EZEQUIEL 23 - Quichua Chimborazo Bible

Samariapish Jerusalenpish juchata rurashcamanta

1Mandaj Diosca ñucamanca cashnami nirca:

2“Huañujlla aichayuj runalla, ishqui huarmicunami tiyarca. Paicunaca shuj mamapajlla ushushicunami carca.

3Chai huarmicunaca huambramantapachami Egipto runacunahuan huainayashpa causarcacuna. Chai runacunamanmi manaraj pi chayarishcapi ugllachishpa, chuchucunatapish lutsachircacuna.

4Punta ñañaca Ahola shutimi carca, q'uipa ñañaca Aholiba shutimi carca. Paicunaca ñuca huarmicunami tucurca. Chaimantami c'ari huahuacunatapish, huarmi huahuacunatapish huacharcacuna. Aholaca, Samariami tucurca. Aholibaca, Jerusalenmi tucurca.

5Ahola huarmica ñuca maquipi cashca jahuami, paipaj c'uchullapi causaj asiriocunata yallitaj c'uyarca. Chaimantami paicunahuan huainayarca.

6Chai mandajcunapish, pushajcunapish, soldadocunapish amsa puca churanata churashca munanajlla chairaj runacunami carca. Paicunaca tucuicunallataj caballopi tiyarishpa callpajcunami carca.

7Paicunahuanmi huainayarca, asiriocunapaj churicunataca allicunallatami agllarca, pai munashcacunallatami yallitaj c'uyarca. Paicunapaj rurashca dioscunahuanpishmi mapayarca.

8Egipto llajtapi causajcunahuan huainayanataca manataj saquircachu. Chairaj huambra cashcamantapachami, Ahola huarmica paihuanca siririrca. Paicunami pipish manaraj lutsashca chuchucunatapish lutsarcacuna. Chashnami paihuanca yallitaj huainayarcacuna.

9Chashna mana allita rurashcamantami, paita c'uyaj asiriocunapaj churicunaman curcani. Paicunatami yallitaj c'uyarca.

10Paicunami Ahola huarmitaca, lluchu aichallata rurashpa espadahuan huañuchircacuna. Paipaj churicunatapish, ushushicunatapish paicunami japircacuna. Paica tucui huarmicunamanta yalli sumaj huarmimi carca. Shina cashpapish, chanzata rurashpa asinallami tucurca.

11Paipaj ñaña Aholiba huarmipish, chaita ricushpaca, paitapish yallimi c'aricunata munarca. Aholiba huarmica paipaj ñañatapish yallimi huainayarca.

12Paica c'uchullapi causaj asiriocunapaj churicunallatami yallitaj c'uyarca. Paicunaca mandajcunapish, soldadocunata pushajcunapishmi carcacuna. Shinallataj sumaj churanata churarishcacunapish, alli macanacunacunata apashcacunapish, caballopi tiyarishpa callpajcunapishmi carcacuna. Tucui paicunaca munanajlla, chairaj runacunami carcacuna.

13Paicunahuan mapayashcatami chai huarmitaca ricurcani. Paipish ñañapaj chaquillatatajmi catirca.

14Shinallataj patapi pintashca runacunatapish, caldeocunaman rijchajcunatapish tucui laya colorcunahuan pintashcata ricushpa munashcallahuanmi huainayarca.

15Chai runacunaman rijchajcunaca chumbillirina carahuan chumbillirishcacuna, umapipish tucui laya color turbanteta churarishcacunami carca. Chai runacunatajllaca, pai huacharishca Babilonia shuti, Caldea shuti llajta soldadocunata pushajcunaman rijchajmi carcacuna.

16Paicunata ricuihuan munashcamantami, caldeocunapaj llajtaman huillajcunata cacharca.

17Chashnami Babilonia llajta runacunaca, paihuan siririshpa huainayashpa mapayachirca. Shinallataj paipish chai runacunahuanmi mapayarca. Chashna mana allita ruracushpapish, chai runacunataca p'iñanachircami.

18Paica lluchulla tucushpa paipaj aichata munachishpami, tucuicuna ricucunpi huainayarca. Chaimantami ñucaca paipaj ñañata p'iñashca shinallataj paitapish p'iñarcani.

