CANTARES 2 - Quichua Chimborazo Bible

Huarmi cantashcami:

1Ñucaca Sarón pambapi tiyaj rosas

sisami cani.

Ñucaca pugru pambapi tiyaj lirio

sisami cani.

C'ari cantashcami:

2Ñuca c'uyashcaca solteracunapaj

chaupipica, casha yuracuna chaupipi

lirio sisa huiñashca shinami ricurin.

Huarmi cantashcami:

3Ñuca c'uyashcaca mosocunapaj chaupipica,

sacha yuracuna chaupipi huiñashca manzana

yura shinami ricurin.

Ñuca munashcapaj llandupimi tiyarircani.

Pai p'ucushca micunaca, ñuca shimipica

mishquimari.

4Paica jatun micuita ruracun

huasimanmi pusharca.

Paipaj c'uyaimi, bandera shina

ñucata pacahuan.

5Pasasta carahuaichigari, manzanata

carashpa cushichihuaichigari,

paita ricunaihuan ungushcamari cani.

6Paipaj lluqui rigrapi ñucata

saunachihuajpichari, paipaj alli

rigrahuanca ñucata ugllahuajpichari.

C'ari cantashcami:

7Jerusalenpi causaj solteracunalla,

corzocunamantapish, sacha

tarugacunamantapishmi cashna nipani:

Ñuca c'uyashcataca amataj

rijchachipanguichijchu, maicamapish

samaricuchun saquipanguichijlla.

Huarmi cantashcami:

8¡Ñuca c'uyashcapaj rimashcami uyarin!

Riqui, paitajmari shamucun.

Paitajmari urcucunatapish,

lomacunatapish saltarishpa,

tushurishpa shamucun.

9Ñuca c'uyashcaca corzo shinapish,

malta taruga shinapishmari.

Riqui paica ñamari pata huashapi shayacun.

Ventanacunamantami ricucun.

Chijtarishca patamantamari chapacun.

10Ñuca c'uyashcaca ñucataca

cashnami nirca:

“Ñuca c'uyashca sumaj soltera,

jatari jacu ñucahuan.

11Riqui, ñamari tamya punllacuna

tucurishca.

Tamya maitatajshi rijpica, sumaj

punllacunami tucushca.

12Allpapica, sisacunami huiñashca.

Cantana punllacunami chayamushca.

Urpicuna huacashcami ñucanchij

llajtapica uyarishca.

13Higo yurapish ñami p'ucushca.

Uva sisacunapish sumajtami ashnacun.

Ñuca c'uyashca sumaj huarmi,

jatariyari jacu ñucahuan.

14C'aca huaicucunapi, jutcucunapi,

jahua urcucunapi miticushpa causaj

ñuca c'uyashca palomita,

cambaj ñahuita ricuchihuai,

cambaj rimaita uyachihuai.

Cambaj rimashca shimicunaca

mishquijllamari uyarin.

Cambaj ñahuipish sumajmari

ricurin” nircami.

Ishquindij cantashcami:

15Zorracunata jacu japishun, malta

zorracunami uva chagrata tucuchicun.

Ñucanchij uva chagraca cunan

sisacunllamari.

Huarmi cantashcami:

16Ñuca c'uyashcaca ñucapajmi,

ñucaca paipajmi cani.

Paica lirio sisacuna chaupipi michijmi.

17Ñuca c'uyashcalla, manaraj pacarijpi

manaraj achijyajpi utca tigramupai.

Beter urcu jahuacunapica corzo shina,

mana cashpaca malta taruga shina callpaiyari.