ÉXODO 9 - Quichua Chimborazo Bible

Animalcunapi ungüita churashcami

1Mandaj Diosca Moisestaca:

–Faraonpajman yaicushpaca: “Mandaj Dios hebreocunapaj Diosca cashnami nin: Ñuca agllashcacunataca ñucapajta rurachun saqui ninmi.

2Paicuna richun mana saquishpa paicunata can charicujllapica,

3Mandaj Diosca can mandacun llajtapi caj caballocunata, burrocunata, camellocunata, vacacunata, ovejacunatami paipaj maquihuan yallitaj jatun ungüihuan huañuchinga.

4Mandaj Diosca israelcunapaj animalcunatapish, Egiptopi causajcunapaj animalcunatapish ch'icanchingami. Israelcunapaj animalcunaca shujllapish ama huañuchunmi ch'icanyachinga ninmi” nigri– nircami.

5Mandaj Diosca:

–Ñucaca cayacamallami shuyani. Cayaca utcatami chashna llaquichi callarisha– nircami.

6Cayandij punllaca Mandaj Diosca, pai nishca shinallatajmi rurarca. Tucui Egipto llajtapi causajcunapaj animalcunami huañurca. Ashtahuanpish israelcunapaj animalcunaca shujllapish mana huañurcachu.

7Israelcunapaj animalcuna huañushcata mana huañushcata ricuchun faraón cachajpica, shujllapish mana huañushcatami ricurcacuna. Chaita yachashpapish paica rumi shungu tucushpami, israelcuna richunca manataj saquisha nirca.

Chupu ungüihuan llaquichishcami

8Mandaj Diosca Moisesta, Aarontaca:

–Hornomanta lutsai ushpata apaichij. Chai ushpataca faraonpaj ñaupajpi Moisés jahuata tsirapashpa shitachun.

9Chai ushpaca ñutu allpa tucushpa tucui Egipto llajtata rishpami, Egipto llajtapi causajcunataca gentecunatapish, animalcunatapish carachayashpa chupu tucushpa llaquichinga– nircami.

10Chaimi paicunaca hornomanta ushpata apashpa faraonpaj ñaupajpi shayarishpa ushpata Moisés jahuata tsirapajpica, gentecunapipish, animalcunapipish carachayashpa chupu tucurca.

11Brujocunapish caishuj egipciocuna shinallataj carachayashpa chupuhuan cashcamantami Moisespaj ñaupajpica mana cai tucurcacuna.

12Mandaj Diosllataj faraonta rumi shunguta rurajpimi, Mandaj Dios Moisesman nishca shinallataj mana uyarca.

Runduhuan llaquichishcami

13Mandaj Diosca Moisestaca:

–Cayaca utcata jatarishpa, faraonpajman rishpa cashna ningui: “Mandaj Dios hebreocunapaj Diosca cashnami nin: Ñuca agllashcacunata ñucapajta ruranaman richun saqui.

14Ñuca tucui llaquichinacunatami cambaj shungutapish, cambajta rurajcunapaj, can mandacun gentecunapaj shungutapish nanachichun cachasha. Tucui cai pachapi ñuca shinaca pi shujtaj mana tiyashcata can yachachunmi cachasha.

15Ñucaca cantapish, can mandacun gentecunatapish llaquichingapaj ñuca maquita chutajpica ñami tucuicuna cai pachamanta illanguichijman.

16Ñucaca imatapish rurai tucuj cashcata canpi ricuchishpa, tucui cai pachapi ñuca shuti huillashca cachunmi cantaca churarcani.

17Chai jahuachu ñuca agllashcacuna richun mana saquishpa jarcangui.

18Cunanca Egiptota callarichishca punllamanta cunan punllacama nunca mana urmashca llashaj rundutami caya cai horasllataj tamyachisha.

19Canllaman cajcunataca animalcunatapish, tucui imalla charishcacunatapish, tucuita tandachichishpa ucuman yaicuchichij. Gentecuna cashpa, animalcuna cashpa canllaman saquirishpa mana huasi ucupi cajtaca rundu paipaj jahuapi urmajpi tucuicunami huañunga ninmi” ningui– nircami.

20Faraonpajta rurajcunaca Mandaj Dios rimashcata maijanlla manchajcunaca paicunapajta rurajcunatapish, animalcunatapishmi huasicunaman yaicuchircacuna.

21Ashtahuanpish Mandaj Dios rimashcata paicunapaj shungupi mana crijcunaca paicunapajta rurajcunatapish, animalcunatapish canllaman saquircallacunami.

22Mandaj Diosca Moisestaca:

–Egipto llajtapi causaj gentecunapaj, animalcunapaj, tucui chagracuna jahuapi rundu urmachun cambaj maquita jahua pachaman chutai– nircami.

23Shina nijpi Moisés paipaj caspita jahua pachaman huichi chutajpica, Mandaj Diosca culun nishcahuanmi runduchirca. Ninaca cai pachataca achij nicurcami. Chashnami Mandaj Diosca Egiptopica runduta tamyachirca.

24Chai runduca ninahuan runduhuan chagrumi carca. Egiptopi causai callari pachamanta chashna runduca Egiptopica nunca mana tiyashcachu carca.

25Chai runduca Egipto llajtapica tucui canllaman cajcunataca gentecunata, animalcunatapish tucuicunatami huañuchirca. Tucui maipi tiyaj q'uihuacunatapish tucuitami ñutucurca. Chai llajtapi tiyaj yuracunatapish tucuitami ñuturca.

26Israelcuna causan Gosén llajtallapimi runduca mana urmarca.

27Chaimi faraonca Moisesta Aaronta cayanaman cachashpaca:

–Cunantajca juchallishcanimi. Mandaj Diosca cashcata rurajmi. Ashtahuanpish ñucapish, ñuca mandacun gentecunamari Diosta mana manchajcuna cashcanchij.

28Taita Dios c'ulun nichicushcapish, runduchicushcapish pararichun Mandaj Diosta mañai. Cancuna richun saquishallami. Ña mana ashtahuan caipi charicushallachu– nirca.

29Shina nijpi Moisesca:

–Cunantaj cai pueblomanta llujshishpa Mandaj Diospajman ñuca maquita chutajpica, culun nicuica pararingallami. Rundupish ña mana ashtahuan urmangachu. Cai pachayujca Mandaj Dios cashcata can yachachunmi chashna ruranga.

30Chashna rurajpipish canpish, cambajta rurajcunapish Mandaj Dios chashna ruracushcataca manaraj manchanguichijchu– nircami.

31Linotapish, cebadatapish tucuimi ñuturca. Cebadaca ñami espiga carca. Linoca ñami sisa carca.

32Ashtahuanpish trigota, centenotaca q'uipa tarpui cashcamanta mana ñuturcachu.

33Faraonpaj ñaupajmanta Moisés llujshishpa pueblomanta canllaman maquicunata Mandaj Diospajman chutajpica, culun nicushcapish, runducushcapish pararishpami Egipto llajtataca ña mana ashtahuan tamyarca.

34Tamyapish, rundupish culun nicuipish ña pararishcata ricushpami faraonca mana cacharisha nishpa cutinllataj juchallishpa paipish, paipajta rurajcunapish rumi shungu tucurcacuna.

35Mandaj Dios Moisesman nishca shinallatajmi, faraonca rumi shungu tucushpa israelcunataca mana cacharisha nirca.