JEREMÍAS 33 - Quichua Chimborazo Bible

Jerusalenta q'uipa punllacunapi allichinamanta

1Jeremiasca, cárcel ñaupaj pambapi prezu tiyacurcarajmi. Chaillapitaj cajpi, Mandaj Dios cutintaj paiman rimashpa huillachishca shimicunami caipica tiyacun. Jeremiasca cashnami huillarca:

2“Mandaj Diosca cai pachata rurajmi. Tucuita rurashpa sinchita churajmi. Paica Mandaj Dios shutimi, paimi cashna nin:

3Ñucata caparilla, ñucaca cutichishallami. Can mana yachashca, pacalla tiyacuj jatun yachanacunata yachachishallami ninmi.

4Israelcunata Mandaj Diosca ariete nishca macanacunacunahuanpish, hachacunahuanpish urmachinapaj tiyacuj cai Jerusalén pueblo huasicunamantapish, Judá llajtata jatun mandajcunapaj huasicunamantapish cashnami nin:

5Caipi causajcunallatajmi, caldeo soldadocunahuan macanacunaman espadacunahuan llujshincuna. Chaimantami cai huasicunapica, huañushcacunata jundachincuna. Paicunallataj yallitaj millaita rurashpa causashcamanta yallitaj p'iñarishpami, cai pueblopi causajcunamantaca ñuca ñahuita shujman churarcani. Chashna yallitaj p'iñarishpami, cai jatun llaqui tucuchun saquircani.

6Shina cashpapish alliyanatapish, jambitapish apamushami, jambishpa alliyachishami. Chaimantaca tucui llaquimanta huaquichishpami, mana tucurij sumaj causaita cusha.

7Judá llajtamanta prezu apashcacunatapish, Israel llajtamanta prezu apashcacunatapish tigrachimushami. Chaimantaca callaripi cashca shinallatatajmi allichishpa churasha.

8Paicuna mana allita rurashpa, ñucata p'iñachishpa causashcataca tucuitami p'ichasha. Ñucata c'ariashpa juchata rurashpami, ñucata llaquichircacuna. Chai juchacunataca tucuitami perdonasha.

9Ñucapajca jatunta cushicunami cangacuna. Tucui cai pacha llajtacunaca, paicunamantami ñucataca jatun nishpa, sumaj nishpa alabangacuna. Israelcunapaj ñuca imalla allita rurashcata tucuicuna uyashpami manchangacuna, chujchungacuna. Paicuna mancharina allicunata rurashpami, sumaj causaita cusha. Chaita ricushpami, ñucata manchangacuna” ninmi.

10Mandaj Diosca cashnapishmi nin: “Cancunaca cai Jerusalén pueblotapish, Judá llajtapi caj caishuj pueblocunatapish: Shuj runallapish, animalcunallapish illaj, shitashcami saquirin ninguichijmi. Tucui pueblo callecunaca cancuna nishca shina runacunapish, animalcunapish illaj shitashcamari saquirin.

11Shina cashpapish chai tucui pueblocunapimi jatun cushicuihuan cantashca uyaringa, cazarajcuna cantashcapishmi uyaringa. Tucuita Mandaj Diosta alabaichij, Mandaj Diosca allimari. Paica huiñai huiñaita c'uyacunllamari nishpami cantangacuna. Prezu apashcamanta ñuca tigrachimushcacunami tucuicuna ñucaman cuna cashcata apashca ñuca huasiman shamushpa, diosolopagui nishpa cantangacuna. Cai llajtataca callaripi cashcata shinami, sumajta allichisha” ninmi Mandaj Diosca.

12Tucuita Mandaj Diosca cashnapishmi nin: “Runacunapish, animalcunapish illaj, shitashca saquirij cai pueblo c'uchupipish, tucui pueblocuna c'uchupipish, llajtapipish achca animalcunata michishpa purijcunami, chugllacunata rurashpa cuidangacuna.

13Urcucunapi caj pueblocunapi, Sefela shuti pamba pueblocunapi, Neguev shuti pamba pueblocunapi, Benjamín llajtapi, Jerusalén pueblo muyundij pambacunapi, Judá llajtapi caj tucui caishuj pueblocunapipishmi michijcunaca, paicunapaj canlla animalcunata yupangacuna” ninmi Mandaj Diosca.

14Mandaj Diosca caitapishmi nin: “Israelcunapajpish, Judá runacunapajpish ñuca imalla allicunata rurashami nishcata rurashpataj ricuchina punllacuna pajtangatajmi.

15Chai punllacunapi, chai huatacunapica Davidpaj huahuacunapuramantami shuj mushuj yurata shina huiñachisha. Paica cashcata rurajmi canga. Paimi cai llajtapica, tucuicunapaj cashcata ricushpa alli mandanga.

16Chai punllacunapica, Judá llajtaca tucui llaquimanta quishpichishcami canga. Jerusalenpi causajcunapish ima manchai illajllami causangacuna. Paicunaca: Mandaj Diosmi ñucanchijpajca cashcata ruran ningacunami.

17Davidpaj huahuacunapuramantaca israelcunata mandanapi tiyarijca, manataj illangachu.

18Shinallataj curacunapish, levitacunapish animalcunata ñuca ñaupajpi tucuita rupachinamanta, granocunata ñucaman cushpa rupachinamanta, animalcunata punllanta ñucaman cushpa huañuchinamantaca manataj illangachu” ninmi.

19Mandaj Diosca Jeremiastaca cashnapishmi nirca:

20“Ñuca, Mandaj Diostajmi cashna nini: Ñucaca punlla canapitaj punlla cachun, tuta canapitaj tuta cachunmi mandashpa churarcani. Chaitaca cancuna shujtajyachishpa, punllataca tuta canapi, tutataca punlla canapi churajpica,

21ñucapish ñucata servij Davidman ari nishcata p'aquishachari. Pai tiyashcapi ama pi tiyarishpa mandachun mana ashtahuan huahuacunata cushachari. Shinallataj ñucapajta ruraj levitacunahuanpish, curacunahuanpish ari ninacushcatapish p'aquishachari.

22Jahua pachapi tiyaj luzerocunatapish, mama cucha uripi tiyaj t'iyu allpatapish pi mana yupaipajchu. Ñucata servij Davidpaj huahua huahuacunatapish, ñucallatataj servij levitacunapaj huahua huahuacunatapish chashnallataj pi mana yupai tucuipajtami mirachisha” ninmi.

23Mandaj Diosca Jeremiastaca cashnapishmi nirca:

24“Mandaj Diosca paillatajmi Israel aillucunatapish, Judá aillutapish agllashca carca. Shina cashpapish, cunanca ñami shitashca nishpa chai runacuna rimacujtaca ¿manachu uyangui? Chashna nishpami paicunaca ñuca agllashcacunataca, ña mana llajta cashcata yuyashpa yangapi charicuncuna.

25Ashtahuanpish ñucaca cashnami nini: Punllapish, tutapish ñuca mandashca shina mana tiyajpi, jahua pachapish cai pachapish ima shinalla tiyachun ñuca mandashca shina mana tiyajpica,

26ñucapish Jacobopaj huahuacunata shitaimanchari, ñucata servij Davidpaj huahuacunatapish cungarimanchari. Shamuj punllapica Abrahampaj, Isaacpaj, Jacobopaj huahua huahuacunata mandachunca, ña manachari Davidpaj huahua huahuapuramanta mandajta churaiman. Ashtahuanpish ñucallatajmari caimanta prezu apashcacunataca llaquishpa tigrachimusha” nircami.