1Mandaj Dioslla, quiquintami caparini.
Ñuca rumilla, ñuca mañashcataca ama mana uyasha nichu.
Ñucata quiquin saquijpica huañushcacunata pambashcaman uriyacuj shinami casha.
2Quiquinta ñuca mañacushpaca quiquinpaj huasiman tigrarishpa maquicunata chutashpa rogashpa mañashcata uyahuai.
3Millaicunahuan tandallaca ñucataca ama llaquichihuaichu.
Millaita rurajcunahuan chagruca ama llaquichihuaichu.
Paicunaca pihuanpish sumaj causaimantami rimaj tucuncuna.
Ashtahuanpish paicunapaj shungupica millaitami yuyancuna.
4Paicuna rurashca shinallataj llaquichi.
Paicuna millaita rurashca shinallataj ñacachi.
Paicuna rurashcamanta japinataca, paicunapaj maquihuan ima shina rurashca shinallataj llaquichi.
5Tucui imapish Mandaj Dios rurashca cashcataca paicunaca mana yuyancunachu.
Mandaj Diospaj maquihuan rurashca cashcataca mana yuyancunachu.
Chaimanta paicunataca chingachingami. Cutinca mana shayachingachu.
6Ñuca rogashpa mañashcata uyaj Mandaj Diosca alli nishca cachun.
7Mandaj Diosca ñuca fuerzami, ñuca escudomi.
Paipimi ñuca shunguta churani.
Paimi ñucata ayudan.
Ñucaca shungumantatajmi cushicuni.
Ñuca cantohuanmi alabani.
8Mandaj Diosca pai agllashcacuna paca tucuna pircami.
Pai ch'icanchishca miticushpa quishpirinami.
9Mandaj Dioslla, can agllashcacunataca quishpichihuayari.
Quiquinpaj cajcunamanca allicunata cuhuayari.
Paicunataca michihuayari, paicunamanca carapayari, huiñai huiñaita michihuayari.
Who We AreWhat We EelieveWhat We Do
2025 by iamachristian.org,Inc All rights reserved.
