ISAÍAS 23 - Quichua Chimborazo Bible

Tiro pueblota llaquichinata huillachishcami

1Tiro pueblo imalla tucunata huillachishcami:

Tarsis barcocuna huacaichigari.

Tiro pueblotaca shuj huasillatapish mana saquishpamari chingachishca.

Maiman yaicunapish mana tiyangacamami chingachishca.

Quitim llajtamantami huillashca.

2Mama cucha uripi causajcuna, c'atushpa randishpa purij Sidoncuna upallaichij.

Mama cuchata caiman chaiman ch'imbashpa c'atushpa purijcunami canmanca c'atujcuna carca.

3Chaica Nilo yacu jundashpa chagracunapi regarishcahuan p'ucushca cozichana granocunamantami cancunapaj ima charinacunaca tiyaj carca.

Chaimanmi shujtaj llajtacunamanta c'atujcuna randijcuna shamujcuna carca.

4¡Sidón pingai tucuiyari!

Mama cuchapaj muyundij sinchi pircalla:

“Huachana nanaihuanca manataj cashcanichu.

Huachajpish manataj cashcanichu.

Churicunatapish mana huiñachishcanichu.

Ushushicunatapish mana huiñachishcanichu” ningami.

5Chai huillanata Egiptopi huillajpica, Tiro llaqui tucushcata uyashpaca chai huillashcamantaca yallitajmi nanaringacuna.

6Tarsis pueblopipish huillagrichij.

Mama cucha uripi causajcuna caparishpa huacaichij.

7¿Manachu cai puebloca ñaupa punllacunamanta cancuna yallitaj cushicuna pueblo?

Paicunapaj chaquicunallatajmi carupi causagrichun aparinga.

8Tiro llajta chashna tucunataca ¿pitaj mandarcari?

Paica coronacunata chaupijmi carca.

Caipi causaj c'atushpa randishpa purijcunapish mandajcunami carca.

Llajtacunapi c'atunaman randinaman rijcunaca maipipish paicunata ashtahuan alli nishcacunami carca.

9Paicunapaj chashna cashcahuan jatun tucushcacunata pingachingapajmi, tucuita Mandaj Dios chashna tucuchun mandashca.

Cai pachapi causaj jatun tucushcacunata cumurichingapajmi chashna rurasha nishca.

10Tarsispi causajcuna cai pachapi tiyaj yacucuna shina callpashpa richij.

Cunanca ña mana ashtahuan mandai tucunguichijchu.

11Mandaj Diosmari mama cucha jahuata paipaj maquita chutashpa cai pacha mandanacunata chujchuchirca.

Mandaj Diosmi Canaán llajta ima shina tucunata, paicunapaj pueblocunapi muyundij pircacuna urmanatapish mandarca.

12Paica cashnapishmi nirca: “Sidonpaj ushushi c'arita manaraj rijsij llaquichishca huarmi ña mana ashtahuan cushicunguichu.

Quitimman ringapaj jatari, chaiman rishpapish samarinataca mana charinguichu” nircami.

13¡Caldeocunapaj llajtata ricui!

Chai puebloca manaraj tiyarcachu.

Chai llajtataca shitashca pambapi causajcunapajmi asiriocuna callarichirca.

Paicunami muyundij pircatapish rurarca.

Mandana huasicunatapish paicunami shayachirca.

Tucui chaicunataca paimi urmachirca.

14Tarsis pueblomanta barcocuna caparishpa huacaichigari.

Cancunapaj muyundij sinchi pircataca urmachishcamari.

15Chai punllacunapica Tiro puebloca jatun mandaj causana huatacuna shina canchis chunga huatacunatami cungarishca shitashca saquiringa. Canchis chunga huata q'uipaca Tiro puebloca huainayashcahuan causaj huarmi cantaj shinami cantanga.

16Huainayashcahuan causaj cungarishca huarmi, arpata japishpa tucui pueblota puriyari.

Cutin yuyarichun nishpa sumajta tocashpa, cutin cutin cantashpa riyari.

17Canchis chunga huatacuna tucurijpica Mandaj Diosca Tiro pueblota ricuj shamungami. Ashtahuanpish paicunaca cutinllatajmi shujtaj llajtacunahuan c'atushpa randishpa tucui cai pacha llajtacunahuan huainayangacuna.

18Chashna cashpapish paicuna c'atushpa randishcamanta japishcacunataca Mandaj Diospajllami ch'icanchingacuna. Chaicunataca mana paicunapaj huaquichingacunachu, mana paicunapaj mirachingacunachu. Paicuna c'atushcamanta japishcacunaca Mandaj Diospajta rurajcunapajmi canga. Paicuna pajtata micunapaj allita churarinapajmi canga.