JOEL 3 - Quichua Chimborazo Bible

Millaita ruraj llajtacunataca Mandaj Dios llaquichina cashcamanta

1Riquichij, chai punllacunapica Judá llajtamanta, Jerusalén pueblomanta prezu apashcacunataca tigrachimushami.

2Tucui shujtaj llajtacunapi causajcunata tandachishpaca, Josafat pugru pambamanmi uriyachisha. Chaipimi ñuca agllashcacunata llaquichishpa causajcunataca llaquichisha. Paicunami ñucapajlla cachun agllashca israelcunataca, tucui llajtacunaman caita chaita cacharcacuna. Chashnami ñuca llajtataca chaupircacuna.

3Israelcunataca suerteta rurashpami, caishuj chaishuj chaupinacurcacuna. Paicunapaj churicunataca, shuj huainayaj huarmipimi c'aturcacuna. Ushushicunataca vino vasopimi c'aturcacuna, chaitami ubyarcacuna.

4Tiro pueblolla, Sidón pueblolla, Filistea llajtalla, ñucaca cancunataca ¿imatataj rurashcaniyari? ¿Ñucatachu llaquichisha yuyanguichij imamí? Chashna yuyashcamantaca, ñallami cancuna japina cashcataca cugrini.

5Cancunaca ñuca cullquitapish, ñuca curitapish, ima shujtaj sumaj charinacunatapish quichushpami, cancunapaj rurashcalla dioscunapaj huasicunaman aparcanguichij.

6Cancunaca Judá llajtapi causajcunapaj, Jerusalenpi causajcunapaj churicunatapish griegocunaman c'atushpa cachashpami, paicunapaj quiquin llajtamantaca caruta cacharcanguichij.

7Paicunata maiman c'atushpa cachashca cajpipish, tigrachimushami. Ashtahuanpish cancuna millaita rurashcamantaca, ñallami japina cashcata cugrini.

8Cancunapaj churicunatapish, ushushicunatapish Judá llajtapi causajcunamanmi c'atusha. Paicunami cancunapaj huahuacunataca, caru llajtapi causaj sabeocunaman c'atushpa cachangacuna. Ñucaca Mandaj Dios cashpami, cashna huillani.

9Caitaca tucui llajtacunapi huillaichigari. Macanacui tiyanatapish huillaichigari. C'ari c'ari runacunata rijchachichigari. C'uchuyamuichigari, tucui soldadocunapish shamuichigari.

10Cancunapaj azadoncunataca, espadata ruraichigari. Cancunapaj hocescunataca, lanzacunata ruraichigari. Fuerzata mana charijcunapish: Fuerzasapamari cani nishpa caparirichigari.

11C'uchulla llajtacunapi causajcuna, tucuicuna tandanacushpa shamuichigari ninmi.

Mandaj Dioslla, paicunapajmanca fuerzasapa cambaj runacunata cachayari.

12Tucui llajtacunapi causajcuna, rijcharichigari. Josafat pugru pambaman huichiyaichigari. Chaipimi c'uchulla llajtacunapi causajcunataca, tucui paicuna imalla rurashcata ricuchingapaj tiyarisha.

13Granocunaca ñami tandanalla tucushca. Chaitaca hoceshuan tandaichigari. Uvapish capinapica jundami tiyacun, sarushpa capinaman uriyamuichigari. Paicuna millaita rurashcacunapish, chashnallataj yallitaj achcamari.

14Rurashcata ricuchina pambapica, achcacunami tandanacushca. Mandaj Diosmi paicuna imalla rurashcata ricuchina pambapi ricuchinga. Chai punllaca ñami quichquiyamucun.

15Chai punllapica intipish, lunapish amsayangami, luzerocunapish ña mana achijyachingachu.

Judá llajtapi causajcunata quishpichinamanta

16Mandaj Diosca Sionmantami caparinga, Jerusalenmantaca pai rimashcami uyaringa. Chaimantaca jahua pachapish, cai pachapish chujchungami. Ashtahuanpish Mandaj Diostami, pai agllashcacunaca shuyangacuna. Pai agllashca israelcunapajca, paca tucuna jatun pata shinami tucuimanta huaquichinga.

17“Chashna rurajpimi, cancunata Mandaj Taita Diostaj cashcataca rijsinguichij. Ñucapajlla Sión urcupi causacushcatami ricunguichij, Jerusalenpish ñucapajllami tucunga. Shujtajcunaca ña mana ashtahuan chaita puringacunachu.

18Chai punllapica urcucunamantaca llullu vinomi llujshinga, lomacunamantaca lechemi talliringa. Judá llajtapi tiyaj tucui larcacunataca, achca yacumi callpanga. Mandaj Diospaj huasimantapish achca yacu llujshishpami, Sitim pugru pambapi regaringa.

19Egiptoca tucuimi chingaringa. Edomca shitashca llaquinayaj pambami saquiringa. Paicunallataj Judá llajtapi causajcunata ima juchachina illajlla cashca jahua, huañuchishpa yahuarta jichashcamantami chashna tucungacuna.

20Ashtahuanpish Judá llajtaca huiñaipajmi runacunahuan junda causanga. Jerusalenpica huahua huahuacunacamami causangacuna.

21Yahuarlla cajcunata manaraj p'ichashcataca, ñucami p'ichasha. Mandaj Dios ñucami Sión urcupi causasha” ninmi.