1 CRÓNICAS 16 - Quichua Chimborazo Bible

1Diospaj arcata chashna apamushpaca, David ñaupaman shayachishca carpa huasi chaupi pambapimi churarcacuna. Chaipimi Davidca Taita Diosman cushpa tucui rupachinatapish cushpa rupachirca, Dioshuan alli cangapajpish paipaj ñaupajpi curca.

2Davidca Diosman cushpa tucui rupachinatapish cushpa rupachishpa, Dioshuan alli cangapaj cushca q'uipaca, tucui israelcunataca tucuita Mandaj Diospaj shutipimi alli cashca canguichijman nirca.

3Chai q'uipaca tucui israelcunamanmi c'aricunamanpish, huarmicunamanpish cada shujman shuj tandahuan, mirga aichahuan, chaquishca uvata rurashca shuj tandahuan cararca.

4Davidca, Mandaj Diospaj arca ñaupajpi Diospajta rurachunmi, levitapuramanta agllashpa churarca. Paicunataca israelcunata Mandaj Taita Diosta yuyachichun, tucuicunapaj juchacunata paiman huillashpa mañachun, pagui nishpa alabachunpishmi chaipi churarca.

5Paicunaca, puntaca Asafmi carca. Chai q'uipaca: Zacarías, Jeiel, Semiramot, Jehiel, Matatías, Eliab, Benaía, Obed-edom, Jeiel shuti levitacunami carca. Paicunaca salteriocunapi, arpacunapi tocajcunami carca. Asafca cimbalocunapi tocajmi carca.

6Shinallataj Benaía, Jahaziel curacunaca Taita Dioshuan ari ninacushca quillcata huaquichina arca ñaupajpi, punllanta trompetacunapi tocajcunami carca.

Diosta pagui nishpa cantangapaj David rurashca Salmomi(Sal 105.1-15; 96.1-13; 106.47-48)

7Davidca, chai punllami Asaftapish, paihuan cantaj caishujcunatapish, Mandaj Diosta pagui nishpa cashna cantachun punta cutin mandarca:

8“Mandaj Diostaca alabaichigari, paitaca pagui nichigari.

Pai imallata rurashcataca, pueblocunapi yachaj chayachichigari.

9Mandaj Diostaca cantaichigari.

Salmocunahuan cantaichigari.

Jatun mancharinacunata pai rurashcataca huillaichigari.

10Jucha illaj Diospaj shutimanta cushicuichigari.

Mandaj Diosta mashcajcunapaj shunguca cushicuchun.

11Mandaj Diostapish, paipaj podertapish mashcaichigari.

Punllanta paita mashcaichigari.

12Mancharinacunata pai rurashcata yuyarichigari.

Pi mana rurai tucuipajta rurashcatapish yuyarichigari.

Pai mandashca shimicunatapish yuyarichigari.

13Mandaj Diospajta ruraj Israelpaj huahua huahuacunamari canguichij.

Pai agllashca Jacobpaj huahua huahuacunamari canguichij.

14Mandaj Diosca ñucanchij Diosmari.

Paipaj shimicunaca tucui cai pachapimari.

15Pai ari nishcataca

huiñaita manataj cungaringachu.

Pai mandashca shimicunapish

huaranga huaranga huahua

huahuacunapaj shamucungallami.

16Abrahammanmari chashnatajmi rurasha nirca.

Isaacmanpish rurashatajmi nishpami huillarca.

17Chaitaca pajtachinacungapaj nishpa Jacobman cushcami.

Israelcunapaj ari nishcaca huiñaipajmi canga,

18nishpaca: Canaán llajtataca canmanmi cusha.

Cambaj allpa cachunmi cusha nircami.

19Paicuna ashacunalla cai punllacunapi, chai llajtacunapica pasajcunalla shina cai punllacunapimi chashna nirca.

20Paicunaca llajtan llajtanmi purirca.

Ch'ican ch'ican mandacun llajtacunamanmi rirca.

21Paicunata pi llaquichichunca Diosca mana saquircachu.

Ashtahuanpish paicunata c'uyashcamantami,

chai llajtacunata jatun mandajcunata

llaquichij carca.

22Ñuca agllashcacunataca ama

tuparichijchu.

Ñuca profetacunataca,

ama llaquichichijchu nircami.

23Mandaj Diostaca, tucui cai

pachapi causajcuna cantaichigari.

