1 REYES 9 - Quichua Chimborazo Bible

Taita Dioshuan Salomonhuan ari ninacushcami(2 Cr 7.11-22)

1Mandaj Diospaj huasitapish, pai mandashpa tiyana huasitapish, pai imalla rurasha nicushcatapish Salomonca ña tucuchircami.

2Mandaj Diosca Gabaonpi ricurishca shinallatajmi Salomonmanca cutin ricurirca.

3Chaipi ricurishpaca Mandaj Diosca: “Ñuca ñaupajpi can mañashcata, rogarishcata uyarcanimi. Cai huasipi ñuca shuti huiñaipaj cachun, can rurashca cai huasitapish ñucapajlla cachun ch'icanchircanimi. Ñuca ñahuicunapish, ñuca shungupish punllantami chai huasipi canga.

4Canca cambaj yaya David shinallataj tucui shunguhuan ñucapajlla tucushpa, imatapish cashcata rurashpa, tucui ñuca imalla rurangui nishcacunata rurashpa, chaitataj pajtachichun nishpa ñuca mandashcata pajtachishpa, pajtachinguitaj nishca shinataj rurashpa ñuca ñaupajpi purijpica,

5israelcunata can mandanataca huiñaipaj cachunmi pi mana cuyuchipajta churasha. Cambaj yaya Davidman: Cambaj huahua huahuapuraca israelcunata mandajca mana illangachu nircanimi. Chai nishca shinallatajmi rurasha.

6Cancunapish, cancunapaj huahua huahuacunapish rumi shungucuna tucushpa ñucamanta anchurishpa ñuca mandashcacunata mana huaquichishpa, chaitataj pajtachichun nishpa cancunaman cushca mandashcacunatapish mana huaquichishpa, ashtahuanpish shujtajcunapaj dioscunapajta rurangapaj rishpa paicunata adorajpica,

7ñuca cancunaman cushca allpamantaca israelcunataca anchuchishami. Ñucapajlla cachun ch'icanchishca cai huasitapish ñuca ñaupajmanta anchuchishami. Chashna rurajpimi israelcunamantaca, tucui cai pachapi causajcunaca yuyachij shimicunata rimashpa asicungallacuna.

8Cai huasica sumaj nishca cashca cashpapish, llaquinayaj siricujta ricushpaca, maijanpish chaita pasajca mancharishpa asishpami: ¿Ima nishpashi Mandaj Diosca cai llajtatapish cai huasitapish chashna rurarca? ningacunami.

9Shina nijpica: Paicunapaj ñaupa yayacunata Egiptomanta llujshichimuj Mandaj Diosta saquishpa, shujtajcunapaj dioscunapajman rishpa paicunapaj maquicunata chutashpa adorashpa, paicunapajta rurashcamantami Mandaj Diosca paicunapaj jahuamanca tucui cai llaquita cachashca ningacunami” nircami.

Salomonca shujtaj ruranacunatapish rurashcami(2 Cr 8.1-18)

10Salomonca Mandaj Diospaj huasitapish, pai mandashpa tiyana huasitapish, ishquindijtami ishqui chunga huatacunapi tucuchirca.

11Chai huasicunata ruranapajca, Tiro llajtata jatun mandaj Hirammi cedro caspicunatapish, ciprés caspicunatapish, curitapish, Salomón mashnata mañashcata apamurca. Chaicunamantaca jatun mandaj Salomonca Galileapi caj ishqui chunga pueblocunatami Hirammanca curca.

12Salomón cushca pueblocunata ricungapajmi jatun mandaj Hiramca Tiromanta shamurca. Chai pueblocunata ricushpaca mana munarcachu.

13Chaimi Hiramca: “Huauqui ¿Cai pueblocunatachu ñucamanca cushcangui imamí?” nircami. Chashna nishpaca chai pueblocuna tiyan llajtataca Cabul shutitami shutichirca. Cunancama chai shutillatajmi.

14Hiramca jatun mandaj Salomonpajca 120 talento curitami cachashca carca.

15Jatun mandaj Salomonca, Mandaj Diospaj huasita, pai mandashpa tiyana huasita rurangapaj, pugru pugrupi allpata jundachichingapaj, Jerusalén muyundij pircatapish rurangapaj, shinallataj Hazor pueblotapish, Meguido pueblotapish, Gezer pueblotapish shayachingapajmi gentecunata tandachishpa mirga mirgata churarca.

16Egiptota jatun mandaj faraonca Gezerman huichiyashpa chai pueblota japishpami, tucui chaipi causaj cananeocunata huañuchishpa chai pueblotaca rupachirca. Chai pueblotaca cazarashcamanta cuna cashcatami paipaj ushushi Salomonpaj huarmiman curca.

17Chaimi Salomonca, Gezer pueblota, ura ladoman caj Bet-horón pueblota,

18Baalat pueblota, shitashca pambapi caj Tadmor pueblotapish allichirca.

19Shinallataj Salomonca paipaj tucui imalla minishtirishcacunata huaquichina pueblocunataca, carrocunata huaquichinapajpish, caballocunapi tiyarij gentecuna causanapajpish, Jerusalenpipish, Libanopipish, tucui pai mandacun llajtacunapimi pai imallata rurasha nishcataca tucuita rurarca.

20Amorreo, heteo, ferezeo, heveo, jebuseo nishcacunapura saquirishcacunatami chashna rurachirca. Paicunaca mana israelcunami carca.

21Chaicunaca israelcuna mana tucuita huañuchishcacunapaj huahua huahuacunami carca. Paicunatami Salomonca tributota cuchishpa sinchita trabajachirca. Chaitaca cunan punllacamami chashna rurachicun.

22Salomonca israelcunataca shujllatapish chashna sinchi trabajocunapica mana churarcachu. Paicunataca macanacuiman rijcuna cachun, paipajta rurajcuna cachun, paipaj q'uipa mandajcuna cachun, soldadocunata mandajcuna cachun, carrocunapi purij soldadocunata mandajcuna cachun, caballopi tiyarij soldadocunata mandajcuna cachunmi churarca.

23Salomonca tucui chaicunapi imallata rurajcunata mandajcuna cachun ricujcuna cachunca 550 mandajcunatami churarca.

24Faraonpaj ushushica Davidpaj pueblomantami Salomón chai huarmipaj rurashca huasiman huichi rirca. Salomonca pugru pugrupipish allpata jundachircami.

25Mandaj Diospaj huasita tucui rurashpaca, Salomonca Mandaj Diospaj pai rurashca altarpimi cada huata quimsa cutin Mandaj Diosman cushpa tucui rupachinatapish, paihuan alli cangapaj sacrificiocunatapish cushpa rupachij carca. Mandaj Diospaj ñaupajpi caj inciensotapish rupachijmi carca.

26Jatun mandaj Salomonca, Puca Cucha uripi caj Elot pueblo c'uchullapi caj Ezión-geber pueblopimi barcocunatapish rurachirca. Chai puebloca Edom llajtapimi carca.

27Hiramca chai barcocunapica mama cuchata alli rijsij barcocunata purichij paipajta rurajcunataca Salomonpajta rurajcunahuanmi cacharca.

28Paicunami Ofir puebloman rishpa chaimantaca, 420 talentota pizaj curita japishpa jatun mandaj Salomonpaj apamurcacuna.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help