LEVÍTICO 27 - Quichua Chimborazo Bible

Diospajlla ch'icanchishcacunami

1Mandaj Diosca Moisesta mandashpaca cashnami nirca:

2“Israelcunataca cashna nishpa mandai: Mandaj Diosman manapish cui tucuipajta cushatajmi nishpaca, chaimanta llujshingapajca runata llujshichinapaj mashnata cuna cashcata cashna rurachun:

3Ishqui chunga huatayuj runamanta sujta chunga huatayuj runacamaca pichca chunga siclo cullquita cuchun. Chaitaca Diospaj carpa huasipi cullquita pezanapi pezashca shinallataj cuchun.

4Huarmi cashpaca quimsa chunga siclo cullquita cuchun.

5Shinallataj pichca huatayujmanta ishqui chunga huatayuj c'aricunamantaca, ishqui chunga siclo cullquita cuchun. Huarmi cashpaca chunga siclo cullquita cuchun.

6Shinallataj shuj quillamanta pichca huatayuj c'ari huahuamantaca pichca siclo cullquita cuchun. Huarmi huahuamantaca quimsa siclo cullquita cuchun.

7Sujta chunga yalli huatacunata charij c'aricunamantaca chunga pichca siclo cullquita cuchun, huarmi cashpaca chunga siclo cullquita cuchun.

8Diospajta ruranapaj curishca maijancunaca huajcha cashamanta paimanta mashnata pagana cashcatatajca mana pagai tucujpica paitaca curapajman apachun. Curami Diospajta ruranapaj curishca caj mashnata pagai tucushcallata pagachun ninga.

9Mandaj Diosman cuna tucushca animalca, ima shina animaltami Mandaj Diosman cuna tucun chaica Mandaj Diospajllami tucunga.

10Chaimanta Mandaj Diosman yangalla animalta cuna tucushca cashpaca alli animalhuan ama cambiachun, alli animalta cuna tucushca cashpapish yangalla animalhuan ama cambiachun. Chai animalta shujtajhuan cambiajpica cambiashca animalpish, cushca animalpish Diospajlla ch'icanchishcami canga.

11Mandaj Diosman mana cuipaj mapa animal cajpica, Diosman manaraj cushpa curapajman apachun.

12Chaitaca curami alli cajtapish, mana alli cajtapish mashna valishcata ricunga. Cura mashnami valin nishcaca chaimi canga.

13Chai animalta llujshichisha nishpaca mashna valishcamanta pichcamanta shuj partehuan cuchun.

14Maijan paipaj huasita Mandaj Diosman ch'icanchishpa cujpica, chai huasitaca alli huasi cashcata, yangalla huasi cashcata cura ricushpa mashna valishcata huillachun. Mashna valishcata cura huillashcaca chaimi canga.

15Ashtahuanpish huasita Diosman cujllataj chai huasita tigra japisha nishpaca mashna valishcamanta pichcamanta shuj partehuan cuchun. Chashna rurajpica, huasica paipajllatajmi canga.

16Maijanpish paipaj allpacunamanta asha allpata Mandaj Diosman cujpica, chai allpaca mashnata tarpuj cashcaca chaimi valinga. Shuj homer cebadata tarpuna cajpica, chai allpaca pichca chunga siclo cullquimi valinga.

17Tucui imamantapish cacharirina huata tucurinca Mandaj Diosman chai allpata cujpica, cutin cacharirina huatacama mashna valishcata ricushcaca chaimi canga.

18Chai allpata cucujca tucui imamantapish cacharirina huatapaj q'uipa huatacunapi cujpica, cutin tucui imamantapish cacharirina huatapajca mashna huata cashcata cura yupachun. Chai huatacunallamanta mashna valishcata cura huillachun.

19Mandaj Diosman allpata cujllataj chai allpata tigra japisha nishpaca, chai allpa mashna valishcamanta pichcamanta shuj partehuan cuchun. Chashna rurajpimi paipajllataj canga.

20Ashtahuanpish allpamanta paillataj mana cullquita tigrachi tucujpi shujtajman c'atujpica q'uipataca cullquita cushpapish mana japi tucungachu.

21Chai allpaca tucui imamantapish cacharirina huatapica, maijanpajpish mana cangachu. Diospajlla ch'icanchishcallatajmi canga. Chaimanta chai allpaca curapajmi saquiringa.

22Maijanpish mana paipaj yayapajta japishca allpata, ashtahuanpish pai randishca allpata Mandaj Diosman cushca cajpica,

23chai allpataca cujhuan tucushpa mashna valishcata cura ricuchun. Imamantapish cacharirina huatacama mashna cashcata yupashpa mashna cashcata nichun. Chai cujllataj chai allpata japisha nishpaca chai allpaca Mandaj Diospajlla ch'icanchishca cashcamanta chai allpa mashna valishcatataj chai punllataj cushpa japichun.

24Tucui imamantapish cacharirina huatapica, allpaca ñaupaman c'atujpajllatajmi canga. Pai quiquinpaj cashcamantami paipajllataj canga.

25Tucui imatapish mashna valishcata can ricushpaca, Diospaj carpa huasipi cullquita pezanapi pezashcahuan ch'imbapurashca cuchun. Chai siclo cullquica ishqui chunga gerasmi.

26Punta huacharishca animalcunaca punta huacharishca cashcamanta Mandaj Diospajmi. Chaimanta chaicunataca pi mana Diosman cucuni ni tucunchu. Huagra cashpa, oveja cashpa punta huacharishcacunaca Mandaj Diospajmi.

27Punta huacharishca animal mana micuna animal cajpica, chai animal mashna valishcamanta cullquita cushpa chai animalyujllataj japichun. Chai jahuapish pichcamanta shuj partehuan cuchun. Chai animalyujllataj mana randijpica, chai animaltaca mashna valishcapi c'atuchunlla.

28Maijanpish Mandaj Diospajlla ch'icanchishpa paiman cungachari. Chaitaca shujtajpish mana randi tucunchu. Paillatajpish cullquita cushpa mana llujshichi tucunchu. Pai imata charishcata cushcaca gentecuna cashpa, animalcuna cashpa, mana cashpaca paipaj quiquin allpa cashpapish Mandaj Diosman cushcaca Mandaj Diospajlla ch'icanchishcami.

29Shinallataj maijanpish chaipitaj canapaj cushcataca cullquita cushpapish mana llujshichi tucunchu. Paica huañungacamami chaipi canga.

30Allpapi p'ucushcacunata chungamanta shujta cunaca granocuna cashpa, yurapi p'ucushca cashpa, chungamanta shujca Mandaj Diospajmi. Chaicunaca Mandaj Diospajlla cashcamanta paipajmi.

31Chungamanta shujta Diosman cuna cashcata, maijanpish pagashpa llujshichisha nishpaca, mashna valishcamanta pichcamanta shuj partehuan pagashpa llujshichichun.

32Yupana vara ucuta pasajcunaca vacacuna cashpa, ovejacuna cashpapish cada chungamanta shujmi Mandaj Diospajlla tucun.

33Chaicunata Mandaj Diosman cucushpaca ima shina cachunpish chaitataj cuchunlla, ama cambiachun. Maijan cambiajpica cambiashpa cushcapish, caishujpish ishquindijmi Diospajlla ch'icanchishca canga. Chaicunataca cullquita cushpapish mana cutin llujshichi tucunchu” nircami.

34Tucui chai mandashcacunaca, israelcunata yachachichun Mandaj Dios Moisesman Sinaí urcupi cushcami.