JUECES 18 - Quichua Chimborazo Bible

Dan aillu runacunaca Micaiapaj curata apashcami

1Chai punllacunapica Israelpica, jatun mandajca mana tiyarcachu. Chai punllacunallatajmi Danpaj ailluca paicuna causanapaj allpata mashcacurcacuna. Paicunaca chai punllacama Israel aillupurapica paicuna quiquinpajtatajca allpataca manaraj charircacunachu.

2Chaimi Danpaj ailluca paicunapuramanta pichca runacunata cacharca. Llajtata alli ricushpa rijsishpa tigramugrichunmi Zora, Estaol shuti pueblocunamanta c'ari c'ari runacunata cacharca. Paicunataca richij llajtata alli rijsishpa tigramugrichij nishpa cachajpimi, chai runacuna Efraín urcuman rishpa, Micaía runapaj huasiman chayashpa chai tutaca chaipi pacarircacuna.

3Micaiapaj huasiman c'uchuyacushpa chai levita mosopaj rimaita rijsishpami ña chaiman chayashpaca:

–¿Pitaj caimanca cantaca pushamurca? ¿Imatataj caipica ruracungui? Caipica canca ¿imatataj charingui?– nircacuna.

4Chaimi levitaca: Micaiahuan paihuan ima shina ari ninacushcata, Micaiapaj cura cachun churashcatapish parlarca.

5Shina nijpi chai runacunaca:

–Ñucanchij maiman ricunmanca allichu chayashun, chaimantaca allichu tigrashun chaita yachangapaj Jatun Diosta tapui– nircacuna.

6Chaimi chai curaca:

–Ama imata manchashpa richijlla. Tucui ñanpimi cancunataca Dios cuidanga– nirca.

7Pichca runacuna chaimanta llujshishpaca Lais pueblomanmi chayarcacuna. Chaipi causajcunataca, Sidonpi causajcuna shinallataj imata mana manchashpa, q'uilla causacujtami ricurcacuna. Chai Lais pueblopi causajcunaca pi mana p'iñachishca, imapish mana illaj sumajtami causacurcacuna. Sidón pueblomantapish carupimi carca. Shujtaj pueblocunapi causajcunahuanpish imata ruranapi ari ninacushcaca mana carcachu. Mandajtapish mana charircacunachu.

8Chai pichca runacuna Zora, Estaol shuti pueblocunapi causacuj paicunapaj huauquicunapajman tigrajpica paicunaca:

–¿Ima alli yacharinchu?– nishpa tapujpimi tigramujcunaca:

9–Jatarichij, paicunahuan macanacungapaj huichi rishunchij. Mana imata rurashpa ama tiyacuichijllachu. Ama q'uilla caichijchu. Chai llajtata quichushpa ñucanchijpajtaj cachun japingapaj jacuchij. Chai llajtaca sumajmari cashca.

10Ña rishpaca ima tucunata mana yuyashpa causacujcunapajman achca allpacuna tiyan llajtamanmi chayanguichij. Tucui imapish tiyaj ima mana illaj llajtataca Diosca ñucanchij maquipimari churashca– nircacunami.

11Shina nijpica, Zora, Estaol shuti pueblocunapi causaj Danpaj ailluca macanacunacunata aparishcami, 600 runacuna llujshircacuna.

12Paicuna rishpaca Judapi caj Quiriat-jearim pueblo c'uchupimi carpa huasicunata shayachishpa tiyarircacuna. Chaimantami chai pambataca “Danpaj aillupaj carpa huasicuna shayana pamba” nincuna. Chai pambaca Quiriat-jerarimmantaca inti huashicun ladomanmi carca.

13Chaimantaca Efraín urcuman rishpami, Micaía runapaj huasiman chayarcacuna.

14Chaipimi Lais pueblota ricushpa rijsishpa tigraj pichca runacunaca paicunapaj huauquicunataca:

–Jalachij, cai huasipica shuj efodpish, terafín nishca dioscunapish, caspita labrashpa chai jahuata cullquita yacuyachishcahuan llihuishpa imamanpish rijchaj diospishmi tiyan. Chaitaca imata ruranata yuyarichij– nircacuna.

15Micaiapaj huasipi causacuj, levita mosopajman chayashpaca allillachu cangui nishpami tapurcacuna.

