MARCOS 10 - Quichua Chimborazo Bible

Manataj shitanacunachu nishpa Jesús yachachishcami(Mt 19.1-12; Lc 16.18)

1Chai q'uipami Jesusca Jordán yacuta ch'imbashpa Judea llajtaman rirca. Pai chaipi cajpimi achcacuna paipajman cutin tandanacumurcacuna. Chaipimi ima shina yachachij cashca shinallataj yachachirca.

2Fariseocuna Jesuspajman c'uchuyashpaca, ima mana allita nijpica juchachingapajmi, cusaca paipaj huarmita shitanaca allichu canga nishpa tapurcacuna.

3Chaimi Jesusca:

–Cancunataca ¿imatataj Moisesca mandarca?– nijpi,

4paicunaca:

–Moisesca, maijan cashpapish huarmita shitasha nishpaca, chaita ricuchij quillcata cushpa shitachunlla ninmi– nircacunami.

5Chaimi Jesusca:

–Cancunaca rumi shungucuna cajpimi Moisesca chashna nishpa quillcarca.

6Taita Diosca callaripi tucuita ruracushpaca shuj c'ari, shuj huarmillatami rurarca.

7Chashna cashcamanta c'arica, yaya mamata saquishpa, paipaj huarmihuan tandanacushpa,

8ishquindijmanta shuj aichallami tucunga. Chaimanta ña mana ishquichu, shuj aichallami.

9Chashna cashcamanta Taita Dios tandachishcataca, ni pi amataj ch'icanyachichun– ninmi.

10Yachacujcunaca huasipi cashpa Jesustaca, chaillatataj cutin tapujpimi,

11Jesusca:

–Maijan cashpapish paipaj huarmita shitashpa shujtajhuan cazarajca huainayanmi. Chashna rurashpaca paipaj huarmitapish llaquichinmi.

12Huarmipish cusata shitashpa shujtajhuan cazarashpaca huainayanmi– nircami.

Huahuacunapaj umapi maquita Jesús churashcami(Mt 19.13-15; Lc 18.15-17)

13Chai q'uipami huahuacunapaj jahuapi maquita churachun nishpa Jesuspajman pushamurcacuna. Ashtahuanpish paicunataca yachacujcunaca imapajtaj pushamunguichij nishpami jarcarcacuna.

14Chaita Jesús ricushpaca, p'iñarishpami:

–Huahuacuna ñucapajman shamuchun saquichij, ama jarcaichijchu. Cai huahuacuna shina cajcunami jahua pacha Taita Dios mandacujpica yaicunga.

15Taita Dios paita mandachun shuj huahua shina maijanpish mana chasquijca, Taita Dios mandacujpica chaipica mana yaicungachu. Chashnatajmi canga– nishpaca,

16huahuacunata marcashpami, paicunapaj jahuapi maquita churashpa Taita Dios allicunata cuchun nirca.

Achcata charij moso Jesusta tapushcami(Mt 19.16-30; Lc 18.18-30)

17Jesús chaimanta rigrijpimi, shuj runa callpashpa c'uchuyashpa paipaj ñaupajpi cungurishpaca:

–Yachachij canca allimari cangui. Huiñai causaita charingapajca ¿ima allitataj rurana cani?– nijpi,

18Jesusca:

–¿Ima nishpataj ñucataca alli ningui? Allica pi mana tiyanchu, shujllami tiyan, chaica Taita Diosmi.

19Mandashcacunataca yachanguillatajmi: “Ama huainayangui, ama huañuchingui, ama shuhuangui, ama llullashpa huillangui, pita ama umangui, cambaj yaya mamatapish alli ningui” ninmi– nircami.

20Chaimi paica:

–Yachachij, tucui caicunataca huahuamanta pachami ruracuni– nijpi,

21Jesusca c'uyaihuan paita ricushpami:

–Shujca illanrajmi: Can imalla charishcacunata tucui c'atushpa, huajchacunaman cugri. Chashna rurashpami jahua pachapica, achcata charingui. Chacatashpa huañuchina cajpipish ñucata catingui tigramugri– nirca.

22Shina nijta uyashpa paica achcata charij cashcamantaca llaquijlla rircallami.

23Jesusca chaipi cajcunata muyundijta ricushpami, paipaj yachacujcunataca:

–¡Achcata charijcunaca, Taita Dios mandacujpica mana jahualla yaicungacunachu!– nircami.

24Chashna nijpi yachacujcuna achcata mancharinacucujpimi cutinllataj Jesusca:

–Huahuacuna, ¡ima charishcacunallapi shunguta churajcunaca, Taita Dios mandacujpica mana jahualla yaicui tucungachu!

25Shuj camellorajmi auja rinrintaca, jahualla pasan. Shuj charij runa Taita Dios mandacujpi chaiman yaicunaca, chaitapish yalli sinchimari– nijpicarin,

26yachacujcunaca ashtahuan mancharinacushpami:

–Shinashpaca ¿pitaj quishpiri tucungari?– nircacuna.

27Chaimi Jesusca paicunata ricushpaca:

–Gentecunapajca sinchitajmari, ashtahuanpish Taita Diospajca imapish jahuallami– nirca.

