EZEQUIEL 4 - Quichua Chimborazo Bible

Jerusalén llaqui tucunata huillashcamanta

1Huañujlla aichayuj runa, shuj adobillota japishpa cambaj ñaupajpi churangui. Chai jahuapica, Jerusalén pueblotajllata rurangui.

2Chai q'uipaca, chai pueblota p'iñajcunata churangui. Jatun patatapish rurangui, baluartetapish churangui. Chai ñaupajpica, soldadocunapaj carpa huasicunatapish rurangui. Chai jatun patata tsagmachishpa urmachina jatun caspicunatapish churangui.

3Shinallataj tablajlla fierrota japishpa, canhuan chai pueblotatajlla rurashcahuan chaupipi pircata shina churangui. Chai q'uipaca, cambaj ñahuita chai ladoman churangui. Chai fierroca can ama ricuchun, jarca shinami canga. Israelcuna ricuchunmi, chashna rurachun nini nircami.

4Shinallataj lluqui ladoman siriringui. Israelcunapaj juchataca, canmi apana cangui. Lluqui ladoman mashna punllata dormishpapish, paicunapaj juchatami canca apana cangui.

5Paicuna mashna huatacunata juchata rurashcataca, canmanca punllacunatami ricuchishcani. Chaica 390 punllacunami, chashnami israelcunapaj juchataca canca apana cangui.

6Ña chai punllacunata pajtachishca q'uipaca, alli ladomanmi siririna cangui. Chuscu chunga punllacunatami Judá runacunapaj juchataca apana cangui. Shuj huatamantaca, shuj punllata sirichunmi canmanca curcani.

7Jerusalén pueblota p'iñajcuna muyundijta shayacujta cambaj ñahuihuan ricungui. Chaimantaca Jerusalenpi causajcunaman llaqui tucunataca, lluchulla rigra tucushpa huillangui.

8Riqui, chai llaquicunata apana punllacunata pajtachingacamami, ama caishuj ladoman, chaishuj ladoman singurishpa siririchun cantaca huascahuan huatani.

9“Canca trigotapish, cebadatapish, habastapish, lentejatapish, millotapish, avenatapish japishpa shuj puñupi tandachishpa churangui. Chaicunataca, 390 punllacunacama cada punlla shuj tandata rurashpa micushpa siringui.

10Chai micunataca, punllantami chaupi librallata micuna horaslla micuna cangui.

11Shinallataj yacutapish medishpallami, punllanta shuj litrollata ubyana cangui.

12Shinallataj runa mapashcata rupachishpa, chai ushpapi cebada tandata cusashpami micuna cangui. Chai tandataca, paicuna ricucunpi cusangui” nircami.

13Mandaj Diosca cashnami nirca: “Israelcunata mai llajtacunaman ñuca cachajpipish, paicunaca cashna mapa micunallatami micungacuna” nircami.

14Shina nijpimi ñucaca: “Mandaj Jatun Dioslla, ñucaca mana mapa canica. Ñucaca huambramantapacha cunancamaca ima mapacunatapish, paillataj huañushca aichatapish, sacha animal huañuchishca aichatapish, ima shujtaj mapatapish shuj cutinllapish ñuca shimipica mana churashcanichu” nircanimi.

15Chashna nijpimi, ñucataca cashna nirca: “Shinashpaca can micuna tandataca ama runa mapashcahuan yanunguichu, ashtahuanpish huagra majadahuan yanunguilla” nircami.

16Chai q'uipaca cashnami nirca: “Huañujlla aichayuj runalla, Jerusalenpica micunaca illangami, pizashcallatami llaquijlla micungacuna. Yacutapish manchai manchaillami medishpalla ubyangacuna.

17Micunapish, yacupish illagrijpica, mancharinacushpami caishuj chaishuj ñahuicunata ricunacunga. Paicuna millaita rurashcamantaca, chashnami tucuringacuna” nircami.