16Dan aillupaj 600 runacunapish macanacunalla, macanacunacunatapish apashcami, chai huasi pungupi shayacurcacuna.

17Llajtacunata ricunaman rij pichca runacuna huichiyashpa yaicushpaca, caspita labrashpa chai jahuataca cullquita yacuyachishcahuan llihuishpa imamanpish rijchaj diostapish, efodtapish, terafín nishca dioscunatapishmi japircacuna. Chaicamaca levita curaca macanacunalla, macanacunacunatapish apashca 600 runacunahuanmi pungu yaicunpi shayacurca.

18Micaía runapaj huasiman chai runacuna yaicushpaca, caspita labrashpa chai jahuataca cullquita yacuyachishcahuan llihuishpa imamanpish rijchaj diostapish, efodtapish, terafín nishca dioscunatapish llujshichicujta ricushpami chai curaca:

–Cancunaca ¿imatataj ruracunguichij?– nirca.

19Chaimi paicunaca:

–Maquihuan shimita taparishpa upajlla cai. Canca ñucanchij yayapish, ñucanchij curapish tucungui, ñucanchijhuan jacu. Shuj runapaj huasillapi cura canapaj randica, israelcunapurapi shuj aillupaj cura cana canpica ¿manachu alli?– nircacuna.

20Chai curapaj shunguca cushicushpami, efodtapish, terafín nishca dioscunatapish, imamanpish rijchaj diostapish apashpa Danpaj ailluhuan rirca.

21Danpaj ailluca huahuacunata, animalcunata, imalla apacushcacunata paicunapaj ñaupajman churashpami chaimanta rircallacuna.

22Micaía runaca paipaj huasimanta ña caruta rishcapimi, paipaj c'uchullapi causaj runacunata tandachishpa Danpaj ailluta catishpa rirca.

23Caparishpa caticujpimi Danpaj aillu tigrarishpaca, Micaía runataca:

–¿Imapajtaj cai gentecunataca tandachircangui?– nircacuna.

24Chaimi Micaiaca:

–Cancunaca ñuca rurashca dioscunatapish, ñuca curatapish apashpamari shamushcanguichij. Chashna rurashpa ima illajta saquimushca jahuamari ñucataca ¿imataj tucungui? nishpa tapunguichij– nirca.

25Danpaj aillupish:

–Ñucanchijtaca ama caparishpa catichijchu, ñataj ñucanchijpuramanta maijan yallitaj p'iñarishpa cantapish, cambaj huasi ucupuracunatapish huañuchinman– nircacunami.

26Danpaj ailluca paicuna maiman ricushcaman rircallami. Micaía runapish paicuna yalli c'ari c'ari cajta ricushpaca tigrashalla nishpa paipaj huasiman tigrarcallami.

27Danpaj ailluca Micaía runa imalla rurashcacunatapish apashca, paipaj curatapish pushashcami, Lais puebloman chayarcacuna. Chaipica ima tucunata mana yuyashpa causacujcunata japishpami espadahuan huañuchishpa pueblotapish rupachircacuna.

28Paicunaca Sidonmantapish carupi, maijan pueblohuan imata ruranapi mana ari ninacushca pi mana mitsaipaj cajpimi chashna huañuchirca. Paicunaca chai pueblota cutin shayachishpami chaipica paicuna causarcacuna. Lais puebloca Bet-rehob pueblo c'uchupi tiyaj pugru pambapimi carca.

29Chai pueblotaca ñaupaman Lais shuti cashca cajpipish, paicunaca Dan shutitami shutichircacuna. Paicunapaj ñaupa yayaca Israelpaj churi Dan shutimi carca. Chai pueblotaca chai shutitami shutichircacuna.

30Chai pueblopimi Danpaj ailluca paicunapaj dios cachunpish caspita labrashpa imamanpish rijchaj rurashcalla diosta shayachirca. Paicunapaj cura cachunpish Jonatantami churarca. Jonatanca Gersonpaj churi Moisespaj nietomi carca. Israelcunata shujtaj llajtaman prezu apai punllacamami Jonatanpaj huahua huahuacunallataj Dan aillupaj curacuna tucushpa causarcacuna.

31Chashnami Danpaj ailluca Micaía runa imamanpish rijchaj diosta caspipi rurashcata shayachishpa adorarcacuna. Diospaj carpa huasi Silo pueblopi cai punllacunaca tucui chai punllacunami chaipi shayachishca carca.