1Taita Dios, jatun mandajmanca cashcata rurashpa mandaj canata cuhuai.
Jatun mandajpaj churimanpish cashcata rurashpa mandaj canata cuhuai.
2Quiquinpaj cajcunataca cashcata rurashpa mandaj canata cuhuai.
Quiquinpaj cajcuna llaquilla cajcunatapish cashcata rurashpa mandaj canata cuhuai.
3Urcucunapish llajtacunamanca sumaj causaita cuchun.
Lomacunapish cashcata ruranata cuchun.
4Llajtacunapi llaquilla cajcunataca cashcata rurashpa mandaj canata rurangui.
Huajchacunapaj huahuacunatapish llaquimanta llujshichijta rurangui.
Chaimi paica llaquichijcunataca llapinga.
5Intipish, lunapish tiyajpiraj quiquintaca manchachuncuna.
Huahua huahuacuna quiquintaca manchachuncuna.
6Jatun mandajca, q'uihuata cuchushca pambata tamya urmaj shinami uriyamunga.
Allpata garhua nuyuchij shinami canga.
7Paipaj punllacunapica cashcata ruranacunallami sisanga.
Sumaj causaillami yallitaj tiyanga.
Luna mana tiyangacamami chashnaca canga.
8¡Paica mama cucha shuj ladomantaca, caishuj ladocamami mandanga.
Jatun yacumanta callarishpaca tucui cai pachatami mandanga!
9Paipaj ñaupajpica, shitashca pambapi causajcunami cunguringacuna. Paita p'iñajcunaca ñutu allpatami lambingacuna.
10Tarsis llajtata jatun mandajcunaca convidanacunatami apamunga.
Mama cucha uripi cajcunapish convidanacunatami apamunga.
Sabá llajtata jatun mandajcuna, Seba llajtata jatun mandajcunapish convidanacunatami paipajman apamunga.
11Tucui jatun mandajcunami paipaj ñaupajpi cumuringacuna.
Tucui llajtacunami paipajta rurangacuna.
12Huajchacuna caparijpica, paimi quishpichinga.
Llaquilla caj pi ayudaj illajlla cajtapish paimi ayudanga.
13Huajchataca llaquingami.
Imata mana charijtaca llaquingami.
Huajchacunapaj causaitaca quishpichingami.
14Paicunapaj causaitaca umashca canamanta, llaquichijni shitashca canamanta quishpichingami.
Paicunapaj yahuarca paipaj ñahuipica valijmi canga.
15Jatun mandajca causacuchunlla. Paimanca Sabá llajtamanta curita cuchun.
Jatun mandajmantaca mana samarishpa mañacuchunlla.
Paitaca tucui punlla alli nicuchunlla.
16Allpapica lutsai muyullatami tarpunga.
Chaica tucui urcu puntacunacama tucuita grano p'ucushpami, Líbano urcu yuracuna shina huajiacunga.
Pueblopi causajcunaca q'uihua sisaj shinami sisangacuna.
17Paipaj shutica huiñaipajmi canga.
Inti tiyashcacama paipaj shutica ama chingarichun.
Tucui llajtacunami paimanta alli nishca cangacuna.
Paica alli nishcami canga.
18Mandaj Taita Diosca alli nishca cachun.
Israelcunapaj Taita Diosca alli nishca cachun.
Mancharinacunata rurajca paillamari.
19¡Paipaj sumaj shutica huiñaita alli nishca cachun!
¡Tucui cai pachapi paipaj sumaj cashcahuan junda cachun!
¡Chashna cachun, chashna cachun!
20Isaipaj churi David mañashca shimicunaca caipimi tucurin.
Who We AreWhat We EelieveWhat We Do
2025 by iamachristian.org,Inc All rights reserved.
