DEUTERONOMIO 16 - Quichua Chimborazo Bible

Huatanta quimsa fiestata rurachun mandashcami(Ex 23.14-17; 34.18-24)

1Cancunataca Abib quillapi shuj tutami Egiptomantaca Mandaj Dios cancunapaj Taita Diosca llujshichimurca. Chai quillataca amataj cungaringuichijchu. Chaimanta Abib quillapica, Mandaj Dios cancunapaj Taita Diosta yuyarishpa Pascua fiestata ruranguichij.

2Mandaj Dios cancunapaj Taita Diosman Pascuapi cuna cashca ovejata, vacataca Mandaj Dios paipaj shutita churangapaj agllashca pueblopi huañuchishpa cunguichij.

3Chai aichataca, levadurahuan rurashca tandahuanca ama micunguichijchu. Canchis punllata levadura illajlla tandahuan micunguichij. Cancunaca Egiptomantaca callpashpami llujshimurcanguichij. Egiptomanta llujshimushca punllata tucui cancunapaj causaipi yuyarinapajmi chashna rurana canguichij.

4Chai canchis punllacunapica, tucui cancunapaj llajtapimi cancunapaj c'uchupica levadurataca mana charina canguichij. Shinallataj callari punllapaj chishipi cunapaj huañuchishca aichataca cayandijpajca ama imata saquinguichijchu.

5Chai Pascua ovejataca Mandaj Dios cancunapaj Taita Dios cancunaman cushca maijan pueblocunapipishca mana huañuchinachu canguichij.

6Ashtahuanpish Mandaj Dios cancunapaj Taita Dios paipaj shutita churangapaj agllashca pueblopimi chaitaca rurana canguichij. Egiptomanta cancuna inti huashicui horaspi llujshimushcamantaca chai horasllatajmi Pascua ovejataca Mandaj Diosman cuna canguichij.

7Chai aichataca Mandaj Dios cancunapaj Taita Dios agllashca pueblomi cusashpa micuna canguichij. Cayandij tutamantaca cancunapaj huasicunaman tigrashpa ringuichijlla.

8Levadura illajlla tandataca, sujta punllacunata micunguichij. Canchis punlla tucujpica, Mandaj Dios cancunapaj Taita Diospajlla jatun fiestami canga. Chai punllapica ama trabajanguichijchu.

9Granocunata cuchui callarishcamantapacha canchis semanacunata yupanguichij.

10Ña canchis semana tucujpica, Mandaj Dios cancunapaj Taita Diosta alli ningapaj jatun fiestata ruranguichij. Chai punllapica Mandaj Dios cancunapaj Taita Dios cancunaman ima shina cushca shinallataj tucui shunguhuan cunguichij.

11Mandaj Dios cancunapaj Taita Dios paipaj shutita churangapaj agllashpa paipaj shutita churashca pueblopi cushicunguichij. Chaipica, cancunapish, cancunapaj churicunapish, cancunapaj ushushicunapish, cancunapajta ruraj c'aricunapish, huarmicunapish, cancunapaj pueblocunapi causaj levitacunapish, shujtaj llajtamanta cajcunapish, yaya mama illaj huahuacunapish, cancunapurapi causaj viudacunapishmi Mandaj Dios cancunapaj Taita Diospaj ñaupajpi cushicuna canguichij.

12Egiptopi shujtajpajta rurashpa causashcata yuyaringuichij. Chaimanta tucui cai chaitataj pajtachichun nishcacunata huaquichishpa pajtachinguichij.

13Granocunata, uvata tucui tandashca q'uipaca, ramacunahuan chugllacunata rurashpa canchis punllacunata jatun fiestata ruranguichij.

14Chai jatun fiesta punllacunapica cancunapish, cancunapaj churicunapish, ushushicunapish, cancunapajta ruraj c'aricunapish, huarmicunapish, levitacunapish, shujtaj llajtamanta cajcunapish, yaya mama illaj huahuacunapish, viudacunapish cancuna causanpi causajcunaca tucuicunami cushicuna canguichij.

15Mandaj Dios cancunapaj Taita Diosta alli ningapajca pai agllashca pueblopi, canchis punllacunata jatun fiestata ruranguichij. Chaipimi Mandaj Dios cancunapaj Taita Diosca cancunapaj chagracunapipish, cancunapaj maquihuan imata rurashcacunapipish ashtahuan allicunata cunga. Chashna cajpica chai punllaca yallitajmi cushicunguichij.

16Mandaj Dios agllashca pueblopica, cada huatapaj quimsa cutinmi cai fiestacunapimi ricurigrina canguichij: Levadura illajlla tandata micuna jatun fiestapi, granota tandashcamanta cushicuna jatun fiestapi, ramacunahuan chugllacunata rurashca jatun fiestacunapimi tucui c'aricuna Mandaj Dios cancunapaj Taita Diospaj ñaupajpi ricurigrina canguichij. Chai jatun fiesta punllacunapica ni pi ama Mandaj Diospaj ñaupajpica chushaj maquilla ricurigringuichijchu.

17Ashtahuanpish tucuicunami Mandaj Dios cancunapaj Taita Dios cancunaman cushca shinallataj, paiman cuna cashcataca apashpa rina canguichij.

Cashcata rurajcuna cachun mandashcami

18Mandaj Dios cancunapaj Taita Dios, pueblocunata cada ailluman ña cujpica, chai pueblocunapica juezcunata shujtaj mandajcunata churanguichij. Paicuna cashcatataj ricuchishpa mandachuncuna.

19Juezcuna cachun churashcacunaca cashcata ruranataca ama saquinguichijchu. Ama ñahuita ricushpalla imatapish ninguichijchu. Camaritapish ama japinguichijchu. Camarita japinaca yachaisapacunapaj ñahuitapish huichcanllami. Cashcata ruraj mandajcunapish cashcata ricushpa allichinataca saquinllacunami.

20Mandaj Dios cambaj Taita Dios cushca llajtata japishpa causangapajca tucui causaipi cashcatataj rurashpa causanataca ama saquichu.

21Mandaj Dios cambaj Taita Diospaj can shayachishca altar c'uchupica, Asera diospaj ima yuracunata ñataj tarpunguichijman.

22Rumi diostapish ñataj ruranguichijman. Chaitaca Mandaj Dios cancunapaj Taita Diosca manataj ricunachinchu.