EFESIOS 4 - Quichua Chimborazo Bible

Diospaj Espiritumi shujllata ruran

1Ñucaca, Mandaj Jesuspi shujlla cashcamantami prezupi cani. Cancunataca Dios imapaj cayashca shinataj alli purichunmi cashna rogani:

2Ama jatun tucushpa, manso shunguhuan, c'uyaimantaca caishujmanta chaishujmanta ama p'iñarishpa llaquicunata apaichijlla.

3Espíritu shujllata rurashpa, sumaj causaipi churashcapi chai yuyailla causaichij.

4Shuj cuerpollami tiyan, Espiritupish shujllami. Chaimanta shujlla shuyanata shuyachun cayashcacunami canguichij.

5Shinallataj shujlla Mandaj, shujlla crina, shujlla bautismo,

6shujlla Dios tucuicunapaj Yayami. Paica tucuicunapaj jahuapimi, tucuicunallatatajmi imatapish rurachicun, tucuicunapipishmi.

7Ashtahuanpish Cristoca mana c'uyaipajta c'uyashcamantami, ñucanchijmanca pai cusha nishca shina cada quiquinman rurai tucunallata curca.

8Chaitami:

“Jahua pachaman huichiyashpaca, prezu cajcunatami prezu aparca.

Gentecunamanca Dios cusha nishca rurai tucunatami curca” ninmi.

9“Huichiyarca” nishcaca ¿imataj? chaica, allpamanta ashtahuan ucumanraj uriyarca nisha ninmi.

10Chai uriyajllatajmi, tucuipi junda cangapaj, tucui pachacunamanta jahuaman huichiyarca.

11Paillatajmi shujcunataca apostolcuna, caishujcunataca profetacuna, chaishujcunataca alli huillaita huillajcuna, maijancunataca michijcuna yachachijcunapish cachun churarca.

12Diospajta rurashpa Cristopaj cuerpota mirachichunmi, jucha illajcunataca chashna allichirca.

13Chashna cashpami, ñucanchijca crinapi ashtahuan shujlla tucushpa, Diospaj Churita ashtahuan rijsishpa, sinchi crij tucushpa, Cristo ima shina cashcahuan junda canaman chayashun.

14Chashna cashpami, caita chaita apaj huaira shina panda yachachinataca, huahuacuna shina mana crishun. Chaicunaca, umangapaj alli yachajcuna cashpami, ima shinapish panda yachachinata allichincuna.

15Shina cajpipish Cristomari uma. Pai shina tucungacama mana llullapi, c'uyaipi huiñashunchij.

16Tucui crijcunaca paihuan shujlla cuerpo cashpami, aicha mucucuna huatarishca shina alli churashca cashpa paillamantataj huiñangapaj chasquicunchij. Chashna cashpami, tucui crijcuna quiquin rurana cashcata alli rurashpa, c'uyaihuan huiñashpa miraricun.

Mushuj causaica Cristopimi

17Mandaj Jesuspaj shutipimi, caita nisha nini: Caishuj mana judiocuna shina ña ama purichijchu. Paicunaca, paicunapaj yanga yuyaihuanmi causancuna.

18Paicunapaj yuyaicuna amsa cashcamanta, mana yachashcamanta, shungucunapish sinchi cashcamanta, Dios cushca causaimantapish carupi cashcamantami mana chasquincuna.

19Paicunaca mana pingaj, cacharishcacuna tucushpami, ashtahuan charijyanata munashcamanta tucui laya mapacunata rurancuna.

20Ashtahuanpish cancunaca mana chashna tucunatachu Cristomantaca yacharcanguichij.

21Cancunaca Jesuspi tiyaj, mana llullatataj paimanta yachachishcata uyashcataj cashpaca, mana chashnachu cana canguichij.

22Ñaupa ima shina causashca, mauca causaitaca saquichij. Chai causaica, umaj munaicunahuan ismushpa tucuricujmi.

23Cancunapaj shungutapish, yuyaitapish mushujyachichij.

24Mushuj causaita churarichij. Mana llullapi nishca shina, cashcata rurachun, jucha illaj cachun, Diosman rijchaj cachun mushujyachishcami canguichij.

25Chaimanta llullanata saquishpa, tucuicuna caishujta chaishujta ama llullanacushpa parlanacuichijchu. Tucuicunami chai cuerpopajlla miembrocuna canchij.

26P'iñarishpapish ama juchallichijchu. Inti huashicungacamaca ama p'iñalla caichijchu.

27Diablo millaita rurachichunpish ama saquichijchu.

28Maijan shuhua cashca cashpapish, ama ashtahuan shuhuachun. Chaipaj randica, trabajachun. Ima illajlla cajcunaman chaupinata charinapaj, quiquin maquihuan imatapish allita rurachun.

29Cancunapaj shimimantaca, ima mapa shimicuna ama llujshichun. Ashtahuanpish uyajcuna sinchiyachun allicunallata rimaichij.

30Diospaj jucha illaj Espirituta ama llaquichichijchu. Tucui imamantapish quishpichishpa pushana punllacama paihuan sellashcacunami canguichij.

31Cancunamantaca shujtajcunahuan p'iñalla canata, p'iñarij canata, jahualla p'iñarinata, caparirinata, c'amij canata, millai shungu canatapish tucui anchuchichij.

32Chaipaj randica, caishujhuan chaishujhuan alli caichij. Cristopi cancunata Dios perdonashca shinallataj, caishuj chaishuj llaquijcuna, perdonanacujcuna caichij.