HECHOS 14 - Quichua Chimborazo Bible

Iconio pueblopi huillashcami

1Iconio puebloman chayashpaca judiocunapaj sinagogamanmi Pablondij Bernabendij yaicurcacuna. Chaipica ima shina huillaj cashca shinallataj Taita Diospaj Shimita huillajpimi judiocunapish, griegocunapish achcacuna crircacuna.

2Ashtahuanpish paicuna huillashcata mana crisha nij judiocunaca, mana judiocunatami Jesusta catijcunata p'iñana yuyaita cushpa yachachircacuna.

3Shina cajpipish paicunaca Mandaj Jesuspi shunguta churashpami, mana manchashpa chai llajtapi huillashpa unicama saquirircacuna. Taita Diosca mana c'uyaipajta c'uyajmi nishpa huillajpimi, pi mana rurai tucuipajta, mancharinacunata rurachishpa Jesusca paicunata alli nicushcataca ricuchirca.

4Chai pueblopi causajcunaca chaupirinacushpami, shujcunaca judiocunapura, caishujcunaca apostolcunapura tucurcacuna.

5Chashna tucushpami judiocunapish, mana judiocunapish paicunata mandajcunahuan tandanacushpa, llaquichingapaj rumicunahuan shitangapaj jatarircacuna.

6Paicunaca chaita yachashpami, Licaonia llajtapi caj Listra puebloman, Derbe puebloman, chai muyundij llajtacunamanpish rishpa miticugrishpaca,

7chai llajtacunapimi alli huillaitaca huillarcacuna.

Listra pueblopi Pablota rumicunahuan shitashcami

8Listra pueblopica shuj runami huachari pachamanta manataj purij, suchu runa tiyarca.

9Paica, Pablo huillashcatami uyaracurca. Pabloca, paipaj ñahuita ricushpaca, alliyachishca cana cashcata cricujta ricushpami,

10chai runataca:

–¡Jatarishpa, alli shayari!– nishpa sinchita rimajpica chai runaca saltashpa purircallami.

11Pablo chaita rurajta gentecuna ricushpaca, Licaonia rimaipimi: “¡Dioscunamari runacunaman rijchaj tucushpa ñucanchijpajman uriyamushcacuna!” nishpami sinchita caparircacuna.

12Chaimantami Bernabetaca, Júpiter diosmi nircacuna. Pablotaca huillaj cashcamanta, Mercurio diosmi nircacuna.

13Chai puebloman yaicuna pungupica, Júpiter diospaj huasimi tiyarca. Chai huasipi caj curami achcacunahuan tandanacushpa huagracunata, sisacunatapish chai huasi punguman apamushpa Pabloman Bernabeman sacrificiota cushun nircacuna.

14Chaita uyashpami apóstol Pablopish Bernabepish llaquirishcata ricuchishpa paicunapaj churanacunata lliquirishpa, chai tucuicunapaj chaupiman caparirishpa yaicushpaca,

15cashna nircacuna:

–Riquichij, ¿ima nishpataj chashnaca ruracunguichij? Ñucanchijpish cancuna shinallataj runacunallami canchij. Ñucanchijca cancuna cashna llaqui causacushcata saquishpa causaj Taita Diospajman cutirichun, alli huillaita huillajcunami canchij. Paica jahua pachata, cai pachata, mama cuchata, tucui ima tiyajcunatapish ruraj Taita Diosmi.

16Taita Diosca ñaupa huatacunaca, tucuicuna paicuna munashca ñancunapi purichunmi saquishca.

17Chashna causacujpipish Taita Diosca tamyata cachashpa granocuna p'ucuna punllapitaj p'ucuchishpami ñucanchijmanca mana nijta carashpa cushichin. Chashnami pai alli cashcataca ricuchin– nircacunami.

18Chashna rimacushpallami, paicunaman sacrificiota cushun nishpa huaicacujcunataca jarcarcacuna.

19Chai q'uipami Antioquia pueblomanta, Iconio pueblomanta maijan judiocuna shamushpaca, chai tucuicunata jatarichircacuna. Chaimantami Pablotaca rumicunahuan shitashpa, ñami huañun yuyashpaca, pueblomanta canllaman sirijta aisarcacuna.

20Chaipica Jesusta catijcuna, paipaj muyundijpi shayarijpimi jatarishpa chai pueblollamantaj cutin yaicurca. Cayandij punllaca Bernabendijmi, Derbe puebloman rircacuna.

21Chai pueblopipish alli huillaita huillajpimi, achcacuna Jesusta catijcuna tucurcacuna. Chai q'uipaca, Listraman, Iconioman, Antioquiamanmi tigrarcacuna.

22Chai pueblocunapica, Jesusta catijcunamanca Pablohuan, Bernabehuanca ashtahuan catina yuyaita cushpami, cashna shina llaquicunata apashpami: “Taita Dios mandacujpica, chaiman yaicushun” nishpami allitaj yachachircacuna.

23Tandanacushca crijcuna tiyanpica, tucuipimi cunaj yuyajcunata churarcacuna. Ayunashpa, Taita Diosta mañashca q'uipaca paicunataca paicuna crishca Mandaj Jesusmanmi mingarcacuna.

Siria llajtapi caj Antioquiaman tigrashcami

24Chaicunapi chashna churashpaca Pisidiata pasashpami, Panfiliaman shamurcacuna.

25Pergepi Taita Diospaj Shimita huillashca q'uipami, Ataliaman rircacuna

26Taita Dios huillachun nishcata pajtachishpaca, tandanacushca crijcuna paicunata Taita Diospaj maquipi mingashpa cachaj Antioquiallamantajmi barcopi tigrarcacuna.

27Chaiman chayashpaca, tandanacushca crijcunata tandachishpami, Taita Diosca jatun allicunata paicunahuan rurashcata, mana judiocuna crichun punguta pascaj shina paicunapaj yuyaita pascashcatapish parlarcacuna.

28Jesusta catij chaipi cajcunahuanca achca punllacunatami carcacuna.