JEREMÍAS 12 - Quichua Chimborazo Bible

Israelcunataca imamantataj mana llaquichingui nishpa Jeremías Diosta tapushcamanta

1Mandaj Dioslla, canca ñuca imata nijpipish cashcata cutichinguillami. Shina cajpipish caitamari cantaca tapusha nipani: ¿Imamantataj canta mana cazujcuna cashpapish, alli causanllacunari? Canmanta anchurijcunapish sumajta causanllacunamari.

2Can tarpujpimari, ucujta sapiyashpa huiñashpaca granurcacuna. Cambaj shutitaca shimi jahuamari charincuna. Ashtahuanpish paicunapaj shunguca canmanta carupimari.

3Mandaj Dioslla, ashtahuanpish ñucaca canta cazunitajmi. Shunguhuantaj chashna cajtaca canllataj ricunguimi, yachanguimi. Paicunataca ovejacunata huañuchinaman apacuj shina llaquiman apaiyari. Huañuchina punllapaj señalashpa chariyari.

4Cai llajtapi causacujcunaca: “Ñucanchij imata ruracujtaca, Diosca mana ricungachu” nishpami, yallitaj millaita rurancuna. Chaimantamari q'uihuacunapish tucui chaquishpa, allpapish shitashca pamba shina chaquishca saquiricun. Animalcunapish, pajarocunapish huañushpa tucuricunmari. ¿Maicamataj chashna saquigringuiyari?

Jeremías tapushcata Dios cutichishcamanta

5“Cantaca chaquillahuan callpajcunahuan mishanacuchun churajpipish, yallitajmari shaicuchincuna. Chashna caballocunapi tiyarishpa callpajcunahuancarin ¿maitataj mishanacui tucunguiyari? Imata mana manchana cai llajtapi cashpapish, huañuchinallami puricungui. Chashnaca Jordán yacu uri sachapi cashpacarin ¿imapishchari tucungui?

6Cambaj yayapaj familiapura cambaj quiquin huauquicunallatajmari canta huañuchingapaj jatarishcacuna. Paicunamari canta japingapaj caparinacushpa catincuna. Paicuna sumajta rimajpipish, ama shunguta churanguichu.

Mandaj Diosca paipaj runacuna llaqui tucujpi llaquirishcamanta

7Ñuca huasita saquinimi. Ñucapajlla cashcacunataca shitanimi. Tucui almahuan ñuca c'uyashcacunataca, paicunata p'iñajcunapaj maquipimi churani.

8Cunanca ñucapajlla cajcunapish jatun sachapi causaj p'iña león shinamari ñucataca c'ariyancuna. León huacarishpa ñucahuan ch'imbapura shayarij shina cajpimi, paicunataca p'iñarcani.

9Ñuca runacunaca tucui laya color plumacunayuj anga shinami. Chaimantami cunanca paicunata huañuchingapaj ullahuangacuna muyucun. Sachapi causaj tucui p'iña animalcuna, shamuichij paicunata micuichij.

10Achca michijcuna shamushpami, ñuca c'uyashca uva chagrataca saruchishpa tucuchincuna. Sumaj chagracunatamari tucui chingachishpa, shitashca pambata saquishcacuna.

11Shujllapish mana yuyaita japishpa causajpimi, tucui llajtata llaquichircani. Jatunta llaquichichun saquijpimi, ñuca shitashcacunaca llaquinayajta huacancuna.

12Shitashca pamba tucui lomacunatamari cai llajtata tucuchingapajca, millai runacuna shamuncuna. Ñuca, Mandaj Diostajmi cai llajta runacunataca shuj lado urimanta callarishpaca, caishuj lado uricama ñuca espadahuan tucuchigrini. Chaipica pipaj mana sumaj causai tiyangachu.

13Trigota tarpushpapish, cashallatami tandancuna. Sumaj allpata cushcapi causacushpapish, ima allita mana japincunachu. Ñuca, Mandaj Dios jatunta p'iñarijpica, paicuna imallata rurashcamantaca pingaringacunami.

Mandaj Diosca caishuj llajtacunapi causajcunata rimashcamanta

14Ñuca agllashca israelcunaman ñuca cushca llajta muyundijpi causaj, ñucata p'iñaj millai runacunami llaquichincuna. Chaimantami Mandaj Diostaj paicunataca cashna nini: Paicunatapish quiquin llajtamanta llujshichishpa cachashami. Shinallataj Judá runacunatapish, paicunapaj chaupimanta llujshichishami.

15Paicunataca llujshichishpa cachashca q'uipami, ñucallataj llaquishpa cutin quiquin llajtaman tigrachimusha. Chashna tigrachimushpami, quiquin allpacunata cutin cusha.

16Chai llajtacunapi causajcunami ñuca runacunataca: Baalpish ricucunmi ninata yachachircacuna. Q'uipataca chai shinallataj paicunapish ñuca agllashcacunaman ñuca cushca yachanata yachachuncuna. Tucui shunguhuan chaita yachashpa, ñucatapish: Mandaj Dios ricucunmi nichuncuna. Chashnaca ñuca agllashcacunapurapi causangallacunami.

17Ashtahuanpish maijan llajta runacunapish ñucata mana cazujpica, chaicunataca sapimanta llujshichishpami chingachisha” ninmi Mandaj Diosca.