1 CRÓNICAS 19 - Quichua Chimborazo Bible

Amonitacunata siriocunata David mishashcami(2 S 10.1-19)

1Tucui chaicuna q'uipaca, amonitacunata jatun mandaj Nahasmi huañurca. Paipaj randica paipaj churimi mandarca.

2Chaimi Davidca: “Ñucami Nahaspaj churi Hanunhuanca, paipaj yaya ñucahuan alli cashca shinallataj paihuanpish llaquishcata ricuchigrini” nishpami paipaj yaya huañushcamanta cushichingapaj Davidca paipajta ruraj maijancunata cacharca. Davidpajta rurajcuna amonitacunapaj llajtaman Hanunta cushichinaman chayajpica,

3chai llajtata q'uipa mandajcunaca jatun mandaj Hanuntaca: “¿Cambaj yuyaipica Davidca paipajta rurajcunata cachashpaca cambaj yaya huañushcamanta canta cushichichun cachashcatachu yuyangui? ¿Manachu Davidpajta rurajcunaca can ima shina cashcata purij shinalla ricunaman, tapunaman, cai llajtata rijsinaman shamushca canga?” nircacunami.

4Shina nijpimi Hanunca, Davidpajta rurajcunata japishpa shuj lado barbasta tucui raspashpa, churanacunatapish shuj lado uritaca siqui patacama lliquishpa paicunataca tigrachishpa cacharca.

5Paicuna tigrajpica paipaj runacunata imallata rurashpa cachashcata Davidman yachaj chayachijpimi, paicunaca yallitaj pingaihuan cana cashcata yachashpa jatun mandajca maijancunata tupanaman cachashpaca: “Cutinllataj barbas huiñangacama Jericopi saquirichij. Barbas huiñajpica tigramunguichijllami” ninaman cacharca.

6Amonitacunapish, jatun mandaj Hanunpish chaimanta David paicunahuan p'iña cashcata yachashpami, Mesopotamiapi causaj, Siriapi causaj, Maacapi causaj, Sobapi causaj, caballocunapi tiyarij gentecunatapish, carrocunatapish, pagashpa pushamuchun 1.000 talento cullquita cacharcacuna.

7Chaimi paicunaca 32.000 carrocunatapish, jatun mandaj Maacatapish, paipaj tucui soldadocunandij japirca. Paicuna shamushpaca Medeba ch'imbapurapimi carpa huasicunata shayachishpa tiyarircacuna. Amonitacunapish paicunapaj pueblocunamanta llujshishpa paicunahuan tandalla tucushpami macanacunaman shamurcacuna.

8Chaita David uyashpaca, c'ari c'ari tucui soldadocunahuanmi Joabta cacharca.

9Amonitacunaca macanacungapaj llujshishpaca, israelcunapaj puebloman yaicuna pungullapimi macanacunalla tucushpa shayarircacuna. Paicunahuan shamuj jatun mandajcunapish shujtaj pambapimi carcacuna.

10Joabca ñaupaj ladomantapish, huasha ladomantapish amonitacuna quimimugrijta ricushpami, israelcunapuramantaca ashtahuan alli soldadocunata agllashpa siriocunahuan macanacungapaj macanacunalla tucushpa shayarirca.

11Caishuj soldadocunataca amonitacunahuan macanacunallata rurashpa shayachishpami, paipaj huauqui Abisaiman cushpa cashna nirca:

12“Siriocuna ñucata mishagrijpica, can ayudanaman shamungui. Amonitacuna canta mishagrijpica, ñucami canta ayudanaman shamusha.

13Taita Diospaj agllashcacunamanta ñucanchij pueblomantaca c'ari c'ari cailla, c'ari c'ari cashunlla. Mandaj Dios paipaj ima shina alli canapaj rurachunlla” nircami.

14Shina nijpi, Joabca paihuan caj israelcunahuanmi siriocunahuan macanacungapaj c'uchuyagrirca. Ashtahuanpish siriocunaca paicunapaj ñaupajmanta miticushpa rircallacunami.

15Amonitacunaca siriocuna miticushpa rijta ricushpaca, paicunapish Joabpaj huauqui Abisaipaj ñaupajmanta miticushpa rishpami, puebloman yaicurcacuna. Chai q'uipaca Joabca, Jerusalenman tigrarcallami.

16Siriocunaca israelcuna paicunata mishajpimi Éufrates yacu chaininij llajtapi causaj siriocunata cutinllataj pushanaman cacharca. Chaicunata mandajca Hadad-ezerpaj soldadocunata mandaj Sofacmi carca.

17Chaita Davidman huillajpica, tucui israelcunata tandachishpami Jordán yacuta ch'imbashpa paicunapajman shamurca. Chaipimi paicunataca macanacunalla tucushpa shayarichun mandarca. Macanacunalla tucushpa shayarishca soldadocunata macanacuichij nishpa David mandajpimi, paicunaca siriocunahuan macanacurcacuna.

18Ashtahuanpish siriocunaca israelcunapaj ñaupajmantami miticushpa callparca. Chaipica Davidca carrocunapi caj 7.000 soldadocunata, chaquillahuan purij 40.000 soldadocunatami huañuchirca. Soldadocunata mandaj Sofactapishmi huañuchirca.

19Hadad-ezerta ayudanaman shamujcunaca israelcuna mishajpimi, paicunaca Davidhuan alli tucushpa paipajta rurajcuna tucurcacuna. Chaimanta pachami siriocunaca amonitacunataca mana ayudashun nircacuna.