2 REYES 8 - Quichua Chimborazo Bible

Sunamita huarmi filisteocunapaj llajtamanta tigrashcami

1Eliseoca, pai causachishca huambrapaj mamataca: “Mandaj Diosca cai llajtamanca yaricaitami cachagrin. Chai yaricaica canchis huatatami tiyanga. Chaimanta canpish, cambaj familiandij caimanta llujshishpa, maijan caishuj llajtacunapi causagri” nircami.

2Chai huarmica Diospaj runa nishca shinallataj rurashpami, jatarishpa paipaj tucui familiacunandij rishpaca filisteocunapaj llajtapi canchis huatata causarca.

3Canchis huatacuna q'uipami chai huarmica filisteocunapaj llajtamanta paipaj llajtaman tigrashpaca: “Ñuca huasita, ñuca allpacunata tigrachihuai” ningapaj jatun mandajpajman rirca.

4Pai manaraj chayajpimi, jatun mandajca Diospaj runapajta ruraj Giezi runataca: “Mancharina allicunata Eliseo rurashcata parlai” nishca carca.

5Shina nijpi Giezi runa jatun mandajman shuj huarmipaj churita Eliseo causachishcata parlacujpirajmi, pai parlacushca huarmica paipaj huasita, paipaj allpacunata tigrachichun ningapaj jatun mandajpajman chayajpi Giezi runaca:

–Jatun mandaj ñuca amito, cai huarmitajmari carca. Paipaj churi cai huambratamari Eliseoca causachirca– nishpa huillarca.

6Chaimi jatun mandaj chai huarmita tapujpi tucui ima shinalla cashcata ña parlajpi, jatun mandajca paipajta ruraj shuj runataca: “Cai huarmipaj tucui imalla cashcata cai llajtamanta pai llujshishca punllamanta cunancama chai allpacunapi imalla p'ucushca granocunamantapish tucuita tigrachichun mandai” nirca.

Hazaelca Siria llajtata jatun mandaj tucushcami

7Chai q'uipaca Eliseoca, Damascomanmi rirca. Chaipica Siria llajtata jatun mandaj Ben-adad ungushca cajpimi, paimanca: “Diospaj runamari caiman shamushca” nishpa huillarcacuna.

8Chaimi jatun mandajca Hazaeltaca:

–Diospaj runata imallahuanpish tupagri. Paitaca cai ungüimanta ñuca alliyana cashcata, mana alliyana cashcata Mandaj Diosta tapuchun ningui– nishpa mandarca.

9Shina nijpimi Hazaelca, Damascopi imalla tiyashcata japishpaca chuscu chunga camellocunapi apachishpa Eliseohuan tupangapaj rirca. Paipajman chayashpaca:

–Siria llajtata jatun mandaj Ben-adadca, cambaj quiquin churi shinami. Paimi: Cai ungüimantaca ¿alliyashachu, manachu alliyasha? nishpa tapunaman cachan– nircami.

10Chaimi Eliseoca:

–Ungüimantaca alliyanguimi. Alliyashca cashpapish huañungallatajmi ninmi, Mandaj Diosca nigri– nirca.

11Shina nishpaca, Diospaj runaca Hazaeltaca ñahui pucayashpa pingai tucungacamami ricurashpa saquirirca. Chai q'uipaca Diospaj runaca huacarcami.

12Hazaelca Eliseotaca:

–Ñuca amito ¿ima nishpataj huacangui?– nijpimi Eliseoca:

–Israelcunata can llaquichinata yachashcamantami huacani. Torrecunataca canmari rupachingui, q'uipa huiñaicunatapish espadahuanmi huañuchingui. Huahuacunatapish pircacunapi huajtashpami huañuchingui, chichu huarmicunatapish huijsatamari lliquingui– nirca.

13Shina nijpi Hazaelca:

–Cambajta ruraj ñucaca allcu shina yangallami cani. Maitataj chai jatun llaquitaca rurashari– nijpimi Eliseoca:

–Mandaj Diosca Siria llajtata jatun mandaj can tucunatamari ricuchin– nirca.

