JOB 33 - Quichua Chimborazo Bible

Eliuca Jobta juchachishpa rimashcamanta

1Chaimanta cunanca ñuca imalla

yuyashcata uyai, Job.

Ñuca imalla rimashcata alli uyahuai.

2Ñuca shimihuanmi cantaca rimagrini.

Ñuca cungapi caj c'allumi cantaca

rimanga.

3Ñuca yuyaicunami ñuca shungupi mana

pandata yuyaj cashcata ricuchinga.

Ñuca shimica mana llullashpami,

imalla yachashcacunataca rimanga.

4Ñucataca Diospaj Espiritumi rurarca.

Tucuita Rurai Tucuj Dios p'ucushpallami,

causaitapish curca.

5Can cutichi tucushpaca cutichiyari.

Imalla ninata alli yuyarishpa shayariyari.

6Can nishca shinallataj ñucaca,

Diospaj randimi caipi cani.

Ñucapish allpamanta rurashcallatajmi

cani.

7Riqui, ñuca rimashcacunaca, cantaca

mana manchachingachu.

Ñuca maquipish, cantaca mana llaquichingachu.

8Canca ñuca uyacuitami rimarcangui.

Ñuca rinrinhuantajmi cashna nijta uyarcani:

9Ñucaca ima mapa illajmi cani, ima

mana allipish ñucapica mana tiyanchu.

Ima millaita ruranatapish mana yachanichu.

Ñucapica ima millaipish mana tiyanchu.

10Shina cajpipish paimi ñucataca,

juchachinata mashcarca.

Ñucataca paita p'iñajta shinami charicun.

11Ñuca chaquicunatapish jutcu caspipimi

canichirca.

Ñuca imallata rurajta chaparacurcami

nircanguimari.

12Riqui, can chashna nirishpaca,

manamari allita rimarircanguichu.

Diosca runata yalli cashcatami

canmanca huillagrini.

13¿Ima nishpataj paitaca

p'iñarishpa rimanguiyari?

Pai yuyashcataca mana huillangallachu.

14Shina cashpapish Taita Diosca,

runataca mana shuj layalla rimanchu.

Shina cajpipish, runamari mana

yuyaita japin.

15Runacunamanca camapi huañuita

dormicujpi tuta muscuipi ricurishpami,

16rinrinllapi rimashpa, pai imata

yuyashcataca ricuchin.

17Chashnami runacunataca mana allita

ruracushcamanta saquichin, jatun

tucushca canatapish anchuchinmi.

18Chashnami paica pambana jutcuman

rinamantapish, espadapi huañunamantapish

quishpichin.

19Maijancunataca tullucunapi manchanayaj

nanaita churashpami, camallapitaj llaquichin.

20Chai nanaihuanca tandatapish,

mishqui micunatapish millanachishpa,

mana micunachinchu.

21Paipaj aichaca chaquirishpa chingarinmi.

Ñaupa mana ricurij cashca tullucunapish,

jahuaman ricurinmi.

22Paica pambana jutcuman rinallami

tucun.

Paica ñami huañuiman chayacun.

23Alli rimajcunamanta agllashca runa

tiyashpachari, runahuan Dioshuan chaupipi

shayarishpa, runa imallata rurana

cashcataca huillanman.

24Chai runaca: Diosca canta llaquircami.

Pambana jutcuman rinamantapish quishpichircami.

Canca quishpirinata japircanguimi ninmanchari.

25Chaimanta paipaj aichaca, llullu huahuapaj

aichatapish yalli llullujlla tucushpami,

chairaj cashca punllacunaman tigranman.

26Taita Diosta pai mañajpica,

paica c'uyanmanmi.

Paipaj ñahuita ricushpa cushicunmanmi.

Runataca cashcata rurajllatatajmi ruranga.

27Taita Diosca runacunataca ricuracunmi.

Shuj runa: Ñucaca juchatami rurashcani,

allita ruranapaj randica, mana allitami

rurashcani.

Shina cashpapish, ima allita mana

japishcanichu nijpica,

28Taita Diosmi paitaca pambana jutcuman

rinamanta quishpichinga.

Chaimantami paica achijtapish ricushpa

causanga.

29Riquichij, Taita Diosca runataca

ishqui cutin, mana cashpaca quimsa

cutinpish chashna ruranllami.

30Chashnami paitaca pambana jutcuman,

mana cachashpa causajcunapaj

luzhuan achijyachin.

31Job, ñuca rimashcata upalla uyahuai.

32Ima yuyaicunata charishpaca cutichihuai.

Ñucaman huillahuai, cantaca ima juchachina

illaj cashcataca ricuchisha ninimi.

33Mana cashpaca, ñucata upalla uyahuai.

Alli yachaitaca ñucami canman

yachachisha nini nircami.