1¡Aij ñucalla! Granocunata usya tucui tandashca q'uipa ch'alata mashcashpa purij runa shinamari cani. Shinallataj uvata tucui tandashca q'uipa ch'alagrishpa imata mana japij shinamari cani. Ñucaca punta p'ucushca granota micushami yuyarcanimari.
2Cai pachata llaquijmari illarca. Cai pachapi causaj runacunamantaca allita rurajca, shujllapish manamari tiyanchu. Tucuicunami huañuchijcuna tucushca. Paicunapurallataj urmachinacungapajmi linchitapish rurancuna.
3Millaita rurashpa pajtachingapajmi, jatun mandajca imatapish cuchun mañan. Juezpish camarita japishpallami allichij tucun. Mandajpish pai munashcatami rimarin. Chaimantaca chaitatajmi rurancuna.
4Paicunapura alli nishca runaca casha shinamari. Allita ruraj runapish, zarza casha yuracuna shinamari. Chapajcuna huillashca shinallatajmari llaquichina punllaca pajtamucun. Cunanca cambajca, caita chaita musparinami canga.
5Canhuan alli apanacuj runa imata nijpipish, ama cringuillachu. Jatun mandajpipish ama shunguta churanguichu. Cambaj huarmimanpish imatapish ama parlanguillachu.
6Churica yayata p'iñangami, ushushica mamata macangami, nuerapish suegrata c'ariyangami. Quiquin huasi ucupurallatajmi chashna p'iñanacungacuna.
7Ashtahuanpish ñucaca Mandaj Diostami chapasha. Ñucata quishpichij Taita Diostami shuyasha. Ñuca Diosmi ñuca mañashcataca uyanga.
Mandaj Diosca achijtapish, quishpirinatapish cushcamanta8Ñucata p'iñajlla, ñuca llaqui tucushcamantaca ama cushicuichu. Urmashpapish jatarishallami. Amsapi causacujpipish, Mandaj Diosmari nina shina ñucataca achijyachinga.
9Ñucaca Mandaj Diosta p'iñachishpamari, juchata rurarcani. Chaimantami cunanca, ñuca ima rurashcacunata ricuchishpa allichingacama, Mandaj Dios p'iñarishpa cachashca llaquitaca apacunalla cani. Paimari ñucataca achij luzman llujshichinga. Chaipimi paitaca cashcata ruraj cashcataca ricusha.
10Chashna rurashcataca, ñucata p'iñajpish ricungami. Chaita ricushpaca, pingaringami. Paica ñucata llaquichicui punllapica: “¿Maipitagari canta Mandaj Taita Diosca?” nircami. Ashtahuanpish cunanca paitarajmi ñancunapi sirij lodota shina sarushpa llaquichicujta ricusha.
11Jerusalenpi causajcunalla, cancuna rurashca patacuna urmashcata allichina punllapish, ashtahuan caruta lindecunata churashpa allpacunata mirachina punllapish ñamari pajtamucun.
12Chai punllapica Asiria llajtamantapish, muyundijta pircashca pueblocunamantapishmi caimanca shamungacuna. Muyundijta pircashca pueblocunapi causajcunaca, jatun yacu c'uchucamami causanaman shamungacuna. Tucui mama cucha muyundijcunapipish, tucui urcucunapipishmi jundarishpa causangacuna.
13Llajtacunapi causajcuna millaita rurashcamantami, tucui llajta llaquinayaj saquiringa.
Mandaj Diosca israelcunata c'uyashcamanta14Mandaj Dioslla, can agllashcacunataca, cambaj tauna caspihuan michipangui. Paicunaca alli q'uihua tiyan urcullapi causaj, can agllashca canlla ovejacuna shinami. Paicunataca ñaupa punllacunapi shinallataj Basán urcu, Galaad urcu q'uihuacunaman pushapangui.
15Egipto llajtamanta llujshichimui punllapi jatun mancharinacunata ricuchishca shinallatajmi paicunamanpish ricuchisha.
16Chai tucui allicunata rurashcata ricushpaca, shujtaj llajtapi causajcunaca paicuna jatun tucushcamantaca, mana jahuallatami pingaringacuna. Maquita shimipi churashpami, rinrinpish mana uyaj tucushpa saquiringacuna.
17Shinallataj culebra shinami ñutu allpata micungacuna. Culebracuna shinallatajmi, miticushca tiyacushpapish chujchungacuna. Paicunaca, ñucanchijta Mandaj Taita Diospajmanca, manchaihuan chujchushpami cutiringacuna. Can Mandaj Diostaca tucuicunami manchangacuna.
18Taita Dioslla, can shina Diosca manamari pi shujtajca tiyanchu. Canca can agllashcacunapuramanta saquirijcuna millaita rurashcatapish cungarijmi cangui. Paicunapaj juchatapish perdonajmi cangui. Paica mana huiñaita p'iñarinchu. Ashtahuanpish llaquij cashcata ricuchishpami cushicun.
19Paica ñucanchijtaca cutinllatajmi llaquinga. Ñucanchij millaita rurashcacunatapish pambangami. Ñucanchij juchacunatapish mama cucha ucumanmi shitanga.
20Mandaj Dioslla, ñucanchij ñaupa yaya Abrahammanpish, yaya Jacobmanpish c'uyashcamanta allicunata rurashami nishcataca amataj cungarishpa pajtachipangui.
Who We AreWhat We EelieveWhat We Do
2025 by iamachristian.org,Inc All rights reserved.