APOCALIPSIS 6 - Quichua Chimborazo Bible

Canchis sellashcacunata pascashcami

1Canchis sellashcacunamanta shujtaca Oveja pascajtami ricurcani. Chaita pascajpica, causaiyuj chuscucunamanta shujca, c'ulun nij shina uyarishpami: “¡Shamui ricungui”! nirca.

2Chaita ricushpaca, shuj yuraj caballotami ricurcani. Chai caballopi tiyacujca, caspita shitana shuj arcotami charicurca. Paimanca shuj coronatami curca. Paica ñami mishashca carca. Ashtahuan mishangapajmi llujshirca.

3Puntapaj q'uipa sellashcata Oveja pascajpica, puntapaj q'uipa causaiyujca: “¡Shamui ricungui!” nijtami uyarcani.

4Chaipica shujtaj pucajlla caballomi llujshirca. Chai caballopi tiyacujmanca, shuj jatun espadata cushpami, tucui cai pachapi sumajta causanata anchuchi tucunatapish, caishuj chaishujmanta huañuchinacuipi churai tucunatapish curca.

5Ishquipaj q'uipa sellashcata Oveja pascajpica, ishquipaj q'uipa causaiyujca: “¡Shamui ricungui!” nijtami uyarcani.

Chaita ricushpaca, shuj yana caballotami ricurcani. Chai caballopi tiyacujca, shuj balanzatami maquipi charicurca.

6Causaiyuj chuscupaj chaupimantaca: “Ishqui libra trigoca shuj denariomi valin, sujta libra cebadapish shuj denariomi valin. Chashna cajpipish aceiteta, vinotaca ama imata rurangui” nishpa rimajtami uyarcani.

7Quimsapaj q'uipa sellashcata Oveja pascajpica, quimsapaj q'uipa causaiyujca: “¡Shamui ricungui!” nijtami uyarcani.

8Chaita ricushpaca, shuj quillu caballotami ricurcani. Chai caballopi tiyarishcaca, Huañuchij shutimi carca. Hadespish caticurcami: Paicunamanca cai pachata chuscupi chaupishca shuj partetaca jatun macanacuihuan, yaricaihuan, jatun ungüihuan, cai pachapi millai animalhuan huañuchi tucunatami curca.

9Chuscupaj q'uipa sellashcata Oveja pascajpica, Diospaj shimita huillashcamanta, huillashca shinataj causashcamanta huañuchishcacunapaj almacunatami, altar ucupi ricurcani.

10Paicunaca: “Jatun Dioslla canca jucha illaj, imata rurasha nishcatapish rurajtajmi cangui. Allpapi causajcuna yahuarta jichashpa ñucanchijta huañuchishcamantaca ¿paicunataca maicamataj manaraj llaquichishpa shuyacungui?” nishpami sinchita caparircacuna.

11Chaipica paicunamanca yurajlla churanatami curca. Chaita cushpaca:

–Ashacama samacuichijraj. Cristopajta cancuna shinallataj ruraj crijcunatapish cancunata huañuchishca shinallataj mashnacunata huañuchina cashca pajtangacama shuyaichijraj– nircami.

12Pichcapaj q'uipa sellashcata Oveja pascajpi ñuca ricujpica, cai pachapica jatunta allpa chujchushpami t'imburirca. Intipish llaquihuan cashpa churarina yanajlla churanata churarishca shinami tucurca. Shinallataj lunapish tucuimi, yahuar shina tucurca.

13Jahua pachapi caj luzerocunapish higo yurata huaira cuyuchijpi yuramanta higocuna urmaj shinami luzerocunapish allpa pachaman urmarca.

14Jahua pachapish, quillcana cara pillurij shina pillurishpami anchurirca. Urcucunapish, cucha chaupipi tiyaj allpacunapish tucuimi paicuna tiyacunmanta anchuchishca carcacuna.

15Cai pachata jatun mandajcunapish, jatuncunapish, achcata charijcunapish, soldadocunata mandajcunapish, poderyujcunapish, randishcacunapish, mana randishcacunapish, tucuicunami urcucunapi caj jutcucunapi, rumi chaupicunapi pacatucurcacuna.

16Paicunaca urcucunatapish, c'acacunatapish: “Ñucanchij jahuapi urmaichij, jatun tiyarinapi tiyacujpaj ñaupajmanta, Oveja p'iñarishpa llaquichinamantapish pacahuaichigari.

17Pai p'iñarishpa jatunta llaquichina punllamari ña chayamushca ¿pitaj chai jatun llaquitaca apai tucungari?” nircacunami.