19Chairaj cashpa Egipto llajta runacunahuan huainayashcata manataj cungarishpami, ashtahuan huainayarca.

20Chai huarmica yallitaj huainayana munaita charij runacunatami munarca. Paihuan huainayaj runacunaca ruparicuj burrocuna shina, llausa cachariricuj caballocuna shinami carca.

21Pipish manaraj lutsashca chuchucunata Egipto llajta runacunaman lutsachishpa, chairaj cashpa huainayashcata yuyarishpami, yallitaj huainayarcangui” ninmi.

22Chashna cashcamanta Aholiballa, Mandaj Jatun Diosca cashnami nin: “Riqui, cunan can p'iñanachishca cambaj c'uyashcacunallatatajmi canta llaquichichun cachasha. Shinallataj cambaj muyundij llajtacunapi causaj,

23Babilonia llajta runacunatapish, tucui Caldea llajta runacunatapish, Pecod shuti, Soa shuti, Coa shuti llajtacunapi causaj runacunatapish, Asiria llajta runacunatapishmi canta llaquichichun cachasha. Chai runacunaca munanajlla, chairaj runacunapish, mandajcunapish, soldadocunata pushajcunapish, yuyarinajlla jatun alli runacunapish, caballopi tiyarishpa callpajcunapishmi.

24Shinallataj canta llaquichingapajca ruedayuj carrocunatapish, carretacunatapish, manchanayaj runacunatapishmi cachasha. Canta llaquichij runacunaca uchilla escudocunahuan, jatun escudocunahuan, umapipish cascota churashcacunami cambaj muyundijpica shayaringacuna. Paicunataca ñucami llaquichichijlla nishpa mandasha. Cantaca paicunapaj mandashcapi nishca shinami llaquichingacuna.

25Ñucapajlla cachun munashcamantami, cantaca jatunta llaquichisha. Chaimantami paicunapish manchanayajta p'iñarishpa cantaca jatunta llaquichingacuna. Paicunami cambaj singatapish, cambaj rinrincunatapish p'itingacuna. Canpi causajcunataca, espadahuanmi huañuchingacuna. Cambaj churicunatapish, ushushicunatapish apangacunami. Causaj saquirijcunatapish ninami tucuchinga.

26Shinallataj cambaj churanacunatapish, can aparishca sumajcunatapish quichungacunami.

27Egipto llajtapi causacuipachamantami huainayana yuyailla causarcangui. Chashna huainayana munaitaca chingachishami. Chaimanta ña mana ashtahuan cambaj ñahuitaca paicunaman ricuchinguichu, ña mana ashtahuan Egipto llajta runacunataca yuyaringuichu.

28Chaimantami Mandaj Jatun Diosca cashna nini: Riqui, canta p'iñajcunallamantaj, can mana ricunachishcacunallamantajmi cuni.

29Paicunami p'iñarishpa cantaca jatunta llaquichingacuna. Can imalla rurashcamanta japishcacunataca tucuitami quichungacuna, lluchu aichallatami saquingacuna. Chashna yallitaj huainayashpa mapayashcamantaca, pingachishcami cangui.

30Shujtaj llajtacunapi causajcunahuan huainayashcamantami, chashna llaquichishca cana cangui. Canca paicuna rurashca dioscunahuanpishmi mapayarcangui.

31Canca cambaj ñañapaj chaquillatatajmi catircangui. Chashna cashcamantaca, cambaj ñañaman cáliz vasopi cushca ubyanallatatajmi canmanpish cusha.

32Mandaj Jatun Diosca cashnapishmi nini: Cambaj ñañaman cushca jatun cáliz vasollapitajmi canpish ubyana cangui. Chai vasoca achcata apaj jatunmi canga. Shujtaj llajtacunapi causajcunaca cantaca chanzata rurashpami asingacuna.

33Canca cambaj ñaña Samariaman cushca cáliz vasollamantataj ubyashpami machangui. Chaimantaca llaquicunahuan, nanaicunahuanmi musparingui.

