NEHEMÍAS 3 - Quichua Chimborazo Bible

Jatun pircataca picunalla maicamalla allichishcami

1Curacunata mandaj Eliasibca caishuj curacunandij jatarishpami, Ovejacunata yaicuchina punguta rurarcacuna. Punguta churana patacunata allichishpaca, pungucunatami churarcacuna. Paicunaca pircacunatapish Hamea torremantaca Hananeel torrecamami pircarcacuna.

2Paicuna pircashcamanta shuj mirgataca Jericopi causajcunami pircarcacuna. Jericocuna pircashcamanta shuj mirgataca, Imripaj churi Zacurmi pircarca.

3Senaapaj churicunami Chalhuahuan yaicuna pungutaca allichircacuna. Paicunaca pungucunata rurashpa churashpami, chai pungucunapica cerraduracunata, cerrojocunatapish churarcacuna.

4Chai pungu c'uchumanta shuj mirgataca, Cospaj nieto Uriaspaj churi Meremotmi pircarca. Pai pircashca c'uchumanta shuj mirgataca Mesezabeelpaj nieto Berequiaspaj churi Mesulammi pircarca. Pai pircashca c'uchumanta shuj mirgataca, Baanapaj churi Sadocmi pircarca.

5Pai pircashca c'uchumantaca tecoitacunami pircarcacuna. Paicunata mandajcuna Jatun Diospajta mana rurashun nijpipish paicunaca rurarcallacunami.

6Mauca pungu nishcataca Paseahpaj churi Joiada, Besodiaspaj churi Mesulammi allichircacuna. Chai punguta rurashpa pungu shayanapi churashpaca cerraduracunata, cerrojocunatapishmi churarcacuna.

7Chai pungu c'uchumanta shuj mirgataca Gabaonmanta Melatías, Meronotmanta Jadón, Gabaonmanta caj runacuna, Mizpamanta caj runacunapishmi pircarcacuna. Paicunaca jatun yacumanta ch'imba ladoman caj mandajpaj ucupimi causarcacuna.

8Paicuna pircashca c'uchumanta shuj mirgataca cullquimanta charinacunata ruraj Harhaiapaj churi Uzielmi pircarca. Paitaca mishquijllata ashnaj jambicunata rurajpaj churi Hananiasmi ayudarca. Chashnami Jerusalén pircataca ancho pircacama cutin allichishpa tucuchircacuna.

9Paicuna pircashca c'uchumanta shuj mirgataca Hurpaj churi Refaiasmi pircarca. Paica Jerusalén chaupi pueblota mandajmi carca.

10Paicuna pircashca c'uchumanta shuj mirgataca Harumafpaj churi Jedaiasmi paipaj huasi c'uchucama pircarca. Pai pircashca c'uchumanta shuj mirgataca Hasabniaspaj churi Hatusmi pircarca.

11Pai pircashca c'uchumanta shuj mirgataca Harimpaj churi Malquías, Pahat-moabpaj churi Hasubmi pircarca. Hornocuna tiyan c'uchupi caj torretapish paicunallatajmi pircarca.

12Paicuna pircashca c'uchumanta shuj mirgataca Halohespaj churi Salummi paipaj ushushicunandij tucushpa pircarca. Salumca Jerusalén chaishuj chaupi pueblota mandajmi carca.

13Pugru Pamba ladoman caj pungutaca Hanún runami, Zanoapi causajcunahuan tucushpa allichirca. Chai pungucunata cutin churashpaca, cerraduracunata, cerrojocunatapishmi churarcacuna. Pircacunatapish 450 metrotami Mapacunata llujshichishpa shitana pungucama pircarcacuna.

14Mapacunata llujshichishpa shitana pungutaca Recabpaj churi Malquiasmi allichirca. Paica Bet-haquerem llajtata mandajmi carca. Punguta churana patacunata allichishpa punguta churashpaca, cerraduracunata, cerrojocunatapishmi churarca.

15Yacu pugyuman llujshina pungutaca Colhozepaj churi Salummi allichirca. Paica Mizpa llajtata mandajmi carca. Punguta churana patacunata allichishpa punguta churashpaca cerraduracunata, cerrojocunatapishmi churarca. Pircatapish jatun mandajpaj jardín c'uchullapi caj Siloé tanque c'uchumantaca, Davidpaj puebloman uriyamuna gradacunacamami pircarca.

