1 CRÓNICAS 11 - Quichua Chimborazo Bible

Davidtaca tucui Israel aillucunata jatun mandaj cachun churashcami(2 S 5.1-5)

1Tucui Israel aillucuna Hebronpi Davidhuan tandanacushpaca: “Caipi cajcunaca tucuicunami cambaj tullu, cambaj aicha canchij.

2Saúl ñucanchijpaj jatun mandaj cajpipish, israelcunataca canmari macanacuiman pushaj carcangui. Canllatajmari tigrachimuj carcangui. Mandaj cambaj Diosmi cantaca: Canmi ñuca agllashca tucui israelcunataca michingui. Ñuca agllashca israelcunataca canmi mandangui nishcami” nircacunami.

3Israelcunata tucui cunaj yuyajcunapish Hebronmanmi jatun mandajpajman shamurcacuna. Chaipimi jatun mandajca paicunahuanpish Hebronpica Mandaj Diospaj ñaupajpi ari ninacurcacuna. Chaipimi paicunaca Mandaj Dios Samuelta huillachishca shinallataj israelcunata jatun mandaj cachun Davidtaca aceitehuan churarcacuna.

Davidca sinchi pircayuj Sión pueblota japishcami(2 S 5.6-10)

4Chai q'uipaca Davidca tucui israelcunandijmi Jebús nishca Jerusalenman rirca. Chaipica jebuseocunami causacurcacuna.

5Jebuspi causajcunaca Davidtaca: “Caimanca mana yaicunguichu” nircacunami. Shina nicujpipish Davidca, sinchi pircayuj Siontaca paimi japirca. Chai puebloca cunanca Davidpaj pueblomi.

6Chaipimi Davidca: “Jebuseocunahuan macanacungapaj maijanpish ñaupashpa rishpa mishajtaca uma cachun, soldadocunata mandaj cachunmi churasha” nirca. Shina nijpimi, Sarvia huarmipaj churi Joabca ñaupashpa rishpa macanacunaman huichiyarca. Chaimantami paitaca, soldadocunata mandaj cachun churarca.

7Davidca sinchi pircayuj pueblopimi causarca. Chaitaca: “Davidpaj pueblo” nishpami shutichirca.

8Chai pueblo muyundijtaca pugru pugrupi allpata jundachishcamanta callarishpaca, chai pueblo muyundij jatun pirca c'uchucamami pueblota rurachirca. Caishuj mirga pueblotaca, Joabmi allichirca.

9Tucuita Mandaj Diosca Davidhuanmi carca. Davidca tucuipimi ñaupajman rirca. Tucuicuna jatunyachishcami carca.

Davidpaj c'ari c'ari soldadocunami(2 S 23.8-39)

10Davidpaj c'ari c'ari soldadocunaca caicunami: Paicunami tucui israelcunahuan shujlla tucushpa Davidtaca jatun mandaj cachun churashpa paipaj mandanapi ayudarcacuna. Mandaj Dios nishca shinallatajmi rurarcacuna.

11Davidpaj c'ari c'ari runacunaca caicunami: Hacmonipaj churi Jasobeam, paica quimsa chunga c'ari c'aricunata pushajmi carca. Paimi shuj cutinca paipaj lanzahuan 300 soldadocunata huañuchirca.

12Paipaj q'uipaca, ahohitapuramanta Dodopaj churi Eleazarmi carca. Paipish chai quimsa ashtahuan c'ari c'aricunapurami carca.

13Eleazarca Davidhuanmi Pas-damim pambapi carca. Chai pambapica filisteocunami israelcunahuan macanacungapaj tandanacushca carca. Chaipica shuj mirga allpa cebadahuan jundami tiyarca. Chai macanacuimanta israelcuna filisteocunapaj ñaupajmanta miticushpa callpajpimi,

14Davidhuan Eleazarhuanca chagra chaupipi shayarishpa macanacushpaca filisteocunata misharcacuna. Mandaj Diosmi paicunataca jahualla mishachirca.

15Quimsa chunga mandajcunamanta quimsami Adulam jutcupi Davidhuan tupangapaj chai c'acacunaman uriyamurcacuna. Filisteocunapaj carpa huasicunaca Refaim pugru pambapimi carca.

16Chaimi Davidca sinchi jutcupi miticushca carca. Filisteocunapaj cuidaj soldadocunami Belenpi carca.

17Chaipi David yacunaihuan huañucushpami: “¡Belén pueblo pungu c'uchupi tiyaj pugyumanta yacuta maijan apamushpa ubyachijpichari alli caiman!” nirca.

