1 CRÓNICAS 22 - Quichua Chimborazo Bible

1Chaimantami Davidca: “Mandaj Taita Diospaj huasipish, israelcuna paiman cushpa tucui rupachina altarpish caipimi cana can” nirca.

Davidca Diospaj huasita shayachingapaj tucuita allichishcami

2Chai q'uipami Davidca Israel llajtapi causaj, mana Israel runacunata tandachichishpa, Taita Diospaj huasita shayachingapaj rumicunata labrajcuna cachun paicunamanta maijancunata agllashpa churarca.

3Chai huasipaj pungucunata clavanapaj clavocunata ruranapaj, chai pungucunapaj bisagracunata rurangapajpish achca fierrocunatami rurarca. Broncetapish mana pizai tucuipaj yallitaj achcatami rurarca. Cedro caspicunatapish, mana yupai tucuipaj yallitaj achcatami allichirca.

4Cedro caspicunataca Sidón, Tiro llajtacunapi causajcunami yallitaj achcata apamurcacuna.

5Chaimi Davidca: “Mandaj Diospaj huasitaca tucui llajtapi causajcuna alli nishca cana cashcamanta jatun, sumaj huasitamari shayachina. Ñuca churi Salomonca chairaj huambrarajmari. Chaimanta cunanca imalla minishtirinata allichisha” nishpami manaraj huañushpa tucuita yallitaj achcata allichirca.

6Davidca paipaj churi Salomonta cayashpa israelcunata Mandaj Taita Diospaj huasita shayachingui nishpami mandarca.

7Chashna nishpaca Davidca Salomontaca: “Ñuca huahualla, Mandaj Diospajlla cachun paipaj huasitaca ñuca shayachinatami ñuca shungupi yuyarcani.

8Ashtahuanpish Mandaj Dios rimashpamari ñucataca: Canca jatun macanacuicunata rurashpa achca yahuartamari jicharcangui. Cai pachapi causajcunapaj yahuarta ñuca ñaupajpi chashna achcata jichashcamantaca ñuca huasitaca mana canchu shayachingui.

9Riqui cambajca shuj churimi huacharinga. Muyundij llajtacunapi causajcunaman mana p'iñanacushpa sumajta causana yuyaita ñuca cujpimi, paica mana p'iñanacushpa sumajta causaj runa canga. Chaimantami paica Salomón shuti canga. Paipaj tucui causaipimi, israelcunataca sumaj causaita cushpa samachisha.

10Paimi ñuca shutipi huasita shayachinga. Paica ñuca churimi canga, ñucapish paipaj yayami casha. Israelcunata pai mandaj cachunca ñucami pi mana cuyuchipajta huiñaipaj churasha nircami.

11Cunanca ñuca huahualla, Mandaj Dios canta pai nishca shinallataj paipaj huasita can rurachunca Mandaj Diosca canhuan cashca cachun.

12Israelcunata can mandacujpica Mandaj Diospaj mandashcapi nishca shinataj mandachun Mandaj Diosllataj alli yuyaita, alli yachaita cushca cachun.

13Ña can mandacushpaca, Mandaj Dios israelcunata mandachun Moisesman cushca chaitataj pajtachichun mandashcata, pajtachinguitaj nishca shina ruranata chai yuyailla pajtachijpica, tucuipimi alli canga. Ama manchashpa sinchi sinchi cangui. Ama mana rurai tucushcata yuyashpa shaicurij shina saquiringuichu.

14Riqui, ñucaca sinchita trabajashpami, Mandaj Diospaj huasita shayachingapajca, 100.000 talento curita, shuj millón talento cullquita, broncehuan, fierrohuancarin yallitaj achca cajpi mana yupashcatami achcata tandachircani. Caspicunatapish, rumicunatapish ñami tandachircani. Canpish ashtahuan tandachinarajmi cangui.

15Rumita labrajcunata, albañilcunata, carpinterocunata, tucui laya imacunatapish alli ruranata yachajcunatami achcacunata charingui.

16Curipish, cullquipish, broncepish, fierropish yallitaj achcami tiyacun. Cunanca ña jatarishpa, rurai callarilla. Mandaj Dios canhuan cachun” nircami.

17Chashnallatajmi Davidca israelcunata q'uipa mandajcunataca paipaj churi Salomonta ayudachun cashna mandarca:

18“Maipi cajpipish sumaj causaita cuj cancunata Mandaj Taita Diosca ¿manachu cancunahuan? Paimari cai llajtapi causajcunataca ñuca maquipi churarca. Chaimantami tucui cai llajtacunaca Mandaj Diospaj maquipipish, pai agllashcacunapaj maquipipish tiyacun.

19Chaimanta cunanca tucui shunguhuan, tucui almahuan cancunata Mandaj Taita Diosta mashcaichij. Mandaj Dioshuan ari ninacushca quillcata huaquichina arcatapish, Diospajlla ch'icanchishca charinacunatapish Mandaj Taita Diospaj shutipi shayachishca huasipi churangapaj Mandaj Taita Diospaj huasita utca shayachichij” nircami.