1Taita Dios ñucata llaquihuayari.
Quiquin llaquij cashca shinallataj llaquihuayari.
Ima shina llaquij cashca shinallataj llaquishpa ñuca c'ariyashcacunata p'ichahuayari.
2¡Millaita ñuca rurashcataca ashtahuan ashtahuan maillahuayari.
Ñuca juchataca p'ichahuayari!
3Quiquinta ñuca c'ariyashcacunataca rijsirinimi.
Ñuca juchallishcaca ñuca ñaupajpi ricuricunllamari.
4Quiquintaca p'iñachishcanimari.
Juchallishpaca p'iñachishcanimari. Quiquinpaj ñaupajpica millaitamari rurashcani.
Chaimanta rimashpaca rimana cajllapitajmi rimashcangui.
Manapish rimana cajpica mana rimashcanguichu.
5Ñucaca mamapaj huijsapi tiyarishca pachamantami millai cashcani.
Ñuca mamaca juchayujtami chichushca.
6Quiquinca mana llullatami yallitaj c'uyangui.
Yachaj canataca pacallapimi yachachishcangui.
7Hisopohuan chuyayachiyari.
Ima mapa illajmi casha.
Maillahuayari.
Rasuta yalli ashtahuan yurajmi casha.
8Ima llaqui illajlla, cushijlla canata uyachihuayari.
Chaimi can llaquichishca ñuca tullucunaca cushicunga.
9Ñuca juchacunata ama yuyarichu.
Millaita rurashcacunataca tucuita p'ichahuayari.
10¡Taita Dioslla, ñucapica chuya shunguta callarichihuai.
Ñuca ucupica ima pandata mana ruraj espirituta cutin churahuai!
11Quiquinpaj ñaupajmantaca, ñucataca ama anchuchihuaichu.
Quiquinpaj jucha illaj Espiritutaca ñucamanta ama quichuichu.
12Quiquin quishpichijpi cushicuna cushicuita cutin cuhuayari.
Tucuita rurai tucuj espirituhuan charirahuayari.
13Chaimi mandashcata p'aquijcunamanca quiquinpaj ñanpi purinata yachachisha.
Chaimi juchayujcunaca quiquinman cutiringacuna.
14Taita Dioslla huañuchij canamanta huaquichihuai.
Ñucata quishpichij Taita Dioslla.
Quiquinpaj cashcata ruranataca ñuca c'alluca cantangami.
15Jatun Dioslla, ñuca shimita pascahuai.
Tucuicunapaj ñaupajpi quiquinta cantangapaj.
16Animalcunata huañuchishpa quiquinman ñuca cuchunpish mana munanguichu.
Cushpa tucui rupachichunpish mana munanguichu.
17Taita Diosman animalta cushpa rupachina shinaca, shungu p'aquirishca paiman c'uchuyanami.
Taita Dioslla, shungu llaquirishca, mana jatun tucushca quiquinpajman c'uchuyajpica mana yanganchinguichu.
18Quiquinpaj yallitaj c'uyaihuan Sionpajca allita rurapayari.
Jerusalén muyundij pircataca cutin shayachihuayari.
19Quiquin munashca shina animalta cushpa chaipi rupachijpimi quiquin munashca canga.
Quiquinman cushpa tucui rupachishcatapish chaipimi chasquingui.
Sionpi caj quiquinpaj altarpimari bizicunataca quiquinman cushpa rupachishun.
Who We AreWhat We EelieveWhat We Do
2025 by iamachristian.org,Inc All rights reserved.