28Chaimi Pedroca:

–Ñucanchijca tucuita saquishpami, cantaca caticunchij– nijpi,

29Jesusca cashna nirca:

–Cashnatajmi nini: Maijanpish ñucata caticushcamantapish, alli huillaimantapish paipaj huasita, huauquicunata, panicunata, yaya mamata, huarmita, huahuacunata, allpacunatapish saquishpaca,

30ñucata caticushcamanta catirashpa llaquichicujpipish, cunan punllacunapi chasquinataca patsaj cutihuanmi huasicunata, huauquicunata, panicunata, mamacunata, huahuacunata, allpacunatapish chasquinga. Shinallataj shamuj punllapicarin, huiñai causaitami chasquinga.

31Ashtahuanpish cunan puntapi cajcunaca achcacunami huashayachishca cangacuna. Cunan huashaman cajcunaca puntapimi cangacuna– nircami.

Jesusca pai huañuna cashcata cutin huillashcami(Mt 20.17-19; Lc 18.31-34)

32Jerusalenman rina ñanta huichiyacushpaca Jesusca ñaupashpami ricurca. Yachacujcunaca manchai, manchaillami caticurcacuna. Chaimi chunga ishquicunata ch'icanyachishpaca, paita imallata rurana cashcata huillai callarishpa cashna nirca:

33–Cunanca Jerusalenmanmi huichiyacunchij. Chaipimi Runa Aichayujtaca curacunata mandajcunaman, mandashcacunata quillcajcunaman entregangacuna. Paicunaca huañunami cangui nishpami mana israelcunaman entregangacuna.

34Paicunaca chanzata rurashpami azotingacuna, ch'ucangacuna, huañuchingacuna. Huañuchijpipish quimsa punllapica causaringallami– nircami.

Santiagopish Juanpish mañashcami(Mt 20.20-28)

35Chaipimi Zebedeopaj churicunaca Jacobopish, Juanpish Jesuspajman c'uchuyashpaca:

–Yachachij, ñucanchij caita mañagrinchij chaita rurapai– nircacuna.

36Chaimi Jesusca:

–¿Imatataj rurachun ninguichij?– nijpi,

37paicunaca:

–Can tucui rurai tucuj cashcahuan mandacushpaca, shujtaca alli ladoman, caishujtaca lluqui ladoman tiyachingui– nircacuna.

38Chaimi Jesusca:

–Imata mañacushcatapish mana yachanguichijchu. ¿Ñuca ubyana cashca vasomantaca ubyai tucunguichijchari, ñuca imahuan bautizarishcapipish, bautizari tucunguichijchari?– nijpi,

39paicunaca:

–Ari, chashna rurai tucunchijmi– nircacuna. Chaimi Jesusca:

–Ñuca ubyashca vasomantapish ubyanguichijmi, ñuca imahuan bautizarishcapipish bautizaringuichijmi.

40Ashtahuanpish ñuca alli ladoman, lluqui ladoman maijanta tiyachinaca mana ñucapajchu. Chaitaca ñuca Yayami maijancunapaj allichishca cashpaca, chaipica tiyachinga– nircami.

41Chaita caishuj chunga yachacujcuna uyashpaca, Jacobohuanpish, Juanhuanpish p'iñarijpimi,

42Jesusca paicunata cayashpa:

–Jatun mandajcunallami paicunalla tucuita mandaj cashun nincuna. Cai pachapi llajtacunata mandajcunallami, paicuna yuyashca shinata rurashpa mandancuna. Chaitaca yachanguichijmi.

43Ashtahuanpish cancunapurapica, mana chashnachu canga. Cancunapuramanta maijanpish jatun casha nijca, caishujcunapajta rurajmi canga.

44Cancunapurapi maijanpish puntapi casha nishpaca, tucuicunapajta rurajmi canga.

45Runa Aichayujca servishca cangapajca, mana shamurcachu, ashtahuanpish servingapaj. Paipaj causaita cushpa tucuicunata randishpa cacharichingapajmi shamurca– nircami.

Jesusca mana ricuj Bartimeota alliyachishcami(Mt 20.29-34; Lc 18.35-43)

46Chaimantaca Jericomanmi chayamurcacuna. Jericomanta Jesusca paipaj yachacujcunandij, shujtaj achcacunandijpish llujshishpa ricujpica, paicuna rina ñan uripimi Timeopaj churi Bartimeo tiyacurca. Paica, ñahui mana ricuj cashpami mañashpa tiyacurca.

47Nazaretmanta Jesús chaita pasacun nijta uyashpami:

–¡Davidpaj Churi Jesús, ñucata llaquihuai!– nishpa caparijpi,

48chaipi cajcunaca upalla cai nishpa jarcarcacuna. Ashtahuanpish paica:

–¡Davidpaj Churi, ñucata llaquihuai!– nishpami ashtahuan caparirca.

49Chaita uyashpa Jesús chaipi shayarishpaca: –Paita pushamugrichij– nijpi chai pushanaman rijcunaca:

–Cushicushpa jatari, cayacunmari– nircacunami.

50Pai pillurishcatapish chaipi shitashpa jatarishcahuan Jesuspajman shamujpimi,

51Jesusca:

–¿Imatataj rurachun ningui?– nishpa tapujpi, mana ricujca:

–Yachachij, ñuca ñahuicunata alliyachihuai– nirca.

52Chaimi Jesusca:

–Rilla, can crishcamantami alliyashcangui– nirca.

Chashna ninca paipaj ñahui ricujpimi Jesús ricun ñanllatataj paita catishpa rirca.