1Cutinllataj ñuca ñahuita huichilla alzashpami, chuscu carretacuna ishqui urcu chaupimanta llujshicujta ricurcani. Chai urcucunaca, bronce urcucunami carca.
2Punta carretataca, alazán caballocunami aisacurca. Chaipaj q'uipa carretataca, yana caballocunami aisacurca.
3Ishquipaj q'uipa carretataca, yuraj caballocunami aisacurca. Quimsapaj q'uipa carretataca, bayo caballocunami aisacurca.
4Chaita ricushpaca, ñucahuan parlanacucuj angeltaca: “Ñuca amito, ¿imatataj cai tucuica ricuchinri?” nishpami tapurcani.
5Shina nijpimi, chai angelca: “Cai pachata mandaj Jatun Diospaj ñaupajpi ricurishca q'uipa llujshishpa, jahua pacha chuscu esquinamanta shamuj huairami” nircami.
6Yana caballocunaca carretataca, huichimanmi aisashpa rircacuna. Yuraj caballocunaca caishuj carretataca, chaininijmanmi aisashpa rircacuna. Bayo caballocunahuan caj carretataca, urimanmi aisashpa rircacuna.
7Alazán caballocunaca, tucui cai pachata purinamanmi llujshirca. Chaimanta paicunataca: “Tucui cai pachata ricushpa purimugrichij” nijpimi, paicunaca cai pachata ricushpa purigrircacuna.
8Chai q'uipami, ñucata caparishpa cayashpaca cashna nirca: “Riqui, janaj ladoman rijcunaca, chai llajtapimi ñuca Espirituta saquimurcacuna” nircami.
Jatun mandaj cachun Josueta agllashcamanta9Mandaj Diosca cashnapishmi nirca:
10“Babilonia llajtaman prezu apashcacunapuramanta tigramuj Heldaitapish, Tobiastapish, Jedaiastapish pushashpa Sofoniaspaj churi Josiaspaj huasiman ri.
11Chaiman chayashpaca cullquitapish, curitapish japishpa coronacunata rurangui. Chaimantaca Josadacpaj churi, curacunata mandaj Josué curaman umapi churachingui.
12Chai q'uipaca, cashna ningui: Tucuita Mandaj Diosca cashnami nin: Retoñacuj yura shuti runaca, ñallami shamunga. Paica, quiquin sapillamantatajmi huiñanga. Paimi Mandaj Diospaj huasitaca shayachinga.
13Paimi, Mandaj Diospaj huasitaca shayachinga. Paica tucuicuna jatunyachishcami canga. Paica paipaj tiyarinapi tiyarishpami, tucuicunata mandanga. Paipaj c'uchupica, shujtaj curapishmi canga. Paicunaca ishquindijmanta cunanacushpami, sumajta causangacuna.
14Chaishuj coronacunataca, Helemtapish, Tobiastapish, Jedaiastapish, Sofoniaspaj churi Hentapish ricuchij cachun yuyarinapaj Mandaj Diospaj huasipi churangui ninmi ni” nircami.
15Shinallataj carupi causajcunami, Mandaj Diospaj huasita rurashpa ayudanaman shamungacuna. Chaita ricushpami, Mandaj Dios huillachun ñucata cancunapajman cachashcataca yachanguichij. Cancunata Mandaj Dios mandashcata uyashpa cazujpimi, cashnaca tucunga.
Who We AreWhat We EelieveWhat We Do
2025 by iamachristian.org,Inc All rights reserved.
