DEUTERONOMIO 10 - Quichua Chimborazo Bible

Mandashcacunata shujtaj rumicunapi cutin quillcashcami(Ex 34.1-10)

1Chai punllacunapimi Mandaj Diosca ñucataca cashna nirca: Ñaupaman caj shinallataj ishqui tablajlla rumicunata labrashpa ñucapajman cai urcuman huichiyai. Shinallataj caspimanta shuj arcatapish rurangui.

2Can ñaupaman p'aquishca rumicunapi quillcashca shimicunallatatajmi ñucaca quillcasha. Chai rumicunataca chai arcapi huaquichingui nircami.

3Chashna nijpica, acacia caspimanta shuj arcata rurashpa, ñaupaman caj shinallataj ishqui tablajlla rumicunata labrashpami, chai rumicunataca maquipi apashca urcuman huichiyarcani.

4Mandaj Diosca urcupi cashpa nina rupacuj chaupimanta ñucanchij tandanacushcapi pai imallata rimashca chunga mandashcacunallatatajmi ishqui tablajlla rumicunapica ñaupaman quillcashca shinallataj quillcarca. Chaitami Mandaj Diosca ñucaman curca.

5Chai urcumanta tigrashpa uriyashpaca tablajlla rumicunataca chai rurashca arcapimi churarcani. Chai rumicunaca Mandaj Dios ñucata mandashca shinallatajmi cunancama chai arcapi tiyacun.

6(Chai q'uipaca israelcunaca Beerot-bene-jaacán pugyumantami, Mosera puebloman rircacuna. Chai pueblopimi Aaronca huañurca, chaillapitajmi pambarcacuna. Paipaj randica paipaj churi Eleazarmi cura tucurca.

7Chaimantaca, Gudgoda pueblomanmi rircacuna. Gudgoda pueblomantaca jatun yacucuna callpacuj Jotbata llajtamanmi rircacuna.

8Chai punllacunapimi Mandaj Diosca, Leví aillutaca Mandaj Dioshuan ari ninacushca quillcata huaquichina arcata apaj cachun ch'icanchirca. Paipaj ñaupajpi pai mandashcata rurachun, paipaj shutipi israelcunata alli cashca canguichijman nichunmi ch'icanchirca. Cunan punllacunacamami paicunapaj ruranaca tucui chaicuna.

9Chaimantami levitacunaca paicunapaj huauquicunapurapica ima japinata mana charincuna. Mandaj Dios nishca shinallatajmi paicunapaj japinaca Mandaj Diospajllata rurashpa causana).

10Ñaupaman shinallatajmi chuscu chunga punllata, chuscu chunga tutata urcupi carcani. Cunanpish ñuca mañashcata Mandaj Dios uyashpami, cancunataca mana chingachishachu nirca.

11Chaipimi Mandaj Diosca ñucataca: Paicunapaj ñaupa yayacunaman ñuca cushatajmi nishca llajtaman rishpa, paicunapaj cachun japigrichun paicunataca ima shina rinalla tucuchun ruragri nirca.

Imallata cazuchun Taita Dios mañashcami

12Cunanca israelcuna Mandaj Diosca caitami mañan: Mandaj Dios cancunapaj Taita Diosta manchachun, paipaj ñancunallapi purichun, tucui almahuan, tucui shunguhuan paita c'uyashpa pai mandashcata rurachunmi Mandaj Dios cancunapaj Taita Diosca mañan.

13Chaimanta cunan cancunapaj tucui causaipi alli canapaj Mandaj Dios mandashcacunata, pajtachingui nishcacunata cunan ñuca quillcashpa cushcata cancuna pajtachichunmi mañan.

14Jahua pachapish, jahua pachamanta ashtahuan jahuaman caj jahua pachapish, cai pachapish chaipi tucui imalla tiyajcunapish Mandaj Dios cancunapaj Taita Diospajmi.

15Mandaj Diosca, cancunapaj ñaupa yayacunata c'uyashpa agllanata munashcamantami paicunata agllarca. Cancunaca paicunapaj huahua huahuacunami canguichij. Chashnallatajmi cunanpish cai tucui llajtacunapuramantaca cancunata agllarca.

16Circunsicionta ruraj shina shungumanta mapa yuyaita p'itichij. Ama ashtahuan ch'ahuancunallataj caichijchu.

17Mandaj Dios cancunapaj Taita Diosca tucui dioscunapaj Diosmi, mandajcunapajpish Mandajmi. Manchana tucuita rurai tucuj Jatun Diosmi. Paica ñahuita ricushpalla mana imatapish rurajchu, camaricunata japishpalla mana maijanpura tucujchu.

18Paica yaya mama illaj huahuacunapaj, viudacunapaj cashcata rurajmi. Shujtaj llajtamanta shamujtapish c'uyashpa micunata, churanata cujmi.

19Cancunapish caru llajtamanta cajcunata c'uyanguichij. Cancunapish Egiptopi cashpaca caru llajtamanta cajcunallatajmi carcanguichij.

20Mandaj Dios cancunapaj Taita Diosta manchaichij. Paipajllata ruraichij, paillata catichij, imapish chashnataj cashcata nicushpaca paipaj shutipi nichij.

21Paica cancuna alabanamari. Paimi cancunapaj Taita Dios. Paimi cancunapaj jatun mancharinacunata ruraj. Chaitaca cancunallataj ricurcanguichijmi.

22Cancunapaj ñaupa yayacunaca, Egiptomanca canchis chungacunallami yaicurcacuna. Ashtahuanpish cunanca Mandaj Diosca cancunataca jahua pachapi caj luzerocunata shina achcatami mirachishca.