nicujtaca, paicunaman huillaj cachanguilla– nirca.

37Chaimi Davidhuan alli apanacuj Husai runaca Jerusalenman tigrarca. Pai ña chaiman chayacujpimi, Absalonpish Jerusalenman yaicurca.