JOSUÉ 22 - Quichua Chimborazo Bible

Rubenpaj, Gadpaj aillucunapish, Manasespaj chaupi aillupish paicunapaj llajtaman tigrashcami

1Josueca chai q'uipami Rubenpaj, Gadpaj aillucunatapish, Manasespaj chaupi aillutapish cayashpa,

2cashna nirca: “Cancunaca Mandaj Diospajta ruraj Moisés mandashcatapish, ñuca mandashcatapish tucuita allimi cazushcanguichij.

3Cancunapaj huauquicunata mana saquishpami, cunan punllacama cai tucui unita caipi cashcanguichij. Mandaj Dios mandashcata cazushpami, chashna caipi canguichij.

4Mandaj Diosca pai cusha nishcataca pajtachishpami, cai llajtataca cancunapaj huauquicunaman cujpi ña alli causacuncuna. Cancunamanpish Mandaj Diospajta ruraj Moisesca Jordán yacumanta inti llujshin ladomanmi ña curca. Cunanca chai llajtapi caj cancunapaj carpa huasicunaman tigraichijlla.

5Cunanca tucuimanta yallica Mandaj Diospajta ruraj Moisés cancunaman cushca cai mandashcacunata tucuita pajtachinguichij. Chaipica: “Cancunata Mandaj Diosta c'uyanguichij. Paipaj ñanpi puringuichij. Tucui pai mandashcacunata cazushpa, paita catiranguichij. Tucui cancunapaj shunguhuan, tucui cancunapaj almahuan paipajllata ruranguichij” ninmi” nircami.

6Shina nishpa Josueca, Dios cancunahuan cachun nijpica, paicunaca paicunapaj carpa huasicunaman tigrarcallacunami.

7Manasespaj chaupi aillumanca Moisesmi, Basán llajtapi allpacunata curca. Manasespajllataj caishuj chaupi aillumanca Josuemi, Jordán yacumanta inti huashicun ladoman allpacunata curca. Paicunatapish Josueca, Dios allicunata cuchun nishpa paicunapaj carpa huasicunaman tigrachishpa cachacushpaca,

8cashnami nirca: “Cunanca cancunapaj carpa huasicunamanca achcata charijcunami tigranguichij. Cancunata p'iñajcunata quichushca achca huagracunata, cullquita, curita, bronceta, achca churanacunatami charinguichij. Chaicunataca cancunapaj huauquicunaman chaupinguichij” nircami.

9Shina nijpica Rubenpaj, Gadpaj aillucunapish, Manasespaj chaupi aillupish, Mandaj Dios mandashca shinallataj allpacunata Moisés cushca paicuna japishca llajta Galaadman tigrangapajmi, Canaanpi caj Silo pueblopi caishuj israelcunahuanca chaupirinacurcacuna.

Jordán yacu c'uchupi altarta rurashcami

10Rubén aillupish, Gad aillupish, Manasespaj chaupi aillupish Canaanpaj linde Jordán yacu uriman chayashpaca, chai uripimi shuj jatun altarta rurarcacuna.

11Rubenpaj, Gadpaj aillu, Manasespaj chaupi aillupish Canaán llajta linde c'uchullapi caj Jordán yacu uripi shuj altarta rurashcatami israelcunaca yachaj chayarcacuna.

12Israelcunaca chaita uyashpami, paicunahuan macanacunaman ringapaj Silo pueblopi tandanacurcacuna.

13Macanacunaman manaraj rishpami, Eleazar curapaj churi Fineestaca, Galaad llajtaman Rubén aillupaj, Gad aillupaj, Manasespaj chaupi aillupajman,

14chunga mandajcunandij cacharcacuna. Paicunaca cada aillupaj huaranga huaranga israelcunata punta mandajcunami carca.

15Rubén aillu, Gad aillu, Manasespaj chaupi aillucuna causacun Galaad llajtaman tucui paicuna chayashpaca cashnami nircacuna:

16–Mandaj Diospaj tucui tandanacushcacunami ñucanchijtaca cashna nij cachan: ¿Cancunaca israelcunata Mandaj Diosta mana cazushpachu paita p'iñachicunguichij imamí? ¿Mandaj Diosmanta caruyashpa paita catinata saquishpachu, paita p'iñachishpa shuj altarta rurashcanguichij imamí?

17Peor nishca diosta adorashca jucha cashcataca ¿manachu yuyaringuichij? Mandaj Diospaj israelcunaca chai diosta adorashpa mapayashcamantami huañurcacuna. Chai juchamantaca cunancama maparajmi canchij.

18Cunan cancunapish chashna rurashpaca ¿Manachu Mandaj Diosta catinamanta caruyashcanguichij? Cancuna chashna Diosta p'iñachishpa c'ariyashcamantaca cayaca Mandaj Diosca tucui israelcunahuanmi nina sindirij shina p'iñaringa.

19Cancuna japishca llajta mapa yuyachijpica, Mandaj Diospaj huasi tiyacun, Mandaj Diospaj allpaman shamuichij. Chaipi ñucanchijpurallapitaj cancunapaj cachun allpacunata japishpa causanguichijllami. Ñucanchijta Mandaj Diospaj altarta saquishpa shujtaj altarta ama ruraichijchu. Chashna rurashpaca Mandaj Diostami p'iñachinguichij, ñucanchijtapish llaquichinguichijmi.

20Zera runapaj churi Acanca, Diospajlla cajta japishpami, juchayuj tucurca. Chai juchamantaca, Mandaj Dios tucui israelcunahuan jatunta p'iñarishcataca ¿manachu yuyaringuichij? Chai runa juchallishcamantaca mana paillachu huañurca– nircacunami.

