2 CRÓNICAS 17 - Quichua Chimborazo Bible

Judá llajtata Josafat mandashcami

1Asapaj randica paipaj churi Josafatmi, Judá llajtataca mandarca. Paica c'ari c'ari tucushpami, israelcunataca cumurichirca.

2Paica Judá llajtapi caj pueblocunapica, muyundijta jatun pircacunayuj pueblocunapimi soldadocunata churarca. Shinallataj chapaj soldadocunatapishmi Judá llajtapica churarca. Efraín llajtapi caj pueblocunata israelcunata paipaj yaya Asa quichushca pueblocunapipishmi, cuidaj soldadocunata churarca.

3Josafatca mandai callarishpaca, paipaj ñaupa yaya David rurashca shinami Diosta cazushpa allita rurashpa causarca. Baal dioscunataca mana catircachu. Chaimantami Mandaj Diosca paihuan carca.

4Paipaj Diosta catishpami, mana caishuj israelcuna shina causarca. Ashtahuanpish Dios mandashcacunatami cazuj carca.

5Chaimantami Mandaj Diosca, mandanapica pi mana cuyuchipajta charirca. Judá llajtapi causajcunaca tucuicunami ima allicunatapish curcacuna. Chaimantami yallitaj charijpish, tucuicuna alli nishcapish tucurca.

6Mandaj Dios ayudajpimi, Josafatca Mandaj Diospajllata rurashpa causarca. Lomacunapi tiyaj altarcunatapish, Asera huarmi diosman rijchajcunatapish Judá llajtamantaca tucuita anchuchirca.

7Ña quimsa huatata mandacushpami, paipajta ruraj Ben-hail, Abdías, Zacarías, Natanael, Micaías shuti mandajcunataca Judá llajtapi caj pueblocunapi causajcunaman Diosmanta yachachichun cacharca.

8Paicunahuan yachachichunca, Semaías, Netanías, Zebadías, Asael, Semiramot, Jonatán, Adonías, Tobías, Tob-adonías shuti levitacunatami cacharca. Shinallataj Elisama, Joram shuti curacunatapishmi cacharca.

9Tucui paicunami Judá llajtapi causajcunamanca, Mandaj Dios mandashcata quillcashca librota apashpa, tucui pueblocunata purishpa yachachircacuna.

10Chaimantami Judá llajta muyundijpi caj tucui llajtacunapi causajcunaca, Mandaj Diosta yallitaj mancharcacuna. Chaimantami Josafathuan macanacunatapish mancharcacuna.

11Filisteocunaca Josafatmanca convidanacunatapish, impuesto cullquitapishmi curcacuna. Shinallataj arabecunaca animalcunatapish, 7.700 carnerocunatapish, 7.700 c'ari chivocunatapishmi huatanta cujcuna carca.

12Chashna cujpimi Josafatca ashtahuan, ashtahuan charijyashpa alli nishca tucurca. Paica Judá llajtapica torrecunatapish, granocunata huaquichina pueblocunatapishmi rurarca.

13Tucui Judá llajtapimi, achca allicunata charirca. Jerusalenpipish yallitaj c'ari c'ari soldadocunatami charirca.

14Chai soldadocunaca, maijanlla yayacunapaj huahua huahuacuna cashcata ricujpica caicunami: Judá aillupaj huaranga huaranga soldadocunata mandajca, Adnasmi carca. Paica ashtahuan c'ari c'ari, 300.000 soldadocunatami mandaj carca.

15Caishuj mandaj soldadoca, Johananmi carca. Paica, 280.000 soldadocunatami mandaj carca.

16Caishuj mandajca, Zicripaj churi Amasiasmi carca. Paimi Mandaj Diospajta rurangapajca paipaj quiquin munaihuan ari nirca. Paica, 200.000 c'ari c'ari soldadocunatami mandaj carca.

17Benjamín aillumantaca, Eliadami mandaj carca. Paica, 200.000 soldadocunata mandaj, c'ari c'ari mana manchaj soldadomi carca. Chai soldadocunaca arcocunahuan, escudocunahuan allichirishcacunami carca.

18Chaipaj q'uipa mandajca, Jozabadmi carca. Paica macanacungapaj allichirishca, 180.000 soldadocunatami mandaj carca.

19Tucui chaicunami jatun mandaj Josafatpajta rurajcuna carca. Judá llajtallapitajmi, muyundijta jatun pircacunayuj pueblocunapipish cuidaj, shujtaj soldadocunata charirca.