LEVÍTICO 21 - Quichua Chimborazo Bible

Curacunaca imapi mana mapayashca canami

1Mandaj Diosca Moisestaca:

“Aaronpaj churi curacunataca cashna nishpa mandai: Cancunapurapi maijanpish huañujpi chai huañushcapi tuparishpa ama mapayachun.

2Quiquin mama cashpa, yaya cashpa, churi cashpa, huauqui cashpa huañujllapi tuparichun.

3Maijanpaj pani manaraj cazarashca cashpa, paipaj turipaj huasipi causacushpa huañujpica chai huañushcapipish tuparichunlla.

4Cancunapurapi ima mana cajcuna mapayashca shina ama mapayachun.

5Uma ajchatapish corona pamballata lluchuta ama rutuchichun. Barbas puntatapish ama utuchichun. Aichatapish ama chugrichichun.

6Cancunaca Taita Diospajlla cachun ch'icanchishcacuna, Diospaj shutita mana yanganchinapaj cajcuna, Mandaj Diosman cushcacunata rupachijcuna, Mandaj Diosman tandata cujcunami canguichij. Chaimanta ima jucha illajllami cana canguichij.

7Shinallataj huainayashcahuan causaj huarmihuanpish, millaita ruraj huarmihuanpish, cusa shitashca huarmihuanpish ama cazarachun. Curaca Taita Diospajllata ruranapaj ch'icanchishca cashcamantami chashna cana can ninmi ningui.

8Ñucaman tandata cujcuna cashcamanta paicunataca jucha illaj cana cashcatami yuyana cangui. Cancunataca ñucami jucha illajta rurarcani. Cancunata Mandaj Diosca jucha illajmi cani. Cancunata jucha illajta rurajca jucha illajmi cani. Chaimanta paicunapish cambajca ima jucha illajcunami cana can.

9Curapaj ushushi huainayashpa callarishpaca, paipaj yayatami pingachin. Chaimanta paica rupachishcami canga.

10Curacunata mandaj curaca, Diospajlla ch'icanchishca cashcata ricuchinapaj aceitehuan umapi churashca cashcamanta, Diospajlla ucuman yaicunapaj churarinata churarij cashcamanta paica paipaj uma ajchatapish alli allichirichun, paipaj churanacunatapish ama lliquirichun.

11Maijan huañushca siricuj ucumanpish ama yaicuchun. Paipaj yayamanta cashpa, paipaj mamamanta cashpapish mana mapayanachu can.

12Taita Diospajlla ch'icanchishca cashcata ricuchingapaj churana aceitehuan umapi churashca cashcamanta Taita Diospajlla ch'icanchishca ucumantaca ama llujshichun. Taita Diospajlla ch'icanchishca ucutapish ama yanganchichun. Ñucami Mandaj Dios cani.

13Curaca paipaj huarmi cachunca pihuan manaraj chayarinacushca huarmita japichun.

14Viuda huarmita, cusa shitashca huarmita, millaita ruraj huarmita, huainayashcahuan causaj huarmitaca paipaj huarmi cachunca ama japichun. Ashtahuanpish paipaj huarmi cachunca pihuan manaraj chayarinacushca quiquinpura huarmita japichun.

15Chashna rurashpami paicunapura huahua huahuacunaca mana yanganchishca canga. Mandaj Dios ñucami cancunata jucha illajta ruraj cani” nircami.

Allicunalla curacuna cachun nishcami

16Mandaj Diosca Moisesta mandashpaca:

17“Aarontaca cashna mandai: Cancunapaj Taita Diosman cuna cashca micunata cungapajca, cambaj huahua huahuamantaca cunanpish shamuj punllacunapish ima mana tucushcacunalla c'uchuyachun.

18Maijanpish ima tucushca runa cashpaca: Ñahui mana ricuj cashpa, cojo cashpa, mana cashpaca paipaj cuerpopi ima illaj cashpa,

19chaqui p'aqui cashpa, maqui p'aqui cashpa,

20curcu cashpa, uchilla cashpa, ñahuipi yuraj tiyarishca cashpa, carachalla cashpa, sisulla cashpa, paipaj lulun llapirishca cashpaca mana c'uchuyai tucunchu.

21Aarón curapaj huahua huahuacuna cashpapish ima tucushca cajcunaca, Mandaj Diosman rupachishpa cunamanca ama c'uchuyachun. Chashnacunaca ima tucushca cashcamanta Taita Diosman micunata cunamanca manataj c'uchuyangachu.

22Chashna cashpapish Diospajlla ch'icanchishpa Diosman cushca tandata, ima shujtajcunatapish Diosman cushcacunataca micuchunlla.

23Ashtahuanpish ñucapajlla ch'icanchishca ucuta ama yangachingapajmi, ima tucushcacunaca linsohuan jarcachishca huashaman, altarmanca mana c'uchuyai tucuncuna. Ñucami cancunata ima jucha illajta ruraj Mandaj Dios cani ni” nircami.

24Chashnami Moisesca Aarontapish, paipaj churicunatapish, tucui israelcunatapish mandarca.