14Eliseopajmanta Hazael paipaj amopajman shamujpimi, jatun mandajca:

–Eliseoca ¿imatataj nin?– nijpi Hazaelca:

–Ungüimantaca alliyanguitajmi ninmi– nirca.

15Chai cayandij punllaca Hazael shuj linsota japishpa yacupi shutujyachishpa jatun mandaj Ben-adadpaj ñahuipi churajpimi, paica huañurca. Ben-adadpaj randica Hazaelmi mandaj tucurca.

Judá llajtata Joram mandashcami(2 Cr 21.1-20)

16Acabpaj churi Joram ña pichca huatata israelcunata mandacujpimi, Josafatpaj churi jatun mandaj Joramca, Judá llajtata mandai callarirca.

17Joramca mandai callarinapajca quimsa chunga ishqui huatayujmi carca. Paica pusaj huatatami Jerusalenpi mandarca.

18Joramca Israel llajtata jatun mandajcuna millaita rurashca ñancunallapitajmi purirca. Paipaj huarmi Acabpaj ushushi cashcamantaca, Acabpaj familiacuna millaita rurashca shinallatajmi Mandaj Diospaj ñaupajpica millaita rurarca.

19Mandaj Diosca paipajta ruraj Davidta c'uyashcamanta, cambaj huahua huahuacunamanca huiñaipajmi lamparata churasha nishpa ari nishca carca. Chaimantami paicuna mana alli cajpipish, Judá llajtapi causajcunataca mana chingachisha nirca.

20Judá llajtata Joram mandacujpimi, Edom llajtapi causajcunaca judacuna mandacunmanta cachariringapaj c'ariyashpa jatarircacuna. Paicunapurallamantatajmi quiquin mandajtapish churarcacuna.

21Joramca paipaj tucui carrocunandijmi Zair puebloman rirca. Pai chaipi cajpimi edomitacunaca chai pueblo muyundijta shayarircacuna. Chaimi Joramca carro soldadocunata mandajcunandij tuta jatarishpa edomitacunata paicunapaj carpa huasicunaman callpachircacuna.

22Chashna rurajpipish, edomitacunaca, Judá llajtata jatun mandajpaj maquimanta cacharirishpami, cunancama chashna causacuncuna. Libnapi causajcunapish chai huatallatajmi c'ariyashpa jatarircacuna.

23Joram imalla rurashcata, tucui pai imalla rurashcacunata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

24Joram paipaj yayacunahuan dormijpica, Davidpaj pueblopimi paipaj ñaupa yayacunapaj c'uchullapitaj churarca. Jorampaj randica paipaj churi Ocoziasmi mandarca.

Judá llajtata Ocozías mandashcami(2 Cr 22.1-6)

25Acabpaj churi jatun mandaj Joram israelcunata ña chunga ishqui huatata mandacujpimi, Judá llajtataca Jorampaj churi jatun mandaj Ocozías mandai callarirca.

26Ocoziasca mandai callarinapajca ishqui chunga ishqui huatayujmi carca. Paica shuj huatatami Jerusalenpi mandarca. Paipaj mamaca, israelcunata jatun mandaj Omripaj nieta Atalía shutimi carca.

27Ocoziasca Acabpaj familiapaj ñanllapitajmi purirca. Acabpaj huasi familiacuna millaita rurashca shinallatajmi Mandaj Diospaj ñaupajpica millaita rurarca. Acabpaj huasi familiapaj yerno cashcamantami cashna rurarca.

28Ocoziasca, Acabpaj churi Joramhuan tucushpami, Siria llajtata jatun mandaj Hazaelhuan macanacungapaj Galaadpi caj Ramotman rirca. Chaipimi siriocunaca Joramta chugrichircacuna.

29Jatun mandaj Joramca, Ramot ch'imbapurapi Siria llajtata jatun mandaj Hazaelhuan macanacuipi siriocuna chugrichishca chugricunata jambiringapajmi Jezreelman tigrarca. Chaimi Jorampaj churi Judá llajtata jatun mandaj Ocoziasca Acabpaj churi Joramta pai ungushca cajpi Jezreelpi ricunaman uriyarca.