1Chai huatapaj canchis quillapimi, jatun mandajpaj huahua huahuapura Netaniaspaj churi Ismaelca, jatun mandajpajta rurashpa causashca maijan mandajcunandij, shujtaj chunga runacunandij Gedaliaspajman Mizpa puebloman shamurcacuna. Netaniasca Elisamapaj churimi carca. Ismaelca tucui paicunahuan shamushpami, Mizpa pueblopica Gedalías jatun micuita rurashpa carajpi tandalla micurca.
2Ña micushpaca Netaniaspaj churi Ismaelca, paihuan caj chunga runacunandij jatarishpami, Ahicampaj churi Gedaliastaca espadahuan chugrichishpa huañuchircacuna. Chashnami Safanpaj nieto Gedaliastaca huañuchircacuna. Paitaca Babilonia llajtata jatun mandajllatajmi Judá llajtata mandaj cachun churashpa saquishca carca.
3Shinallataj Ismaelca, Mizpa pueblopi Gedaliashuan causacuj Judá runacunatapish, chaipi saquishca caldeo soldadocunatapishmi huañuchirca.
4Gedaliasta pai huañuchishcataca, shuj punlla huashacama manaraj pi yachaj chayarcachu. Chaimantami chai punlla huashaca cashna tucurca:
5Siquem, Silo shuti, Samaria shuti pueblocunamantaca, pusaj chunga runacunami Mizpa puebloman shamurcacuna. Paicunaca barbasta p'icharishca, churanacunata lliquirishca, tucui aichata aspirishcami, Mandaj Diospaj huasiman apangapaj Diosman cunatapish, inciensotapish apashca shamurcacuna.
6Netaniaspaj churi Ismaelca paicuna shamucujta ricushpaca huacashpami, Mizpa pueblomanta tupanaman llujshirca. Ña tupashpaca:
–Ahicampaj churi Gedaliaspajman shamuichigari– nircami.
7Ashtahuanpish puebloman yaicujpica, Netaniaspaj churi Ismael paipaj runacunandijca japishcahuan huañuchishpami, shuj jatun jutcupi shitarcacuna.
8Chashna huañuchicujpica, chaicunapuramanta chunga runacunami Ismaeltaca:
–Ama huañuchihuaichu, ñucanchijca ñucanchij allpacunapica achca trigo chagracunatapish, cebada chagracunatapish, aceitetapish, mishquitapishmi charinchij– nircacuna.
Chashna nijpimi, mana paicunapaj familiacunata shina huañuchishpa saquirca.
9Gedaliasta ricuj shamushcamanta Ismael huañuchishpa, chai huañushca runacunata shitashca jatun jutcutaca ñaupamanmi, Israel llajtata jatun mandaj Baasa macanacunaman shamujpi, Judá llajtata jatun mandaj Asa rurachishca carca. Chai jutcupimi Netaniaspaj churi Ismaelca, huañushcacunata jundachirca.
10Chai q'uipaca Netaniaspaj churi Ismaelca, Mizpa pueblopi saquirishcacunatapish, jatun mandajpaj ushushicunatapish tandachishpami, tucuicunata apashpa Amón llajtaman rirca. Cuidaj soldadocunata mandaj Nabuzaradanmi, tucui chaicunataca Ahicampaj churi Gedaliasman mingashpa saquishca carca. Chaicunatami Ismaelca prezu aparca.
11Ismael imalla jatun llaquita rurashcataca, Careapaj churi Johananpish, paihuan caj soldadocunata mandajcunapish yachaj chayarcacunami.
12Chaimantami tucui paicunaca paicunapaj soldadocunata apashpa, Netaniaspaj churi Ismaelhuan macanacugrircacuna. Ismaeltaca Gabaón shuti pueblo c'uchupi caj jatun tanque ladopimi cati japircacuna.
13Ismaelhuan cajcunaca Careapaj churi Johanantapish, paihuan caj soldadocunata mandajcunatapish ricushpaca cushicurcacunami.
14Chaimantaca Mizpa pueblomanta llujshichishpa, Ismael prezu apacushcacunaca tucuicunami Careapaj churi Johananpajman tigrashpa rircacuna.
15Shina cajpipish Netaniaspaj churi Ismaelca, Johananta manchashpami, pusaj runacunandij callpashpa Amón runacunapaj llajtaman rirca. Chashnami Johananpaj maquimantaca quishpirirca.
16Careapaj churi Johananpish, paihuan caj soldadocunata tucui mandajcunapish Netaniaspaj churi Ismael Ahicampaj churi Gedaliasta huañuchishpa, Mizpa pueblomanta apacushca soldadocunata, huarmicunata, huahuacunata, eunucocunataca Gabaón pueblo c'uchupimi quichurcacuna. Tucui paicunata apashpami, Mizpaman tigrarcacuna.
17Chaimantaca Belén pueblo c'uchupi caj Gerut-quimam pueblopimi causagrircacuna. Egipto llajtaman rina yuyaihuanmi chaillapi causangapaj tiyarircacuna.
18Babilonia llajtata jatun mandajca, Ahicampaj churi Gedaliastami Judá llajtata mandachun churashpa saquishca carca. Netaniaspaj churi Ismael, paita huañuchishcamanta caldeocunata manchashpami, Egiptoman rinata yuyarircacuna.
Who We AreWhat We EelieveWhat We Do
2025 by iamachristian.org,Inc All rights reserved.
