FILIPENSES 4 - Quichua Chimborazo Bible

Mandaj Jesuspica cushicucunallami nishcami

1Chaimanta ñuca c'uyashca, ñuca munashca huauquicunalla. Ñuca cushicuna coronami canguichij. C'uyashcacuna, Mandaj Jesuspi sinchicuna caichij.

2Evodiata, Sintiquetapish Mandaj Jesuspi shujlla cashcamantaca shuj yuyailla tucuchunmi rogani.

3Shinallatajmi ñucahuan tandalla pajtachij, cantapish rogani. Chai panicunata ayudangui. Paicunaca Clementendij, shujtaj huauquicunandij alli huillaita ñucahuan tandalla macanacuj shina huillajcunami. Paicunapaj shuticunaca, causaipaj libropimi.

4Mandaj Jesuspi shujlla cashcamanta yallitaj cushicucuichijlla. Cutinmi nini: ¡Yallitaj cushicucuichijlla!

5Cancuna c'uyaj cashcataca, tucuicuna yachashca cachun. Mandaj Jesús shamunaca c'uchullapimi.

6Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Tucui imamantapish Diosta mañashpaca pagui nichij.

7Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga.

Caicunapi yuyaichij nishcami

8Caillahuanmi nisha nini huauquicuna, tucui imapipish mana llulla canata, tucuipi alli canata, tucuipi cashcata ruraj canata, tucuipi chuya canata, tucuipi c'uyashca canata, tucuipi allimi nishca canata yuyaichij. Chashna imapipish alli nishca, alabashca cashca cashpaca, chashna cana yuyailla caichij.

9Imatami ñucamanta yacharcanguichij, chasquircanguichij, uyarcanguichij, ricurcanguichij chaita ruraichij. Chashna cajpica sumaj causaita cuj Diosca, cancunahuanmi canga.

Filipos crijcunaca cujcunami nishcami

10Cancuna ñucata cutin yuyarishcamantaca, Mandaj Jesuspimi jatunta cushicurcani. Cancunaca chai yuyaillatajmi carcanguichij, ashtahuanpish ima shina mana cui tucurcanguichijllami.

11Ashallata charishcamantaca mana chashna ninichu. Ima shina cashpapish, chaillahuan cushicuna cashcatami yachani.

12Ima illajlla causanatapish, yallitaj charij canatapish yachanimi. Tucui laya causaipi causanatami yachani. Mana nijta micushca canatapish, yaricaihuan canatapish, yallitaj charij canatapish, ima illajpi llaquita apanatapish yachanimi.

13Ñucata sinchiyachij Cristohuanca, tucui imatapish rurai tucunimi.

14Shina cajpipish ñuca llaquipi cajpi, ñucata ayudashpaca allitami rurarcanguichij.

15Filipos crijcuna cancunallataj yachanguichijmi. Alli huillaita huillai callarijpi, Macedoniamanta rigrijpipish shujtaj llajtapi tandanacushca crijcunaca, paicuna chasquishcamanta ñucaman cuna cashcataca mana curcacunachu. Ashtahuanpish cancunallami curcanguichij.

16Tesalonicapi cajpipish, ñucapaj ima illashcacunataca cutin cutinmi cacharcanguichij.

17Imatapish cuchun mashcashpa mana chashna ninichu. Ashtahuanpish jahua pachapi yallijta cancuna charijyachunmi munani.

18Cunanca tucuitami chasquircani. Yallijtami charini. Epafroditoman cancuna cachashcata chasquishpacarin, achcatami charini. Chaicunaca Diosman cushpa rupachijpi mishquiman ashnacuj shina, Dios chasquinallami.

19Ñuca Diosmi, Cristo Jesusmanta sumaj llajtapi paipaj charishcacunamanta, cancunapaj tucui ima illashcacunatapish cunga.

20Chaimanta Dios ñucanchij Yayataca, huiñai huiñaita jatunyachishca cachun. Chashna cachun.

21Cristo Jesuspi caj tucui jucha illajcunata allilla canguichij nipanguichij. Ñucahuan caj huauquicunapish alli cashca cachun nincunami.

22Tucui jucha illajcunami cancunataca alli cashca cachun nincuna. Ashtahuantajca Cesarpaj huasipi cajcunami, alli cashca cachun nincuna.

23Ñucanchijta Mandaj Jesucristopaj mana c'uyaipajta c'uyaj canaca, tucui cancunahuan cashca cachun. Chashna cachun.