21Shina nijpica Rubenpaj aillupish, Gadpaj aillupish, Manasespaj chaupi aillupish huaranga huaranga israelcunata pushajcunamanca cashnami nircacuna:

22–Mandaj Diosca dioscunapajpish Diosmi, paica dioscunapajpish Diosmi. Ñucanchij chai altarta imapaj rurashcatapish paimi yachan. Israelcunamanpish ñucanchij imapaj rurashcataca paimi yachaj chayachinga. Mandaj Diosta mana cazushpa chai altarta rurashca cajpi, mana cashpaca paimanta caruyangapaj chashna rurashca cajpica, pai Dios ñucanchijta huañuimanta ama quishpichichun.

23Mandaj Diosmanta caruyangapaj chai altarta ñucanchij rurashca cajpi, mana cashpaca chaipi Diosman cushpa tucui rupachingapaj cajpi, mana cashpaca micunacunatapish Diosman cushpa rupachingapaj cajpi, mana cashpaca Dioshuan alli cangapaj cushpa rupachingapaj chai altarta rurashca cajpica, Mandaj Diosllataj llaquichichun.

24Ñucanchijca caya mincha cancunapaj huahuacuna ñucanchij huahuacunata: Cancunaca ñucanchij israelcunata Mandaj Dioshuanca, imata mana charinguichijchu ninata manchashcamantami chashna rurarcanchij.

25Rubén aillupaj, Gad aillupaj huahuacuna, Mandaj Diosmi cancunataca ñucanchijmanta ch'ican cachun Jordán yacuta lindeta churashpa ch'icanchishca. Chashna cashcamantaca cancunaca, Mandaj Dioshuanca imata mana charinguichijchu ningacunallatajmari. Paicuna chashna nishpaca ñucanchij huahuacunataca Mandaj Diosta manchashpa causanamanta caruyachingallatajmari.

26Chashna yuyashpami, chai altartaca rurarcanchij. Shina cajpica, Mandaj Diosman cushpa tucui rupachingapajpish, sacrificiota chaipi cungapajpish mana rurarcanchijchu.

27Ashtahuanpish ñucanchijpish, cancunapish, ñucanchij huahua huahuacunapish chai Diosllatataj yuyarij cashcata ricuchij cachunmi rurarcanchij. Chai altarmi Mandaj Diosman cushpa tucuita rupachina cashcata, ñucanchij sacrificiocunata cuna cashcata, Dioshuan alli cashcamanta cuna cashcatapish ricuchinga. Chaimi cancunapaj huahuacunapish ñucanchij huahuacunataca: “Cancunaca Mandaj Dioshuanca imata mana charinguichijchu” mana ningacuna.

28Chaimi ñucanchijca cashna ninacurcanchij: “Maijancuna ñucanchijta cashpa, mana cashpaca ñucanchij huahua huahuacunata cashpa imata nijpica, cashnami nina can: Riquichij, ñucanchij yayacunaca Mandaj Diospaj altar shinatamari rurarcacuna. Chai altartaca ñucanchij llajtapi Diosman cushpa tucui rupachingapajpish, mana cashpaca sacrificiota chaipi cungapajpish mana rurarcacunachu. Ashtahuanpish ñucanchijpish, cancunapish chai Diosllatataj yuyarij cashcata ricuchij cachunmari rurarcacuna” ningacunami.

29Mandaj Diosta p'iñachishpa c'ariyana, mana cashpaca Mandaj Diosta caticushcata saquinaca ñucanchij yuyaipica amataj tiyashca cachun. Mandaj Diospaj huasi ñaupajpi, paipaj altar tiyashca jahua shujtaj altarta rurashpa chaipi Diosman cushpa tucuita rupachina, sacrificiota cunapish amataj tiyashca cachun– nircacunami.

30Rubén aillupaj, Gad aillupaj, Manasés aillupaj huahua huahuacuna chashna nishcaca, Finees curapaj, huaranga huaranga israelcunata punta mandajcunapajpish, allimi ricurirca.

31Chaimi Eleazar curapaj churi Fineesca Rubén aillupaj, Gad aillupaj, Manasés aillupaj huahuacunataca:

–Cancunaca Mandaj Diosmanta caruyana yuyaihuanca mana chashna rurashcanguichijchu. Chaimanta Mandaj Dios ñucanchijhuan cashcatami yachanchij. Chashna cajpimi tucui israelcunataca mana llaquichinga– nircami.

32Chai q'uipaca Galaadmantaca Eleazar curapaj churi Fineespish, paihuan rij pushajcunapish, Rubén aillupaj, Gad aillupaj huahuacunata caya minchacama nishpaca, Canaanpi caj caishuj israelcunapajman tigrarcallacunami. Chaipica Galaadpi causacuj israelcuna imalla nishcatami paicunaman tucuita huillarcacuna.

33Tucui chai huillashcacunaca, Canaanpi caj israelcunapipish alli cajpimi, Mandaj Diosta allimari cangui nircacuna. Rubén aillupaj, Gad aillupaj huahuacunahuan macanacushpa, paicuna causacun llajtacunata chingachinataca ña mana ashtahuan rimanacurcacunachu.

34Rubén aillupaj, Gad aillupaj huahuacunaca paicuna rurashca altartaca: “Ñucanchijpish paicuna shinallataj chai Mandaj Diosllatataj yuyarijcuna cashcata ricuchijmi” nishpami, Ed shutita shutichircacuna.