PROVERBIOS 25 - Quichua Chimborazo Bible

Ch'imbapurashpa yachachishca yuyaicunami

1Judá llajtata jatun mandaj Ezequiaspaj quillcajcunami, Salomonllataj rimashca yuyachij shimicunata cutin cashna quillcarcacuna:

2Ima yachanata pacalla charinaca,

Taita Diospajca sumajmi.

Chaicunata callarishpa yachanaca,

jatun mandajpajca allimi.

3Jahua pacha maicama cashcatapish,

ucuman cai allpaca maicama cashcatapish,

jatun mandajcuna imata yuyacushcatapish,

pi mana yachai tucunchu.

4Cullquitaca yacuyachishpa tucui

mapata anchuchingui.

Imatapish ruranata yachaj runaca, chuya

cullquihuanmi sumaj vasota ruranga.

5Diosta mana manchaj runataca, jatun

mandajpajta ruranamanta anchuchingui.

Paita anchuchijpimi, cashcata rurashpa

alli mandanga.

6Jatun mandajpaj ñaupajpica,

ama alabaringuichu.

Jatuncunalla tiyanapipish ama tiyaringuichu.

7Mandajpaj ñaupajpi pingachishca

canapaj randica, paicunaraj

cayangacama shuyanamari alli.

8Ama imamantapish utca p'iñanacuipi

yaicunguichu.

Ñataj caishuj runa canta pingachijpi,

imata mana rurai tucunguiman.

9Canta pi imata nijpipish, chaitaca

paihuan allichingui.

Canlla yachana cashcataca, ama piman

yachaj chayachingui.

10Can parlacujta maijan uyashpaca,

canllatatajmi pingachinga.

Chashna mana alli ricurishcataca,

imahuan mana allichi tucunguichu.

11Yachanaihuan cajpitaj cunashca

alli shimicunaca curi manzanata,

cullqui platopi cushca shinamari.

12Uyashpa cazuj, yachaisapa runata

imata jarcajca curi sarcillo shinapish,

ashtahuan alli curimanta rurashca

sumaj aparina shinapishmi.

13Imata huillanaman cachajpipish,

alli pajtachij runaca paipaj amotaca,

yuyaita samachinmi.

Chirijlla rasu yacuta rupai punllapi

cuj shinami cushichin.

14Imata cushami nishpa jatun

tucushpapish mana pajtachij runaca,

huairapish p'uyupish shamushpa manapish

tamyaj shinami.

15Mandajca p'iñarishca cashpapish,

allimantalla rimajpica alli tucunllami.

Blandujlla shimicunaca sinchi

shungutapish chaupinllami.

16Sacha chuspi huachashca mishquita

japishpapish, ama yalli micunguichu.

Ñataj amijta micushpaca, tucuita

shungu tigranguiman.

17Cambaj c'uchullapi causajpajmanpish

ama punllanta ringuichu, ñataj

jayachishpa p'iñai callarinman.

18Pitapish yanga juchachishpa

mandajcunaman huillagrij runaca,

martillohuan huajtaj shina,

cuchillohuan satij shina, puntajlla

caspihuan shitaj shinami llaquichin.

19Ima llaqui tucushpaca, mana cazuj

runapica mana shunguta churanallachu.

Chaica quiru p'aquirishca shina,

chaqui quihuirishca shinami.

20Llaquilla tiyacuj cushicuchun

cantaj runaca, tamya punllapi churanata

quichuj shinapish, jabonpi vinagreta

churaj shinapishmi llaquichin.

21Canta p'iñajcuna yaricaihuan

cajpica caranguilla, yacunaihuan

cajpipish yacuta ubyachinguilla.

22Can chashna rurajpica, pingarishpa

llaquiringami.

Mandaj Diospish canman allicunata cungami.

23Janaj huaira shamushpaca, tamyata carcunllami.

P'iña ñahuita ricushpaca,

llullashpa parlarijcunapish rinllami.

24Jatun sumaj huasipi cashpapish,

caparirishpa rimaricujlla huarmihuan

causanapaj randica, huasi jahuapi

quiquinlla causanarajmi alli canman.

25Caru llajtamanta alli huillai

chayamushpaca, yacunaihuan

huañucujman chirijlla yacuta

ubyachishca shinami.

26Cashcata ruraj runaca, Diosta mana

manchaj runapaj ñaupajpi urmashpaca,

pugyu yacu mapayashca shina, purij

yacu yanayashca shinami.

27Sacha chuspi huachashca mishquita

yalli micunaca mana allichu.

Quiquinlla yallitaj alli nishca canata

mashcanapish mana jatunta ruranchu.

28Jahualla p'iñarinata yuyaipi

mana jarcarij runaca, muyundij pirca

urmashca pueblo shinami.