34Chaitaca tucuringacamami ubyangui. Chai cáliz vasollatataj p'aquishpami, chai mirgacunahuan cambaj chuchucunataca aspirishpa chugrichingui. Mandaj Dios ñucatajmi chashna nini, chaica chashnatajmi tucunga.

35Shinallataj Mandaj Jatun Diosca cashnapishmi nini: Huainayana munaillahuan causashpami ñucatapish cungarishpa huashata ricuchircangui. Chashna rurashcamantaca, canca llaquita apanami cangui ninmi ningui” nircami.

36Mandaj Diosca ñucataca cashnami nirca: “Huañujlla aichayuj runalla, Ahola huarmimanpish Aholiba huarmimanpish caicunataca canmi ricuchina cangui. Millananata paicuna rurashcamanta llaquichina cashcataca canmi huillana cangui.

37Paicunaca huainayajcunami, paicunapaj maquicunapish yahuarllami. Shinallataj rurashcalla dioscunahuanpishmi huainayarcacuna. Paicuna huachashca ñuca huahuacunatapish ninapimari tucui rupachircacuna.

38Paicunaca chai punllapica, caicunatapishmi rurarcacuna: Ñucapajlla huasitapish mapayachircacunami. Ñuca samana punllatapish yangatami rurarcacuna.

39Shinallataj paicunapaj huahuacunata rurashcalla dioscunaman cushpa rupachishca punllallatajmi, ñucapajlla huasiman mapayachingapaj yaicurcacuna. Chashna rurashpamari, ñucapajlla huasitaca mapayachircacuna.

40Chai huarmicunaca caru llajtamanta runacuna paicunapajman shamuchun nishpami, huillajcunatapish cayanaman cacharcacuna. Chashna cayaj cachajpimi, caru llajta runacunaca shamurcacuna. Paicuna munachun nishpami maillarircangui, ñahui patacunatapish pintarircangui, tucui laya sumaj aparinacunatami aparircangui.

41Micunapaj allichishca meza c'uchupi tiyaj sumaj tiyarinapimi tiyarircangui, chai meza jahuallapitajmi ñuca cushca inciensotapish, aceitetapish churarcangui.

42Paihuan tandanacujcuna fiestata rurashpa cushicushcapishmi uyarirca. Paicunaca yanga runacunapish shitashca pambapi causaj sabeocunapishmi carca. Chai runacunaca chai huarmicunapaj maquicunapica brazaletecunata huatachishpa, umapica sumaj coronatami churachircacuna.

43Huainayashpalla causaj yuyaj huarmita ricushpami: ¿Chai huarmihuanca cunancamachu huainayashpa catincuna, paipish chai c'aricunahuanca huainayangarajchu imamí? nishpa tapurcani.

44Huainayashpalla causaj huarmipajman shamuj shinami shamurcacuna. Chashnami chai pingai illaj Ahola huarmipajmanpish, Aholibapajmanpish tucuicuna shamurcacuna.

45Chai huarmicunataca cashcata ruraj runacunami huainayajcunata, huañuchijcunata imata ruranata mandashcapi nishca shina llaquichingacuna. Paicunaca huainayaj huarmicunami, yahuarlla maqui huarmicunami” nircami.

46Chaimantami Mandaj Jatun Diosca cashna nirca: “Ñucami chai huarmicunapajmanca, llaquichij soldadocunata cachasha. Paicunataca manchachijcunaman shuhuajcunamanmi cusha.

47Paicunataca millai runacunami rumicunahuan shitangacuna, espadacunahuanpishmi tujsingacuna. Paicunapaj churicunatapish, ushushicunatapish huañuchingacunami, huasicunatapish ninahuanmi rupachishpa tucuchingacuna.

48Cai llajtapi huainayana yuyailla causajcunataca chingachishami. Tucui huarmicunami mancharishpa, ña mana cancuna rurashca shina millaitaca rurangacuna.

49Cancunallataj millaita rurashcamanta rurashcalla dioscunahuan huainayashpa juchallishcamantaca, japina cashcataca japinguichijmi. Chashna llaquichijtataj ricushpami ñucataca, Mandaj Jatun Diostaj cashcataca yachanguichij” nircami.