1 JUAN 2 - Quichua Chimborazo Bible

Cristoca ñucanchijmanta rimajmi

1Ñuca huahuacunalla, cancuna ama juchallichunmi caicunata quillcani. Shina cashpapish maijan juchallishpaca, ñucanchijmanta Yayahuan rimajtami charinchij. Paica cashcata ruraj Jesucristomi.

2Paica ñucanchij juchacunamanta huañushpa Dioshuan alli tucunacuchijmi. Mana ñucanchij juchacunallamantachu, ashtahuanpish tucui cai pachapi causajcunapaj juchacunamantapishmi huañurca.

3Pai mandashcacunata cazushpami, paita rijsishpa causacushcata yachanchij.

4Maijanpish: “Ñucaca Diosta rijsinimi” nishpapish, pai mandashcacunata mana cazushpaca, llullanllami. Mana llullajca paipica mana tiyanchu.

5Maijanpish paipaj Shimita cazushpaca, Dios c'uyaj cashca shinallatajmi ashtahuan c'uyaj tucun. Chashna c'uyaj cashpami Cristohuan shujlla cashcata yachanchij.

6Maijanpish Dioshuan shujllami cani nijca, Jesucristo causashca shina causachun.

Mushujta mandashcami

7Huauquicuna, mana shujtaj mushuj mandashcatachu cancunamanca quillcani. Ashtahuanpish callarimanta cancuna charishca ñaupa mandashcallatatajmi quillcani. Chai mandashcatami callarimanta uyarcanguichij.

8Shina cajpipish shujtaj mushuj mandashcata shinami cancunamanca quillcani. Paipi tiyaj mana llullajmi cancunapipish tiyan. Amsaca chingaricunmi. Achijyachijtaj luzca ñami achijyachicun.

9Maijanpish luzpimi cani nishpapish paipaj huauquita p'iñajca, amsapirajmi.

10Maijanpish paipaj huauquita c'uyajca, luzpimi causacun. Paipica maijanta imapi pandachinaca mana tiyanchu.

11Maijanpish paipaj huauquita p'iñajca, amsapirajmi, amsallapitajmi puricun. Chai amsa paipaj ñahuita mana ricujta rurajpimi, maiman ricushcatapish mana yachan.

12Huahuacuna, cancunapaj juchacunataca Jesucristomanta perdonashca cajpimi, cancunamanca quillcani.

13Yayacuna, callarinapaj ña tiyajta rijsijpimi, cancunamanca quillcani.

Q'uipa huiñaicuna, diablota mishajcuna cajpimi, cancunamanca quillcani.

Huahuacuna, Diosta rijsijcuna cajpimi, cancunamanca quillcani.

14Yayacuna, callarinapaj ña tiyajta rijsijcuna cajpimi, cancunamanca quillcarcani.

Q'uipa huiñaicuna, sinchi crijcuna cashpa, Diospaj Shimi nishca shina causashpa, diablota mishajcuna cajpimi cancunamanca quillcarcani.

15Cai pachata, cai pachapi tiyajcunatapish ama c'uyaichijchu. Maijanpish cai pachata c'uyajpajca, Diospaj c'uyaica mana paipichu.

16(Aicha munaicuna, ñahui ricushpa munanacuna, charinacunahuan jatun tucuna) cai pachapi ima tiyajcunaca, mana Diosmantachu, cai pachamantami shamun.

17Cai pachaca, tucui munaicunandijmi chingaricun. Ashtahuanpish Diospaj munaita rurajca, huiñaitami causanga.

Cristota p'iñaj cajmanta

18Huahuacuna, ñamari tucuri punllacuna. Cancunaca Cristota p'iñaj shamunga nijtami uyarcanguichij. Chashnallatajmi cunanca Cristota p'iñajcunaca, achcacuna ricurishca. Chaimantami tucuri punllacuna cashcata yachanchij.

19Paicunaca ñucanchijpuramantami llujshircacuna, ashtahuanpish mana ñucanchijpurachu carca. Ñucanchijpura cashca cashpaca, ñucanchijhuanmi caticunman carca. Ñucanchijpurapi cajcunaca mana tucuicuna ñucanchijpura cashcata ricuchunmi chashna tucurca.

20Cancunaca Jucha Illaj Cristomantami Espirituta charinguichij. Chaimantami tucui imatapish yachanguichij.

21Cancuna mana llullata mana rijsijcuna cajpica mana quillcaimanchu carcani. Ashtahuanpish rijsijcuna cajpimi quillcani. Mana llullamantaca llullaca manataj llujshi tucunchu.

22¿Pitaj llulla? Maijanpish Jesusta mana Cristochu nijmi llullaj. Chaimari Cristota p'iñajca. Paica Yayatapish, Churitapish mana tiyashcata rurajmi.

23Jesusca mana Cristochu nijca, Yayatapish mana charinchu. Jesusca Diospaj Churimi nishpa huillajmi Yayatapish charin.

24Callarimanta imatami cancuna uyarcanguichij, chaica cancunapi catichun. Callarimanta uyashca cancunapi catijpica cancunapish Churihuan, Yayahuan shujllami canguichij.

25Ñucanchijman pai cusha nishcaca huiñai causaimi.

26Caitaca, umajcuna ima shina cancunata umasha nicushcamantami quillcarcani.

27Ashtahuanpish Jesucristomanta chasquishca Espirituca cancunapimi causacun. Chaimanta pi shujtaj yachachijtaca mana minishtinguichijchu. Cancunapi caj Espiritullatajmi, tucui imatapish yachachin. Paica cashcatataj, mana llullashpami yachachin. Pai yachachishca shina Jesucristohuan shuj shinalla catichij.

28Cunanca huahuacuna, pai ricurijpi ama manchashpa ñahui ñahui ricuringapajca, paihuan shuj shinalla catichijlla.

29Cristoca Dios munashcata ruraj cashcataca yachanguichijmi. Chaimanta maijanpish Dios munashcata ruraj cajpica, Diosmanta huacharishca cashcata yachaichij.