16Pai pircashca c'uchumanta shuj mirgataca Azbucpaj churi Nehemiasmi pircarca. Paica Bet-sur chaupi llajtata mandajmi carca. Paica Davidta pambashca c'uchucamami pircarca. Yacu tanquepish, C'ari C'aricunapaj huasipish chaipimi carca.

17Pai pircashca c'uchumanta shuj mirgataca levitacunami pircarcacuna. Chai c'uchumantaca Banipaj churi Rehummi pircarca. Chai c'uchumantaca Keila chaupi llajtata mandaj Hasabiasmi pai mandacushca llajtapaj shutipi pircarca.

18Hasabias pircashca c'uchumanta shuj mirgataca paipaj huauquicunami pircarca. Chai c'uchumanta shuj mirgataca Henadadpaj churi Bavaimi pircarca. Paica Keila caishuj chaupi llajtata mandajmi carca.

19Bavai pircashca c'uchumanta shuj mirgataca Jesuapaj churi Ezermi macanacunacunata huaquichina huasi c'uchumanta janaj esquinacama pircarca. Paica Mizpa llajtata mandajmi carca.

20Chai esquinamantaca Zabaipaj churi Barucmi curacunata mandaj Eliasib curapaj huasi pungucama shungumanta cushicushpa pircarca.

21Chai pungumanta Eliasibpaj huasita pasangacamaca Cospaj nieto Uriaspaj churi Meremotmi pircarca.

22Pai pircashca c'uchumanta shujtaj mirgataca, llano pambapi causaj curacunami pircarcacuna.

23Paicuna pircashca c'uchumanta shuj mirgataca Benjamín, Hasub runacunami paicunapaj huasi derechocama pircarcacuna. Paicuna pircashca c'uchumanta shuj mirgataca Ananiaspaj nieto Maasiaspaj churi Azariasmi paipaj huasi chaicama pircarca.

24Pai pircashca c'uchumanta shuj mirgataca Henadadpaj churi Binuimi pircarca. Paica Azariaspaj huasimantaca caishuj esquinacamami pircarca.

25Uzaipaj churi Palalca jatun mandajpaj huasi c'uchupi caj jatun torre ch'imbapurapi caj esquinatami pircarca. Chai torreca prezuna huasi canllapimi carca. Pai pircashca c'uchumantaca Farospaj churi Pedaiasmi pircarca.

26Pai pircashca c'uchumantaca Ofel pueblopi causashpa Diospaj huasipi Diospajta rurajcunami pircarcacuna. Paicunaca inti llujshin ladoman caj Yacuman llujshina pungucamami pircarcacuna. Jatun torretapish allichircacunami.

27Paicuna pircashca c'uchumanta shuj mirgataca tecoitacunami pircarcacuna. Paicunaca jatun torre ch'imbapuramantaca Ofel pircacamami pircarcacuna.

28Caballocunahuan yaicuna pungumanta shuj mirgataca curacunami paicunapaj cada huasi derechota pircarcacuna.

29Paicuna pircashca c'uchumanta shuj mirgataca, Imerpaj churi Sadocmi, paipaj huasi derechocama pircarca. Pai pircashca c'uchumanta shuj mirgataca, Secaniaspaj churi Semaiasmi pircarca. Secaniasca Inti llujshin ladoman caj pungupi cuidajmi carca.

30Pai pircashca c'uchumanta shuj mirgataca, Selemiaspaj churi Hananías, Salafpaj pichca churicunapaj q'uipa churi Hanunmi pircarcacuna. Paicuna pircashca c'uchumanta shuj mirgataca, Berequiaspaj churi Mesulammi paipaj huasi derechocama pircarca.

31Paicuna pircashca c'uchumanta shuj mirgataca, cullquimanta imatapish rurajpaj churi Malquiasmi Diospaj huasipi Diospajta rurajcunapaj huasi derechocama, c'atushpa randishpa causajcunapaj huasi derechocama pircarca. Chai huasicunaca, llaquicunata allichina ch'imba nijpimi carca. Esquinapi caj huasicamami pircarca.

32Chai esquinamantaca Ovejacunahuan yaicuna pungucamaca, cullquimanta imatapish rurajcuna, c'atushpa randishpa causajcunami pircarcacuna.