1Mishquijllata ashnaj jambicunata ruraj runa rurashca jambicunapi shuj chuspilla urmashpa huañushpapish, tucuipi mapa ashnaita churanllami. Tucuicuna alli nishca runapish chashnallataj imapi ashata pandarishpaca, yallitaj mana allimi ricurin.
2Yachaj runapaj shunguca alli ladotami yuyan. Rumi shungu runapaj shunguca, lluqui ladotami yuyan.
3Rumi shungu runaca ñanta puricushpapish, alli yuyaiyuj shinaca mana purinchu. Chashnami rumi shungu cashcataca tucuicunaman ricuchin.
4Mandaj canhuan p'iñarijpica, can imata ruracushcataca ama shitashpa saquinguichu. Casijlla saquirijpica, yallitaj p'iñarishca cashpapish alli tucungallami.
5Ñucaca inti achijyachicun cai pachapica, shujtami panda tiyashcata ricuni. Mandajllatajmi cashna pandata ruraj cashca:
6Rumi shungu runacunatami mandanapi jahuaman tiyachin. Ashtahuanpish charijcunarajmi yanga ruranacunapi tiyacuncuna.
7Caitapishmari ricuni: Servij runami caballopi tiyarishca purin. Mandajcunarajmi servij runa shina chaquillahuan purincuna.
8Jutcuta ruraj runaca, paillataj chaipi urmangallami. Pircata urmachijtapish, culebra llujshishpa caningallami.
9Rumita p'aquishpa allichijpish, chaillapitaj chugririnllami. Yantata hachajpish imapish tucunllami.
10Hacha filo tucurijpi mana cutin molashpaca, ashtahuan sinchitami shitana tucun. Ashtahuanpish alli yachaica alli pushanapajmari.
11Culebrata japingapaj muspachij yumbu manaraj muspachijpi culebra canijpica, muspachij yumbu cashcapish yangallami.
12Yachaj runapaj shimicunaca, tucuicunapaj uyanajllami. Ashtahuanpish rumi shungu runataca, paipaj shimillataj llaquipi churanllami.
13Rimai callarimantapachami rumi shungu cashcata ricuchin. Tucuchinatacarin musparishpa, jatun mana allicunata rimarishpami tucuchin.
14Q'uipata imalla tucunata pi mana yachajpipish, rumi shungu runaca achcata rimarinllami. Q'uipata ima tucunataca ¿pitaj yachaj chayachi tucungari?
15Rumi shungu runacunaca, mana samarishpa trabajacunllami. Puebloman rina ñanllatapish mana rijsinchu.
16¡Huambraraj jatun mandajta charij llajtalla, aij, imachari tucungui! Pai churashca mandajcunapish, tutamantamanmi jatun micuita callarincuna.
17¡Alli yaya mamamanta huacharishca jatun mandajta charij llajtalla, cushicuiyari! Cambaj mandajcunapish machanapaj randica yaricaita parachingapaj, micuna horallapimi micuncuna.
18Q'uilla runaca huasi c'ata urmajpipish saquinllami. Tucui huasi urmachunpish siricunllami.
19Cushicui tiyashcamantami, jatun micuitaca rurarin. Causaj runacunataca, vinomi cushichin. Tucui chaicunapajpish cullquitajmari.
20Jatun mandajtaca, yuyaillapipish ama ima mana allita rimanguichu. Charijcunatapish dormina ucupi canlla tiyacushpapish, ama ima mana allita rimanguichu. Ñataj pajarocuna uyashpa yachaj chayachigrinman. Alasyujcunaca utca huillagringallatajmari.
Who We AreWhat We EelieveWhat We Do
2025 by iamachristian.org,Inc All rights reserved.