18Shina nijpimi, chai quimsa c'ari c'ari runacunaca filisteocunapaj carpa huasi chaupita rishpa, Belén pueblo pungu c'uchupi tiyaj pugyu yacuta llujshichishpa japishpa Davidpajman apamurcacuna. Ashtahuanpish Davidca mana ubyasha nircachu. “Cai yacutaca Mandaj Diosmanmi cuni” nishpa tallishpami:

19“Cai yacuta ñuca ubyanamantaca Mandaj Dios huaquichichun. Cai runacunaca paicunapaj causaita cushpa apamugrishca yacuta ubyashpaca, paicunapaj yahuarta ubyashca shinami canga” nishpami mana ubyasha nirca.

Chai quimsa c'ari c'ari runacunami yacutaca apamurcacuna.

20Sarviapaj churi Joabpaj huauqui Abisaica, soldadocunata mandaj quimsa chungacunata mandajmi carca. Paipaj lanzahuan 300 runacunata huañuchijmari paica. Chaimantami paica chai quimsa runacuna shinallataj alli nishca tucurca.

21Tucui caishujcunata yalli c'ari c'ari cashcamantami, chai quimsa chunga c'ari c'aricunata mandaj canata chasquirca. Chashna cashpapish, puntapi caj caishuj quimsa c'ari c'aricuna shinatajca manataj cai tucurcachu.

22Chai q'uipaca Joiadapaj churi Benaiami carca. Joidaca Cabseel pueblopi causaj imatapish mana manchashpa c'ari c'ari rurajmi carca. Benaiaca moabcunapaj ishqui leoncunatami huañuchirca. Rasucui punlla shuj jutcuman yaicushpapish shuj leontami huañuchirca.

23Paillatajmi ishqui metro ishqui chunga cintímetro altota charij egipcio runatapish huañuchirca. Egipcio runaca ahuana telarpaj pilluna caspi shina racu shuj lanzata aisashcami carca. Benaiaca shuj caspihuan egipcio runapajman uriyashpaca chai lanzata quichushpami, paipaj quiquin lanzallahuantaj huañuchirca.

24Chashna rurashpami Joiadapaj churi Benaiaca quimsa c'ari c'ari runacunamanta alli nishca tucurca.

25Paica quimsa chungacunata yalli alli nishca tucushpapish, puntapi caj caishuj quimsa c'ari c'aricuna shinatajca mana cai tucurcachu. Paitaca Davidca paita cuidajcunata mandaj cachunmi churarca.

26C'ari c'ari caj soldadocunaca caicunami: Joabpaj huauqui Asaelpish, Belenmanta caj Dodopaj churi Elhananpish,

27haroditapuramanta caj Samotpish, pelonitapuramanta caj Helespish,

28tecoitapuramanta caj Iquespaj churi Ira runapish, anatotitapuramanta caj Abiezerpish,

29husatitapuramanta caj Sibecaipish, ahohitapuramanta caj I-laipish,

30netofatitapuramanta caj Maharaipish, netofatitapurallamantataj caj Baanapaj churi Heledpish,

31Benjaminpaj huahua huahuapura Gabaamanta caj Ribaipaj churi Itaipish, piratonitapuramanta caj Benaiapish,

32Gaas jatun yacu c'uchumanta caj Huraipish, arbatitapuramanta caj Abielpish,

33barhumitapuramanta caj Azmavetpish, saalbonitapuramanta caj Eliabapish,

34gizonitapuramanta caj Hasempaj churicunapish, araritapuramanta caj Sagepaj churi Jonatanpish,

35araritapuramanta caj Sacarpaj churi Ahiampish, Urpaj churi Elifalpish,

36mequermanta caj Heferpish, pelonitapuramanta caj Ahiaspish,

37carmelmanta caj Hezronpish, Ezbaipaj churi Naaraipish,

38Natanpaj huauqui Joelpish, Hagraipaj churi Mibharpish,

39amonitapuramanta caj Selecpish, Sarviapaj churi Joabpaj escudota apaj beerotitapuramanta caj Naharaipish,

40itritapura caj Ira runapish, chai pueblollamantataj caj Garebpish,

41heteopuramanta caj Uriaspish, Ahlaipaj churi Zabadpish,

42rubenitacunata mandaj rubinitapuramanta caj Sizapaj churi Adinapish paihuan caj quimsa chunga runacunapish,

43Maacapaj churi Hananpish, mitnitamanta caj Josafatpish,

44astarotmanta caj Uziaspish, aroermanta caj Hotampaj Sama, Jehiel shuti churicunapish,

45Simripaj churi Jediaelpish, tizmanta caj Johapaj huauquipish,

46mahavitapuramanta caj Elielpish, Elnaampaj Jerebai, Josavía shuti churicunapish, moabmanta caj Itmapish,

47mesobamanta caj Eliel, Obed, Jaasiel shuti runacunapishmi chashna c'ari c'ari runacuna carcacuna.