ÉXODO 6 - Quichua Chimborazo Bible

1Shina nijpi Mandaj Diosca Moisestaca:

–Faraonta ñuca imata rurajtaca cunanmi ricungui. Ñuca maquihuan sinchita llaquichijpimi paipaj llajtamanta richun saquinga. Ñuca maquihuan sinchita llaquichijpimi pai quiquintaj richun saquinga– nircami.

Diosca Moisestaca cutinllataj faraonhuan rimachun cachashcami

2Taita Diosca Moiseshuan cutin rimashpaca:

–ÑUCACA MANDAJ DIOSMI CANI.

3Abrahamman, Isaacman, Jacobman ricurishpaca Ñucalla Tucuita Rurai Tucuj Dios cashcatami ricuchircani. Ashtahuanpish paicunamanca ñuca shuti, MANDAJ DIOS cashcataca mana huillarcanichu.

4Carumanta shamujcuna shinalla asha punllacunacama paicuna causacushca Canaán llajtata cungapajmi shuj ruranata ari ninacurcani.

5Cunanca israelcunataca cai Egiptopi causajcuna huatashcata shina paicunapajta trabajachicujpi paicuna aij nishcata uyashpami ñuca rurasha nishcataca cunan rurasha nini.

6Chaimanta israelcunataca cashna ni: Ñucaca MANDAJ DIOSMI cani. Egiptocuna yallitaj sinchita trabajachicunmantaca ñucami llujshichisha. Huatashcata shina paicuna cancunata rurachicunmantaca paicuna ima shina cancunata llaquichishca shinallatajmi ñuca rigrata chutashpa paicunatapish llaquichishpa cancunataca cacharichisha.

7Cancunaca ñuca agllashcacuna cachunmi llujshichisha. Ñucaca cancunapaj Diosmi casha. Chashna rurajpimi, Egiptopi yallitaj sinchi trabajocunapi trabajacunmanta llujshichimuj ñucaca Mandaj Diostaj cashcata, cancunapaj Taita Dios cashcata yachanguichij.

8Abrahamman, Isaacman, Jacobman ñuca maquita alzashpa cai llajtataca cancunaman cushatajmi nishca llajtamanmi cancunataca yaicuchisha. Chai llajtataca ñucami cancunapaj quiquin llajta cachun cusha. Ñucaca MANDAJ DIOSTAJMI cani ninmi nigri– nircami.

9Moisesca Dios ima shina nishca shinallatajmi israelcunamanca tucuita huillarca. Ashtahuanpish israelcunaca yallitaj sinchi trabajohuan cashpa, yallitaj llaquihuan cashcamantaca imata mana uyashun nircacunachu.

10Chaimi Mandaj Diosca Moisestaca:

11–Egiptota jatun mandaj faraonpajman yaicushpa, cambaj llajtamanta israelcuna richun saqui nigri– nirca.

12Chaimi Moisesca, Mandaj Diostaca:

–Israelcunapish mana uyancunachu, faraoncarin maitataj uyangari. Ñucaca rimangapajpish c'allu huataricujmari cani– nirca.

13Chaimi Mandaj Diosca:

–Israelcunata imallata nishpa, Egiptota jatun mandaj faraonta imallata nishpa israelcunata Egiptomanta llujshichichun Moisestapish Aarontapish– mandarca.

Moisespaj Aaronpaj ñaupa yayacunapaj shuticunami

14Paicunapaj ñaupa yayacunamanta mirarishca quiquinpurallata mandajcunaca caicunami: Yaya Israelpaj punta churi Rubenpaj churicunaca: Hanoc, Falú, Hezrón, Carmi shuticunami carca. Rubén aillumantaca chaicunami carca.

15Simeonpaj churicunaca: Jemuel, Jamín, Ohad, Jaquín, Zohar, Saúl shuticunami carca. Saulca cananea huarmipaj churimi carca. Simeonpaj ailluca chaicunami carca.

16Levipaj churicunapaj huahua huahuacunaca caicunami: Gersón, Coat, Merari shuticunami. Levica 137 huatacunatami causarca.

17Gersonpaj churicunaca paicunapaj familiacuna ima shina cashca shinallataj: Libni, Simei shuticunami carca.

18Coatpaj churicunaca: Amram, Izhar, Hebrón, Uziel shuticunami carca. Coatca 133 huatacunatami causarca.

19Meraripaj churicunaca: Mahli, Musi shuticunami carca. Levipaj huahua huahuacunamanta mirarishcacunaca tucui chaicunami carca.

20Amramca paipaj tía Jocabedtami paipaj huarmi cachun japirca. Jocabed huarmipaj huahuacunami Aaronpish, Moisespish carca. Amramca 137 huatacunatami causarca.

21Izharpaj churicunaca: Coré, Nefeg, Zicri shuticunami carca.

22Uzielpaj churicunaca: Misael, Elzafán, Sitri shuticunami carca.

23Aaronca Aminadabpaj ushushi Elisabettami paipaj huarmi cachun japirca. Elisabetca Naasonpaj panimi carca. Elisabetca Nadab, Abiú, Eleazar, Itamar shuti churicunatami huacharca.

24Corepaj churicunaca: Asir, Elcana, Abiasaf shuticunami carca. Corepaj huahua huahuacunaca tucui chaicunami carca.

25Aaronpaj churi Eleazarca, Futielpaj ushushicunapuramanta shuj ushushitami paipaj huarmi cachun japirca. Chai huarmimi Finees shuti churita huacharca. Tucui chai levitacunami paicunapaj quiquin ñaupa yayacunapaj huahua huahua huasi ucupuracunata mandajcuna carca.

26Aaronpish, Moisespish tucui chai huahua huahuacunapurallatajmi carcacuna. Paicunatami Mandaj Diosca: “Cancunami Egipto llajtamantaca israelcunataca soldadocunata shina mirga mirgata ch'icanchishpa llujshichinguichij” nircami.

27Chai Moisesmi, chai Aaronmi Egipto llajtamanta israelcunata llujshichingapajca, chai llajtata jatun mandaj faraonhuan rimarcacuna.

Diosca Moisestapish Aarontapish ashtahuan mandashcami

28Mandaj Dios Egipto llajtapi Moisesta rimashpaca:

29–Ñucaca MANDAJ DIOSMI cani. Ñuca tucui imallata canman nishcata Egipto llajtata jatun mandaj faraonman huillagri– nircami.

30Shina nijpimi Moisesca:

–Mandaj Dioslla, ñucaca rimangapajca c'allu huataricujmari cani. ¿Maitataj faraonca ñucataca uyahuangari?– nirca.