ISAÍAS 11 - Quichua Chimborazo Bible

Cashcata ruraj Quishpichij mandacui punllapi ima shina canami

1Yaya Isaipaj troncomantaca shuj yurami huiñanga.

Paipaj sapicunamantaca mushuj yurami retoñanga.

2Mandaj Diospaj Espiritumi paipi causanga.

Chai espirituca:

Yachaisapa canata cuj espíritu, yuyaisapa canata cuj espíritu, alli yachaita cuj espíritu, imatapish rurai tucunata cuj espiritu, imatapish yachaj canata cuj espiritu, Mandaj Diosllata manchana yuyaita cuj espiritumi canga.

3Mandaj Diosta manchajca ima shina canatami yachachinga.

Pai mandacushpaca ñahuita ricushpallaca mana llaquichingachu.

Paica shujtajcuna huillashcata uyashcallahuanca mana allichingachu.

4Ashtahuanpish paica piman mana tucushpami, huajchacunataca cashcata rurashpa allichinga.

Llajtapi causaj mana mitsari tucucujcunataca piman mana tucushpami allichinga.

Cai pachapi causajcunataca paipaj shimimanta llujshij caspihuanmi llaquichinga.

Mandaj Diosta mana rijsijcunataca paipaj shimimanta llujshij espirituhuanmi huañuchinga.

5Cashcata ruraj canaca paipaj cinturata chumbillirinami canga.

Imatapish pajtachij canahuanmi chumbillirishca canga.

6Atujca malta ovejahuanmi tandalla puringa.

Leopardopish, chivohuan tandallami siringa.

Bizipish, leonpish, charina jatun animalcunapish tandallami puringacuna.

Uchilla huahuallami michicunga.

7Vacaca osahuan tandalla micungallami.

Paicunapaj huahuacunapish tandalla siringallami.

Leonca, huagra shinallataj ujshatami micunga.

8Chuchucuj huahuaca cobra culebrapaj jutcupimi pugllanga.

Cunanlla raquishca huahuaca víbora culebrapaj tazinta maquihuan japingallami.

9Chai punllapica ñucapajlla urcupica, ima millaita mana rurangachu.

Imata mana llaquichingachu.

Mama cucha yacuhuan junda caj shinami tucui cai pachaca Mandaj Diosta rijsishcahuan junda canga.

10Chai punllapica, yaya Isaipaj sapipi retoñashcaca tucui llajtacunapaj bandera cachun churashcami canga.

Paitaca tucui gentecunami mashcangacuna.

Pai causacunca sumaj achij nicujmi canga.

Israelcunaca quiquin llajtaman tigrana cashcami

11Chai punllacunapica cashnami tucunga:

Mandaj Diosca mana huañushpa puchushcacunata prezu apashcacunata tigrachimungapajmi cutinllataj paipaj maquita alzanga.

Paicunataca:

Asiria, Egipto, Patros, Etiopía, Elam, Sinar, Hamat, mama cucha uripi caj llajtacunamantami tigrachimunga.

12Tucui llajtacuna ricunapajmi banderata shayachinga.

Prezu apashca israelcunatami tandachinga.

Caita chaita urata janajta rishca judiocunatami cai pacha chuscundij ladomanta tandachinga.

13Chaipica Efraín aillupajca imalla charishcata munaj canaca chingachishcami canga.

Judata p'iñajcunataca chingachishcami canga.

Efrainca Judacunapaj ima charishcata ña mana munangachu.

Judacunapish Efraintaca ña mana llaquichisha ningachu.

14Ashtahuanpish ishquindij tucushpami, inti huashicun ladopi caj filisteocunataca llaquichinga.

Inti llujshin ladopi causajcunatapish imalla charishcacunata quichungacunami.

Edomcunapish, Moabcunapish paicunapajtami rurangacuna.

Amonitacunapish paicunatami cazungacuna.

15Mandaj Diosca, Egiptopi caj mama cucha asha llujshirishca yacutapish chaquichingami.

Paipaj maquita chutashpa paipaj tucuita rurai tucuj cashcahuan p'ucushpami, Egiptopi caj yacutaca canchispi chaupirishpa ricujta ruranga.

Chaitami israelcunataca, pargatecunata churashcallatataj ch'imbachinga.

16Israelcuna mana huañushpa saquirishcacuna Asiriamanta tigracujpica, israelcunata Egiptomanta ñanta pascashpa llujshichimucushca shinallataj ñanmi canga.