2 CRÓNICAS 4 - Quichua Chimborazo Bible

Diospaj huasipi imallata Salomón rurachishcami(1 R 7.23-51)

1Salomonca, broncellamantatajmi shuj altarta rurachirca. Chai altarca largomanca, iscun metro, anchomanpish iscun metrollatajmi carca. Altomanca, chuscu metro chaupimi carca.

2Shinallataj yacuta churangapajpish broncemanta shuj pailatami rurachirca. Chai pailaca anchomanca chuscu metro chaupimi carca, muyujta medijpica chunga quimsa metro chaupimi carca. Altomanca ishqui metro ishqui chunga pichca centimetromi carca.

3Chai paila filo uranij tucui muyundij quinritaca, calabazacunatajllata ishqui filata rurashcami tiyarca. Cada chuscu chunga pichca centimetropimi, chunga calabazacuna tiyarca. Chai calabazacunatajllataca, pailallahuantajmi shujllata rurashca carca.

4Chai jatun pailaca, broncellamantataj rurashca chunga ishqui c'ari huagracunapaj jahuapimi tiyacurca. Chai huagracunaca quimsaca huichiman ñahui, quimsaca uriman ñahui, quimsaca inti llujshin ladoman ñahui, quimsaca inti yaicun ladoman ñahuimi shayacurcacuna. Chai huagracunaca chai jatun paila paicunapaj jahuapi tiyacujpimi, umacunalla canllaman ricuricurca.

5Chai pailaca, canchis centímetro chaupihuan racumi carca. Chai pailapaj shimica, lirio sisatajlla rurashcami carca. 3.000 bato yacutami apaj carca.

6Shinallataj maillangapaj yacuta charingapajmi, broncellamantataj chunga malta tanquecunata rurarca. Chai tanquecunataca, Diospaj huasi c'uchupimi pichcataca alli ladoman, pichcataca lluqui ladoman churarca. Chai tanquecunapi apamushca yacuhuanca, tucui rupachingapaj Diosman cushca animalcunapaj aichatami maillajcuna carca.

7Shinallataj curimantami, chunga candelabrocunata rurarca. Chaicunataca Diospaj huasi ucupimi pichcataca alli ladoman, pichcataca lluqui ladoman churarca.

8Chunga mezacunatapish rurashpami, chai mezacunataca Diospaj huasi ucullapitaj pichcataca alli ladoman, pichcataca lluqui ladoman churarca. Curillamantatajmi patsaj jatun tasacunata rurarca.

9Shinallataj curacunapajpish uchilla ucuta, tucuicuna shayanapajpish jatun ucutami rurarca. Chai ucu pungucunataca, broncehuanmi jahuata churarca.

10Jatun pailataca Diospaj huasi alli ladopica, inti llujshin uranij ladomanmi churarca.

11Hiram runallatajmi mangacunatapish, palacunatapish, tazacunatapish rurarca. Chashnami Hiram runaca, Mandaj Diospaj huasipaj chai charinacunataca tucuita Salomón mandashca shinallataj rurashpa tucuchirca.

12Ishqui jatun pilarcunapish, cordoncunapish, pilarcuna jahuapi caj capitelcunapish, ishqui jatun bolacunapish, chai capitelcunapi muyuchishpa churashca linchitajllacunapishmi carca.

13Shinallataj pilarcuna uma jahuapi tiyaj capitelcuna umapi pilluchingapaj ishqui linchicunapi churashca, 400 granadacunatapish paimi rurarca.

14Carretacunatapish, chai carretacunapi churashca tanquecunatapishmi pai rurarca.

15Yacuta churana jatun pailatapish, chai pailata aparicuj chunga ishqui huagracunatapish,

16mangacunatapish, palacunatapish, trinchecunatapishmi rurarca.

Jatun mandaj Salomonca, Mandaj Diospaj huasipajca, ashtahuan alli broncemantami tucui chai charinacunataca Hiram-abi runaman rurachirca.

17Tucui chaicunataca Jordán yacu pambapi tiyaj Sucot pueblohuan, Seredata pueblohuan chaupipi caj arcilla allpatami rurachirca.

18Salomonca yallitaj achca charinacunatami broncemanta rurachirca. Chashna achca cashcamantami mana pezachirca.

19Chashnami Salomonca, Taita Diospaj huasipaj tucui charinacunata rurachirca. Curi altartapish, Diospajlla ch'icanchishca tandata churana mezacunatapish,

20candelabrocunatapish, chaicunapi churana lamparacunatapishmi rurachirca. Chaicunaca ashtahuan alli curimanta rurashcami carca. Chai candelabrocunahuan lamparacunahuanca, Diospajlla ch'icanchishca ucu ñaupajpimi, mandashcapi nicushca shinallataj ninata japichishpa charijcuna carca.

21Sisatajllacunata rurashcacunapish, lamparacunapish, tenazacunapish ashtahuan alli curimanta rurashcami carca.

22Rupashca mechacunata anchuchinacunapish, jatun tazacunapish, cucharacunapish, inciensota rupachinacunapish alli curillamantataj rurashcami carca. Chaicunatapishmi rurachirca. Diospajlla ch'icanchishca ucu pungucunatapish, Diospajlla ucu pungucunatapish, punta jatun pungucunatapish curillamantatajmi rurarca.