Pai mishachij cashcataca punllanta huillaichigari.

24Pai jatun cashcataca,

tucui gentecunapaj chaupipi cantaichigari.

Mancharinacunata ruraj cashcataca

tucui pueblocunapi huillaichigari.

25Mandaj Diosca jatunmari,

alabashca cana Diosmari.

Shujtaj dioscuna shinaca mana canchu.

Paica manchanataj Diosmari.

26Tucui pueblocunapaj dioscunaca, mana diostajchu.

Ashtahuanpish Mandaj Diosca,

jahua pachatapish ruraj Diosmari.

27Paipaj ñaupajpica alabanapish, cushicunapishmi tiyan.

Pai causacunpica, tucuita rurai tucunapish,

cushicuipishmi tiyan.

28Pueblocunapi causajcuna Mandaj Diosmanca alli nishca canata cuichigari.

Jatunmi cangui, tucuita rurai tucujmi cangui nishcata cuichigari.

29Mandaj Diospaj shutitaca alli nina cashca shinataj alli nichij.

Paiman cuna cashcata apashpa,

paipaj ñaupajman shamuichij.

Jucha illaj sumaj Mandaj Diospaj

ñaupajpi cungurichij.

30Tucui cai pachapi causajcuna Mandaj Diospaj ñaupajpi chujchuichij.

Cai pacha ama cuyurichunca paimi

sinchita churarca.

31Jahua pachapish cushicuichij.

Cai pachapish cushicuichij.

“Ñucanchij mandajca Mandaj Diosmi” nishpa llajtacunapi huillaichij.

32Mama cuchapish, chaipi imalla

tiyajpish huajiaichij.

Allpapish, chaipi imalla

tiyajcunapish cushicuichij.

33Shinallataj tucui yuracuna Mandaj Diospaj ñaupajpi cantaichij.

Paica cai pachata

mandanamanmari shamucun.

34Mandaj Diosta mañaichij,

paica allimari.

Paipaj c'uyaica huiñaipajmi.

35Cashna nichigari: Ñucanchijta quishpichij Dios, quishpichihuayari.

Cambaj jucha illaj shutita huillangapaj.

Cambaj cantocunapi cushicungapaj.

Tucui llajtacunamanta llujshichishpa tandachihuayari.

36Israelcunata Mandaj Taita Diosca huiñaimanta huiñaicama cajmi.

Paitaca alli nishca cachun” nircami.

Shina nijpica tucuicunami: “Chashna cachun” nishpa, Mandaj Diosta alabarcacuna.

Diospaj arcata cuidaj levitacunami

37Davidca Mandaj Dioshuan ari ninacushca quillcata huaquichina arca ñaupajpi, punllanta Mandaj Diospaj imallata rurana cashcata rurajcuna cachunca Asafta, paipaj huauquicunandijtami chaipi saquirca.

38Obed-edomtaca paipaj aillullamantataj caj sujta chunga pusaj runacunandijmi carpa huasi pungupi cuidajcuna cachun saquirca. Jedutunpaj churi Obed-edomtapish, Hosa runatapish pungupi cuidaj cachunllatajmi saquirca.

39Sadoc curataca, caishuj curacunandijmi, Mandaj Diospaj carpa huasipi Diospajta rurachun Gabaón lomapi tiyaj altarpi saquirca.

40Chishipish tutamantapish Mandaj Diosman animalcunata cushpa tucui rupachina altar jahuapi punllanta rupachishpa Mandaj Diosman cuchunmi chaipi saquirca. Ima shinalla ruranata Mandaj Dios israelcunata mandashca shinallatajmi rurana carca.

41Paicunahuanca Hemanpish, Jedutunpish, cantachun pillata agllashcacunata ñajaman ña huillashcacunandijmi chaipi carcacuna. Paicunataca: “Mandaj Diospaj c'uyaica huiñaipajmi” nishpa cantajcuna cachunmi churashca carca.

42Chai cantajcuna Diosta alabashpa cantacujpi trompetacunapi, cimbalocunapi, shujtaj tocanacunapipish tocachunca Hemanta, Jedutuntami churarca. Jedutunpaj churicunataca, pungupi cuidajcuna cachunmi churarca.

43Chai q'uipaca tucuicuna cada quiquin huasiman tigrarcallacunami. Davidpish, paipaj huasi familiata Dios allicunata cuchun ningapaj tigrarcallami.