ROMANOS 3 - Quichua Chimborazo Bible

1¿Judío cashcamantaca ima allitataj charin? Circuncisionta rurashca cajca ¿ima allitataj japin?

2Chaica tucui imapajpish allimari. Puntaca judiocunamanrajmi, Taita Diosca paipaj Shimitaca curca.

3Maijan paicuna mana crijpica ¿imashi tucunga? Pai mana crishcallahuanca ¿Taita Dios pajtachij cashcataca anchuchingachu?

4¡Manataj chashnachu! Tucui gentecuna llulla cajpipish, Taita Diosca mana llullachu. Cashnami quillcashca tiyacun:

“Quiquin cashcata ruraj cashcataca cambaj shimicunami ricuchin.

Quiquinta juchachijpipish mishanguillami” ninmi.

5(Maijan rimarij shinallami rimagrini.) Ñucanchij cashcata mana rurashcallatajmi, Taita Diosca cashcata ruraj cashcataca ricuchin. Chashna cajpica ¿imatataj nishun? Taita Diosca cashcata mana ruraj cashpachu ¿llaquichinga?

6¡Manataj chashnachu! Taita Diosca cashcata mana ruraj cashpaca, cai pachapi causajcunataca ¿ima shinataj, paicuna imalla rurashcata ricuchishpa llaquichingari?

7Ashtahuanpish llullashpa, ñuca huillashcaca Taita Diospaj mana llullapajca alli nishca canapaj cajpica ¿ima nishpataj ñucaca juchayujta shina juchachishcaraj cani?

8“Allicuna shamuchunca, millaita rurashunchij” nicun nishpami, maijancunaca ñucanchijtaca yanga juchachicuncuna. ¿Ima nishpataj mana paicuna nishca shina ninchij? Ñucanchijta chashna yachachicushcatataj shina nijcunataca cashcatataj rurashpami llaquichishca canga.

Cashcata rurajca shujllapish mana tiyanchu

9Shinashpaca ¿ima nishuntaj? ¿Ñucanchijca mana judiocunata yalli allichu canchij? ¡Manataj chashnachu! Judiocunapish, mana judiocunapish tucuicunami jucha ucupi nishpami ña ricuchircanchij.

10Cashnami quillcashca tiyacun:

“Cashcata rurajca mana tiyanchu, shujllapish mana tiyanchu.

11Entendijpish mana tiyanchu, Diosta mashcajpish mana tiyanchu.

12Tucuicunami paimanta anchushpa, yanga tucurcacuna.

Allita rurajca manataj tiyanchu, shujllapish mana tiyanchu.

13Paicunapaj tungurica, pambashca jutcuta pascashca shinami.

Paicunapaj c'alluhuanmi umancuna.

Paicunapaj shimi ucupica, culebracunapaj venenomi tiyan.

14Paicunapaj shimipica, imapish tucushca cachun nishpa rimana jayajhuan jundami.

15Paicunapaj chaquicunaca, yahuarta jichanamanca utcami callpancuna.

16Paicuna purishca ñancunapica, chingachishpa llaquichishcallami tiyan.

17Sumajta causana ñantaca mana rijsircacunachu.

18Paicunapaj causaipica, Diostaca manataj manchancunachu” ninmi.

19Ashtahuanpish Mandashca ucupi cajcunataca, tucui ima shina cana cashcata Mandashcallataj yachachicushcatami yachanchij. Tucui cai pachapi causajcunata ima shina cashcata Dios ricuchicuipica, tucuicunallataj shimi mana llujshishpa upalla cachunmi chashna yachachicun.

20Diospaj ñaupajpica, pi cashpapish Mandashcapi nishca ruraicunamantaca cashcata rurajmi cangui nishcaca mana cangachu. Mandashcaca juchayuj cashcallatami ricuchicun.

Crijllapimi justifican

21Ashtahuanpish cunanca Mandashcata saquishpa, Diosca justificana cashcatami ricuchishca. Chaitaca Mandashcapish, profetacunapishmi cashna huillashca:

22Jesucristopi crijpimi, tucui paipi crijtaca Diosca justifican. Paipajca tucuicuna chai shinallatajmi.

23Tucuicuna juchallishcamantami, Diospaj sumajmantaca anchuchishca carcacuna.

24Ashtahuanpish Diosca mana c'uyaipajta c'uyaihuanmi cashcata rurajta rurarca. Cristo Jesús cacharichijpimi cashcata ruraj tucurcanchij.

25Jesustami paipaj yahuarpi crijpi juchacunata anchuchij cachun churarca. Diosca mana p'iñarij cashpami, ñaupa juchacunata perdonashpa, mana juchallishcata shina ruraj cashcata ricuchingapaj chashna rurarca.

26Chashna cashcata rurajta ruraj cashcataca cunan punllacunapi rurashpami ricuchisha nishca. Chaimi Jesusta crijpica pai ima shinami cashcata ruraj chai shinallatataj ruran.

27¿Jatun tucunaca maipitagari? Chaica chingachishcamari saquirin. ¿Maijan mandashcataj chaitaca chingachin? ¿Mandashcapi nishcacunata rurashcamantachu chingachin? Mana chaimantachu, ashtahuanpish crichun mandashcata crishcamantami chashna tucun.

28Chaica cashnamari: Mandashcapi nishca ruranacunata mana pajtachijpipish, crishcallamantami maijantapish justifican.

29¿Diosca judiocunapajlla Dioschu? ¿Manachu mana judiocunapajpish Dios? Ari, mana judiocunapajpish Diostajmari.

30Pai Diosca shujllami. Circuncisionta rurashca cajpipish, crishcamantami paica justificanga. Mana circuncisionta rurashcacunatapish crishcamantami justificanga.

31Shina cajpica ¿crishcamantaca Mandashcatachu yangata ruranchij? ¡Manataj chashnachu! Ashtahuanpish Mandashcataca, maipi alli canapimi ruranchij.