ÉXODO 24 - Quichua Chimborazo Bible

Moisespish cunaj yuyajcunapish Sinaí urcupi cashcami

1Mandaj Diosca, Moisestaca:

–Aarontapish, Nadabtapish, Abiutapish, israelcunata cunaj yuyajcunatapish canchis chungata pushashpa Mandaj Diospaj ñaupajman huichiyashpa carullapi cunguringuichij.

2Moisesllami Mandaj Diospajmanca c'uchuyanga. Caishujcunaca ama c'uchuyachun. Tucui israelcunacarin ama paihuan huichiyachun– nircami.

3Israelcunapajman Moisés rishpaca, Mandaj Dios tucui rimashcacunata, tucui pai mandashcacunatami huillarca. Tucui israelcunami shuj shinalla:

–Mandaj Dios tucui imalla nishcacunataca pajtachishunmi– nircacuna.

4Chaipimi Moisesca, Mandaj Dios nishca shimicunata tucuita quillcarca. Cayandij tutamanta utca jatarishpaca, chai urcu chaquipimi shuj altarta shayachirca. Israelcunapaj chunga ishqui aillucuna cashca shinallatajmi chunga ishqui rumicunata cada aillupaj shuj rumita shayachirca.

5Chai q'uipaca Moisesca, israelcunapuramanta maijan q'uipa huiñaicunata cachajpimi paicunaca Mandaj Diosman cushpa tucui rupachirca. Mandaj Dioshuan alli cangapajpish huagracunata cushpami rupachirca.

6Moisesca chai animalpaj yahuartaca chaupitaca tasacunapimi churarca. Chaupitaca altar jahuatami tsiraparca.

7Chai q'uipami Moisesca, Dioshuan ari ninacushca librota japishpa israelcuna uyajta rezajpi paicunaca:

–Mandaj Dios tucui imalla nishcacunataca cazugrinchijmi, ruragrinchijmi– nircacuna.

8Chaimi Moisesca, yahuarta japishpa israelcunapaj jahuata tsirapashpaca:

–Cai yahuarca, Mandaj Dioshuan cancunahuan tucui caicunata ari ninacushcata ricuchijmi– nirca.

9Moisespish, Aaronpish, Nadabpish, Abiupish, israelcunata cunaj yuyajcuna canchis chungacunandij huichiyashpami,

10israelcunapaj Taita Diosta ricurcacuna. Paipaj chaqui ucu pambaca zafiro rumihuan churashca shina, cielo shina achij nicujmi carca.

11Taita Diosca israelcunata mandajcunata llaquichingapaj paipaj maquita mana chutarcachu. Paicunaca Taita Diosta ricushpapish mana huañurcacunachu. Micurcacunami ubyarcacunami.

Sinaí urcuman Moisés huichiyashcami

12Mandaj Diosca Moisestaca:

–Ñucahuan tupangapaj urcuman huichiyashpa, chaipi shuyangui. Yachachingapaj tablajlla rumicunapi ñuca quillcashca mandashcacunataca chaipimi canman cusha– nircami.

13Chaimi Moisesca paipajta ruraj Josuendij jatarishpa, Moisesca Taita Diospaj urcuman huichiyarca.

14Moisesca cunaj yuyajcunataca:

–Ñucanchij tigramungacama caipi shuyacuichij. Aaronhuan, Hurhuanmi caipi cancunahuan canga. Ima tiyajpica, paicunapajman shamunguichijlla– nircami.

15Urcuman Moisés ña huichiyajpica, chai urcutaca p'uyumi taparca.

16Mandaj Dios sumaj jatun cashca Sinaí urcu jahuapi cajpimi, sujta punllacunata chai urcuta p'uyu tapashca carca. Canchis punllapica Mandaj Diosca p'uyu chaupimantami Moisesta cayarca.

17Mandaj Dios sumaj jatun cashcaca israelcunapaj ñahuipica imatapish rupachishpa tucuchij jatun nina shinami urcu puntapi ricurirca.

18Moisesca p'uyu chaupita yaicushpami, chai urcuman huichiyarca. Moisesca chai urcupica chuscu chunga punllacunata, chuscu chunga tutacunatami carca.