SOFONÍAS 1 - Quichua Chimborazo Bible

Mandaj Dios p'iñarishpa llaquichina punllamanta

1Sofoniasca Cusi shuti runapaj churimi carca. Cusica Gedaliaspaj churimi carca. Gedaliasca Amariaspaj churimi carca. Amariasca Ezequiaspaj churimi carca. Amón shuti runapaj churi Josías, Judá llajtata mandacui huatacunapimi, Mandaj Diosca chai Sofoniastaca chashna nirca.

2Mandaj Diosca cashnami nin: “Cai pachapi imalla tiyajcunataca tucuitami chingachisha.

3Runacunatapish, animalcunatapish, huairata purij alasyuj animalcunatapish, mama cuchapi causaj chalhuacunatapish, Diosta mana manchaj runacunatapishmi chingachisha. Cai pachapi causaj runacunataca, tucuicunatami chingachisha” ninmi Mandaj Diosca.

4“Shinallataj Judá llajtapi causajcunatapish, Jerusalén pueblopi causajcunatapish tucuicunatami ñuca maquita chutashpa llaquichisha. Baalmanta mirga mirga saquirishcacunatapish, paita servij curacunatapish caimantaca tucuitami anchuchisha.

5Huasi jahuaman huichiyashpa luzerocunata cungurijcunatapish, Mandaj Diospish, Milcom diospish ricucunmi nishpa llullashpa cungurijcunatapishmi chingachisha ninmi.

6Shinallataj Mandaj Diosta caticushca jahua paimanta anchurijcunatapish, mana mashcajcunatapish, paita mana imata tapujcunatapish chingachingami” nishpami huillarca.

7Mandaj Jatun Diospaj ñaupajpica upalla caichigari. Mandaj Dios shamuna punllaca ñallamari pajtamucun. Mandaj Diosca, paita p'iñachijcunata huañuchichunca ñamari agllashcata charicun.

8“Mandaj Dios ñucata p'iñachijcunata huañuchicui punllallatajmi mandajcunatapish, jatun mandajpaj churicunatapish, shujtaj llajta churanata churarijcunatapish llaquichisha.

9Chai punllallatajmi pungu jahuata saltajcunatapish, amocunapaj huasicunapi shuhuashpalla ima charinacunahuan jundachijcunatapish, umajcunatapish llaquichisha.

10Mandaj Dios ñucatajmi cashnapish nini: Chai jatun llaqui punllapica Chalhua pungumantaca, ñucanchijta llaquihuayari nishpa caparirinacushcami uyaringa. Caishuj pungumantaca llaquinayajta huacashcami uyaringa. Lomacunapipish jatun mancharina llaquicunami ricuringa.

11Mactespi causajcunalla, huacaichigari. Caipi c'atujcunapish, randijcunapish tucuimari chingarishca. Cullquita apamujcunapish tucuimari chingarishca.

12Chai punllapica luzta japichishpami, Jerusalén pueblopi causajcuna imalla rurashcataca ricusha. Siquiyashca vino shina imata mana manchashpa causacuj runacunatapish llaquichishami. Paicunaca shungu ucullapica: Mandaj Diosca allitapish, mana allitapish mana rurangachu nincunami.

13Chaimantami paicuna imalla charishcacunataca, shujtajcuna tucuita quichushpa apangacuna. Paicunapaj huasicunatapish urmachishpami chingachingacuna. Huasicunata rurashpapish, mana chaipi causangacunachu. Uvata tarpushpapish, vinotaca mana ubyangacunachu” ninmi.

14Mandaj Dios jatunta llaquichina punllaca ñallamari chayamucun. Chai punllaca ñallamari pajtamucun. Mandaj Dios llaquichicui punllaca, jatun llaqui, huacai punllami canga. Chai punllapica, c'ari c'ari tucushca runacunapish capariringacunami.

15Chai punllaca llaqui, huacai, nanarina, caparirina, tucurina punllami canga. Chai punllaca manchanana amsa tuta, p'uyuhuan tapashcapish, amsajlla tutapishmi canga.

16Chai punllaca trompetapi tocashcapish, pueblo muyundij jatun pirca jahuacunamanta caparirinacushpa huacashcapish, jatun torrecuna jahuamanta caparirinacushcapishmi uyaringa.

17“Mandaj Dios ñucata, p'iñachishpa millaita ruraj runacunataca jatuntami llaquichisha. Chaimantami paicunaca ñahui mana ricuj shina musparishpa puringacuna. Paicunapaj yahuarpish allpa shinami jicharinga. Paicunapaj aichapish mapa shinami shitaringa” ninmi.

18Mandaj Dios jatunta p'iñarishpa llaquichicui punllapica, paicunapaj cullquipish, curipish mana quishpichi tucungachu. Ashtahuanpish Mandaj Diosca jatunta p'iñarishpami, cai pachataca ninahuan tucuita tucuchinga. Cai pachapi causajcunataca, ñapish tucuita tucuchingallami.